تەگى نيگەريالىق الماتى تۇرعىنى اسكەرگە الىندى
الماتى اسكەري باسقارماسىنىڭ قاتاڭ ىرىكتەۋىنەن ىركىلمەي وتكەن بولاشاق ساربازدار اۋە قورعانىسى كۇشتەرىنىڭ قۇرامىندا بورىشىن وتەۋگە مۇمكىندىك الىپ وتىر. سولاردىڭ اراسىندا مايكل جوزەف تە بار. ونى اناسى گالينا مكپو- سەمەنوۆا ساتتىلىك تىلەپ شىعارىپ سالدى.
«ۇلىم - قازاقستان ازاماتى. دەمەك، قازاقستان ارمياسىندا بورىشىن وتەۋى ءتيىس. شاقىرتۋ كەلگەندە ءوز قالاۋىمەن شەشىم قابىلدادى» - دەيدى گالينا مكپو- سەمەنوۆا.
الماتىدا تۋعان مايكلدىڭ بالالىق شاعى دا وسىندا وتكەن ەكەن. كەيىن نيگەريادا ءبىراز جىل بولىپ، قازاقستانعا ورالعان.
«ول ورىس، اعىلشىن تىلدەرىندە ەركىن سويلەيدى. قازاق ءتىلىن دە ازداپ بىلەدى. قاسىنداعىلار سوعان تاڭعالىسىپ جاتىر» - دەيدى اناسى.
بۇگىنگە دەيىن الماتى قالاسىنان قازاقستاننىڭ قارۋلى كۇشتەرىنە 700 دەن استام سارباز اتتانعان.
اۆتور: ەسىمجان ناقتىباي