شەتەلگە دەمالىسقا اتتانار الدىندا نەنى ەسكەرۋ كەرەك؟

نۇر-سۇلتان. قازاقپارات - جاز كەلدى، جازبەن بىرگە دەمالاتىن كەز كەلدى. وسىعان وراي، قازاقپارات ق ر ىشكى ىستەر مينيسترلىگىنىڭ شەتەلدە دەمالۋشىلارعا بەرگەن اقىل-كەڭەسىن ۇسىنادى.

ءتولقۇجات راسىمدەۋ ءتارتىبى

مينيسترلىكتىڭ حابارلاۋىنشا، شەتەلدە دەمالۋ كەزىندە كەلەڭسىز جاعدايعا تاپ بولماس ءۇشىن ەڭ اۋەلى ءتولقۇجاتتىڭ قولدانىلۋ مەرزىمىن تەكسەرىپ الۋ قاجەت. ويتكەنى، كەي مەملەكەتتەرگە كىرۋ ءۇشىن پاسپورتتى قولدانۋ مەرزىمىنىڭ بىتۋىنەن 6 اي بۇرىن اۋىستىرۋ كەرەك.

ەلىمىزدە 2009-جىلدان باستاپ بيومەتريالىق پاسپورتتار (ەلەكتروندىق ءچيپى بار) بەرىلەدى. ولاردىڭ قولدانىلۋ مەرزىمى - 10 جىل. وسىعان بايلانىستى، ءى ءى م ازاماتتارعا جارامدىلىق مەرزىمى ءوتىپ كەتكەن قۇجاتتاردى ۋاقتىلى اۋىستىرۋ قاجەتتىگىن ەسكەرتەدى. بىزدەگى زاڭناما بويىنشا جاڭا پاسپورتتى بۇرىنعى پاسپورتتىڭ جارامدىلىق مەرزىمى اياقتالۋىنا ءبىر اي قالعاندا قايتا راسىمدەۋگە بولادى.

قازاقستان ازاماتتارىنا قۇجاتتار 15 جۇمىس كۇنى ىشىندە بەرىلەدى. ەگەر ۋاقىت تىعىز بولسا، ءتولقۇجاتتى جىلدامداتىلعان تارتىپتە 1-7 جۇمىس كۇنى ىشىندە (نۇر-سۇلتان، الماتى، اقتوبە، شىمكەنت قالالارىندا - 1 جۇمىس كۇنى ىشىندە، وبلىس ورتالىقتارىندا - 3 جۇمىس كۇنى ىشىندە، وبلىس اۋداندارى مەن قالالارىندا - 7 جۇمىس كۇنى ىشىندە) راسىمدەي الادى.

شەتەلگە 16 جاسقا تولماعان بالالارمەن بىرگە شىققان جاعدايدا، ولارعا دا الدىن الا پاسپورت راسىمدەگەن ءجون. ا ق ش، ۇلى بريتانيا، ب ا ءا، يتاليا، يسپانيا، فرانسيا، چەحيا، سلوۆەنيا، حورۆاتيا، گرەتسيا، ماجارستان، پولشا، گەرمانيا، شۆەيتساريا، شۆەتسيا، قىتاي، وڭتۇستىك كورەيا جانە باسقا دا ەلدەردە مەملەكەتكە اتا-انالارىمەن كەلەتىن بالالاردا پاسپورتتىڭ بولۋى مىندەتتى جانە پاسپورتقا بالانىڭ فوتوسۋرەتىن جاپسىرۋ قۇجات دەپ تانىلمايدى.

ايىپپۇلدار مەن بەرەشەكتەر

بورىشكەر رەتىندە شەتەلگە شىعۋ قۇقىعى شەكتەلگەن ازاماتتاردىڭ قاتارىندا تۇرماعانىڭىزدى تومەندەگى جولدارمەن انىقتاۋعا بولادى.

1. «شەتەلگە شىعۋى شەكتەلگەن، بورىشكەرلەر ءتىزىلىمى جانە اتقارۋ ءوندىرىسى بويىنشا بورىشكەرلەر ءتىزىلىمى بويىنشا شەت ەلگە شىعۋعا تىيىم سالىنعان-سالىنباعانىن تەكسەرۋ» اتتى ارنايى قىزمەتى.

2. ق ر ادىلەت مينيستلىگىنىڭ سايتىندا ورنالاسقان «قازاقستان رەسپۋبليكاسى شەگىنەن شىعۋى ۋاقىتشا شەكتەلگەن تۇلعالاردىڭ ءتىزىمى»، «اتقارۋشىلىق ءىس جۇرگىزۋ بويىنشا بورىشكەرلەر ءتىزىمى» دەرەكتەر بازاسىنان ءوزىڭىزدىڭ اتى-ءجونىڭىزدى ىزدەپ، ەلدەن شىعۋعا تىيىم سالىنعان-سالىنباعانىن تەكسەرۋ.

3. اكىمشىلىك قۇقىق بۇزۋ جانە تولەنبەگەن ايىپپۇلداردىڭ بار-جوعىن تەكسەرۋ.

ۆيزالىق رەجىم

كوزدەگەن ەلگە ساپارعا شىقپاس بۇرىن قازاقستان ازاماتتارى ءۇشىن ۆيزالىق ءتارتىپ قانداي ەكەنىن ءبىلۋ قاجەت. ەگەر ۆيزا تالاپ ەتىلسە، وندا مۇنى ديپلوماتيالىق وكىلدىك، كونسۋلدىق مەكەمە نەمەسە تۋريستىك اگەنتتىك ارقىلى الدىن الا دايىنداۋ كەرەك.

ۆيزاسىز رەجىم بولعان جاعدايدا سول ەلدە بولۋ مەرزىمى مەن ءتارتىبىن ناقتىلاۋ قاجەت. ونى قازاقستان رەسپۋبليكاسى سىرتقى ىستەر مينيسترلىگىنىڭ سايتىنان بىلۋگە بولادى. ەگەر ءسىز قانداي دا ءبىر ەل ارقىلى ترانزيتپەن ءجۇرۋدى جوسپارلاساڭىز، ترانزيتتىك ۆيزالارعا قاتىستى كەڭەس الىڭىز.

ۆيزادا دەرەكتەردىڭ دۇرىس جازىلعانىن جانە ۆيزانىڭ قولدانىلۋ مەرزىمىن، شەت مەملەكەتتە بولۋعا رۇقسات ەتىلگەن كۇندەردىڭ سانىن مىندەتتى تۇردە پىسىقتاڭىز.

شەتەلگە وقۋ، جۇمىس ىستەۋ نەمەسە تۇراقتى تۇرۋ ماقساتىندا بارساڭىز، ا ح ا ج بەرگەن كۋالىكتەر مەن انىقتامالارعا، ءبىلىمى، مۇلىكتىك قاتىناستارى، ەڭبەك قىزمەتى جانە الەۋمەتتىك قامتاماسىز ەتۋ تۋرالى قۇجاتتارعا، مۇمكىندىگىنشە سوتتىلىقتىڭ جوقتىعى تۋرالى انىقتامالارعا اپوستيل قويعىزعان ءجون.

مەديتسينالىق ساقتاندىرۋ جانە ءدارى-دارمەكتەر

شەتەلدە بولعان كەزەڭدە مەديتسينالىق ساقتاندىرۋ ءپوليسىن ساتىپ الۋدى ۇسىنامىز. بۇل مەديتسينالىق كومەككە جۇگىنگەن جاعدايدا شىعىنداردى جابۋعا مۇمكىندىك بەرەدى.

وزىڭىزبەن بىرگە ءدارى-دارمەك الساڭىز، بارا جاتقان ەلدە ول دارىلەرگە رۇقسات بەرىلگەنىن ءبىلۋ كەرەك. ىستىق ەلدەرگە شىعۋ كەزىندە ديفتەرياعا، سىرەسپەگە، پوليوميەليتكە، سارى قىزباعا قارسى ەكپە الۋ قاجەت. مەككەگە بارۋشىلارعا مەنينگوكوكقا قارسى ۆاكتسينا جاساتۋ ۇسىنىلادى.

افريكا جانە وڭتۇستىك-شىعىس ازيا ەلدەرىنە ۇزاق ساپارلايتىن بولساڭىز، ۆ گەپاتيتىنە قارسى ەكپە جاساتۋ ورىندى. كەيبىر ەلدەر تالاپ ەتىلەتىن ەكپەلەردىڭ بار ەكەنى تۋرالى انىقتاما بولماسا، كىرگىزبەۋى مۇمكىن.

كەدەندىك باقىلاۋ

قازاقستاننان سىرتقا 10000 ا ق ش دوللارىنا دەيىنگى مولشەردە قولما-قول اقشا الىپ شىعا الاسىز. ودان كوپ بولسا، دەكلاراتسيا قاجەت بولادى. سونداي-اق، ءسىز باراتىن ەلدە قانداي نارسەلەرگە دەكلاراتسيا كەرەك ەكەنىن، قانداي جاعدايدا كەرەك ەمەس ەكەنىن ناقتىلاپ الۋ كەرەك.

شەكارا ارقىلى اقشا نەمەسە تاۋارلاردى دەكلاراتسياسىز زاڭسىز وتكىزۋ ارەكەتى اكىمشىلىك جانە قىلمىستىق جولمەن جازالانادى.

ساپارعا شىققان كەزدە سۇيىكتى ونىمدەرىڭىزدى نەمەسە تەمەكى ماركالارىن وزىڭىزبەن بىرگە الۋعا نيەت بىلدىرسەڭىز، الدىمەن وعان تىيىم سالىنباعانىن انىقتاۋ كەرەك. مىسالى، مۇسىلمان ەلدەرىنە الكوگولمەن كىرۋگە بولمايدى.

ۋاكىلەتتى ورگانداردىڭ رۇقساتىنسىز مادەني قۇندىلىقتاردى، جابايى فلورا مەن فاۋنا وبەكتىلەرىن، قارۋ مەن وق-دارىلەردى اكەلۋگە جانە اكەتۋگە بولمايدى. اۆياكولىكتىڭ قول جۇگىندە شانىشقى نەمەسە كەسەتىن زاتتاردى، ءتۇرى قارۋعا ۇقسايتىن بالالار ويىنشىقتارىن نەمەسە باسقا دا زاتتاردى الىپ جۇرۋگە بولمايدى.

سونداي-اق ءبىرقاتار ەلدەردە سۇيىقتىقتار مەن گەلدەردى الىپ وتۋگە شەكتەۋ قويىلعان.

مىنەز-قۇلىق نورمالارى

شەتەلدە بولعان كەزدە ءبىزدىڭ ازاماتتار باسقا ەلدىڭ زاڭدارىن ساقتاۋعا مىندەتتى.

ەتيكا مەن مورالدىڭ جالپىعا ورتاق نورمالارىن ۇستانىپ، ەلدەگى ساياسي جانە كليماتتىق جاعدايلار تۋرالى اقپاراتپەن الدىن الا تانىسقان ءجون.

كۇتپەگەن جەردەن قۇقىق قورعاۋ ورگاندارى ۇستاعان بولسا، جول-كولىك وقيعاسى جانە تاعى باسقا وقىس جاعدايلارعا تاپ بولساڭىز، سول مەملەكەتتەگى قازاقستاندىق كونسۋلدىق مەكەمەنىڭ قىزمەتكەرىمەن كەزدەسۋدى تالاپ ەتۋگە قۇقىلىسىز. ق ر كونسۋلدىق مەكەمەسىنىڭ قىزمەتكەرلەرىنسىز شەت تىلىندەگى حاتتامالار مەن قۇجاتتارعا قول قويۋعا بولمايدى.

ءسىز بارا جاتقان ەلدەگى قازاقستان ەلشىلىكتەرىنىڭ نەمەسە كونسۋلدىعىنىڭ تەلەفوندارىن جازىپ الىپ، تۋىستارىڭىز بەن دوستارىڭىزعا ءوز ساپارىڭىز، ورنالاسقان جەرىڭىز بەن بايلانىس نومىرلەرىڭىز تۋرالى حابارلاعان ءجون.