باسشىلىق قىزمەتتە جۇرگەن وتاندىق جۇلدىزدار كىمدەر؟

 نۇر-سۇلتان. قازاقپارات - وتاندىق شوۋ-بيزنەس وكىلدەرى اراسىندا ونەرى مەن باسشىلىق قىزمەتتى قاتار الىپ جۇرگەندەرى بارشىلىق.

وسى ورايدا KAZ. NUR. KZ پورتالى لاۋازىمدى قىزمەت اتقارىپ جۇرگەن جۇلدىزداردى نازارلارىڭىزعا ۇسىنادى.

ولاردىڭ قاتارىندا ءمولدىر اۋەلبەكوۆا، اسىلحان تولەپوۆ، دوسىمجان تاڭاتاروۆ، تۇرسىنبەك قاباتوۆ، ەسەن ەلەۋكەن، ازامات ساتىبالدى، ءسابيت ءابدىحالىقوۆ پەن سايات مەدەۋوۆ بار.

تۇرسىنبەك قاباتوۆ

تۇرسىنبەك قاباتوۆ 2018-جىلدىڭ مامىرىندا استانادا جاڭادان اشىلعان ساتيرا تەاترىنىڭ كوركەمدىك جەتەكشىسى بولىپ تاعايىندالعان بولاتىن. بۇل جايىندا ەلوردانىڭ بۇرىنعى اكىمى اسەت يسەكەشەۆ ءمالىم ەتكەن ەدى.

الايدا ارادا كوپ ۋاقىت وتپەي-اق گونورارى ەڭ قىمبات ازىلكەش استانانىڭ 20 جىلدىعىنا وراي اشىلعان «كومەديا» تەاترىنىڭ ديرەكتورى بولىپ تاعايىندالدى.

ءمولدىر اۋەلبەكوۆا

ءمولدىر اۋەلبەكوۆا 2018-جىلدىڭ ساۋىرىندە «قازاق كونسەرت» بىرلەستىگىنىڭ ەسترادا ءبولىمىنىڭ باستىعى بولىپ تاعايىندالدى.

ال ارادا ءبىر جىل وتكەندە جۇلدىز وسى مەكەمەدەگى شىعارماشىلىق قىزمەتتىڭ باسشىسى قىزمەتىنە اۋىستى.

ەسەن ەلەۋكەن

تالاي ازىلكەشتىڭ ونەر الەمىندە باعىن جاققان ەسەن ەلەۋكەن 2018-جىلدىڭ تامىزىندا «Tamasha tv» تەلەارناسىنىڭ ديرەكتورى بولىپ تاعايىندالدى.

ارنا 2018-جىلدىڭ 1- قىركۇيەگىنەن باستاپ كورەرمەنگە جول تارتقان.

ازامات ساتىبالدى

تەاتردىڭ تارلانى 2018-جىلدىڭ جەلتوقسانىندا عابيت مۇسىرەپوۆ اتىنداعى بالالار مەن جاس وسپىرىمدەر تەاترىنىڭ ديرەكتورى بولىپ تاعايىندالدى.

ايتا كەتەيىك، بۇل تەاتردى ازامات ساتىبالدىدان بۇرىن ءسابيت ءابدىحالىقوۆ باسقارعان بولاتىن.

سايات مەدەۋوۆ

2017-جىلدىڭ ءساۋىر ايىندا ءانشى سايات مەدەۋوۆ الماتى وبلىسى قاراساي اۋدانىنىڭ 14№ وكرۋگىنە ءماسليحات دەپۋتاتى بولىپ سايلاندى.

الايدا ءانشىنىڭ ءوزى وتكەن جىلى بۇل ورىندا امالدىڭ جوقتىعىنان جۇرگەنىن ايتىپ قويعان بولاتىن.

اسىلحان تولەپوۆ

«جاۋجۇرەك مىڭ بالا» فيلمىمەن كوپشىلىككە كەڭىنەن تانىلعان اسىلحان تولەپوۆ تە بيىلعى جىلدىڭ مامىرىندا جاڭا قىزمەتتىڭ تىزگىنىن ۇستادى.

اكتەر «الاتاۋ» ءداستۇرلى ونەر جانە كينو تەاترى ديرەكتورىنىڭ ورىنباسارى بولىپ تاعايىندالعان.

ايتا كەتەيىك، اسىلحان تولەپوۆ 2016-جىلى الماتى قالاسى ناۋرىزباي اۋدانىنىڭ ءماسليحات دەپۋتاتتىعىنا «نۇر وتان» پارتياسىنىڭ اتىنان ۇمىتكەر رەتىندە تىركەلىپ، ەڭ جاس دەپۋتات اتانعان بولاتىن.

دوسىمجان تاڭاتاروۆ

2000-جىلدان باستاپ قازاقستان پرەزيدەنتى وركەسترىنىڭ جەكە ءسوليسى، جەتەكشى ءانشىسى قىزمەتىن اتقارعان دوسىمجان تاڭاتاروۆ بۇگىن مايور شەنىن الدى.

سونداي-اق ءانشى 2008-جىلى «دارىن» مەملەكەتتىك جاستار سىيلىعىنىڭ يەگەرى اتانسا، 2009-جىلى ەلباسىنىڭ جارلىعىمەن «قازاقستاننىڭ ەڭبەك سىڭىرگەن قايراتكەرى» اتاعىن يەلەنگەن.

ءسابيت ءابدىحالىقوۆ

ءسابيت ءابدىحالىقوۆ 2015-جىلدان بەرى عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاس وسپىرىمدەر تەاترىنىڭ باسشىسى قىزمەتىن اتقارىپ كەلدى.

ال 2018-جىلدىڭ جەلتوقسانىندا اكتەر مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى بولىپ تاعايىندالدى.