ەلوردادا بالاباقشاعا جولداما الۋ جۇيەسى جاڭارتىلدى

نۇر- سۇلتان. قازاقپارات - ەلوردادا بالاباقشاعا جولداما الۋ جۇيەسى جاڭارتىلدى. بۇل جاڭارتىلعان جۇيەنى بۇگىن نۇر- سۇلتان قالالىق ءبىلىم باسقارماسىنىڭ باسشىسى ءانۋار جانعوزين تانىستىردى، دەپ حابارلايدى قازاقپارات ءتىلشىسى.

 «قالا تۇرعىندارى ءۇشىن وزەكتى ماسەلەنىڭ ءبىرى - بالالارىن مەكتەپكە دەيىنگى مەكەمەلەرگە ورنالاستىرۋ. 2017 -جىلدان باستاپ وسى قىزمەتتەر، ياعني بالاباقشالارعا كەزەككە تۇرۋ جانە جولداما الۋ قىزمەتتەرى تولىعىمەن اۆتوماتتاندىرىلعان، ە- استانا ەلەكتروندىق جۇيەسى ارقىلى جۇزەگە اسىرىلىپ جاتىر. وسى كۇنگە دەيىن 2 جىلدىڭ ىشىندە 70 مىڭنان استام اتا- اناعا اتالعان جۇيە ارقىلى قىزمەت كورسەتىلدى»، - دەدى ول.

 دەگەنمەن، ونىڭ ايتۋىنشا، بۇل جۇيەنى پايدالانۋ بارىسىندا اتا- انالار تاراپىنان ۇسىنىستار مەن سىن- پىكىرلەر كەلىپ تۇسكەن. سولاردىڭ نەگىزىندە جاڭارتىلعان.

«بىرىنشىدەن، بالاڭىزدى كەزەككە قويۋ جانە وعان جولداما الۋ قىزمەتتەرى ەندى ۇيالى تەلەفون ارقىلى قولجەتىمدى. وزدەرىڭىز بىلەتىندەي، بۇل جۇيەگە كىرىپ جۇمىس جاساۋ ءۇشىن ەلەكتروندىق سيفرلىق قولتاڭبانىڭ بولۋى قاجەت ەدى. بۇل ءوز كەزەگىندە اتا- انالاردىڭ تاراپىنان نارازىلىق تۋدىردى. سوندىقتان ءبىز قاجەتتى وزگەرىستەر ەنگىزىپ، ەندى وسى جۇيەگە كىرۋ ءۇشىن ە ت س ق- دا، كومپيۋتەر دە قاجەت ەمەس. بۇل قىزمەتتەردى سمارتفون ارقىلى الۋعا بولادى»، - دەدى ءا. جانعوزين.

باسقارما باسشىسىنىڭ سوزىنە قاراعاندا، ەكىنشىدەن جۇيەدە ءاربىر بالاباقشا بويىنشا تولىق اقپارات بار. اتاپ ايتقاندا، مەكەمە ءتولقۇجاتى، ورنالاسقان جەرى، بوس ورىندار سانى جانە باسقا دا پايدالى مالىمەتتەردى وسى جۇيە ارقىلى الۋعا بولادى.

 «ءۇشىنشى جاڭاشىلدىق ءار اتا- انا وزىنە ۇنايتىن نە بولماسا سايكەس كەلەتىن بالاباقشانى تاڭداپ، ول تۋرالى اقپاراتتى ەلەكتروندى پوشتا ارقىلى الا الادى. ياعني، بالاباقشادا بوس ورىن بولعان كەزدە ول تۋرالى پوشتاڭىزعا حابارلاما كەلىپ تۇسەدى. سوندىقتان اتا- انالار ەندى كۇنى- بويى كومپيۋتەر الدىنا وتىرماي وسى حابارلاما تۇسكەن كەزدە جۇيەگە كىرىپ، قاجەتتى ارەكەت جاسايدى»، - دەدى ءا. جانعوزين.

«بۇگىنگى كۇنى 2017 -جىلى دۇنيەگە كەلگەن بالالار ءۇشىن  1600-دەن استام، 2016 -جىلى دۇنيەگە كەلگەن بالالار ءۇشىن 5 مىڭنان استام، 2015 -جىلى دۇنيەگە كەلگەن بالالار ءۇشىن 5 مىڭ، 2014 -جىلى دۇنيەگە كەلگەن بالالار ءۇشىن 1 مىڭ، ال 2013 -جىلى دۇنيەگە كەلگەن بالالار ءۇشىن 4 مىڭ ورىن بوسايدى. بۇل مەملەكەتتىك بالاباقشالاردا، جەكە بالاباقشالاردا جانە شاعىن ورتالىقتاردا بوسايتىن ورىندار»، - دەدى نۇر- سۇلتان قالالىق ءبىلىم باسقارماسى سيفرلىق تەحنولوگيالىق ءبولىمىنىڭ باستىعى جازيرا اسانوۆا.

 ونىڭ ايتۋىنشا، جاڭارتىلعان بالاباقشالارعا كەزەككە تۇرۋ جانە جولداما الۋ جۇيەسىندە شامامەن 17 مىڭ بوس ورىن جاريالاناتىن بولادى.

«كەستە بۇگىن تۇستەن كەيىن bilim.kz سايتىندا جانە باسقارمانىڭ الەۋمەتتىك جەلىلەرىندە جاريا ەتىلەتىن بولادى. قازىرگى ۋاقىتتا مەكتەپ جاسىنا تولعان بالالالار بالاباقشانى ءبىتىرىپ جاتىر. سوعان سايكەس بۇل سان وزگەرەدى. 10 - ماۋسىمعا دەيىن E-Astana  ەلەكتروندىق جۇيەسىنە كىرىپ، جولداما الۋعا بولادى»، - دەدى جازيرا اسانوۆا.

اۆتور: مارلان جيەمباي