قارجى نارىعىن رەتتەيتىن جاڭا اگەنتتىك الماتىدا ورنالاسادى
«جاڭا اگەنتتىكتى قۇرۋ ۇلتتىق بانكتى قايتا ۇيىمداستىرۋ ارقىلى جۇزەگە اسىرىلاتىن بولادى. ونىڭ اياسىندا بەرىلەتىن قىزمەتتەر مەن وكىلەتتىكتەر ۇلتتىق بانكتەن اۋىسادى. وسى ورايدا شاتات بىرلىكتەرىن قايتا ءبولۋ ەسكەرىلگەن. ءبىزدىڭ بۇگىنگى شتاتتان 500 گە تارتا ادام جاڭا اگەنتتىككە اۋىساتىن بولادى. مامىر، الدىمىزداعى ماۋسىم ايىنىڭ ورتاسىندا بارلىق جۇمىستاردى قارجى مينيسترلىگىمەن اياقتايمىز»، - دەدى ە. دوسايەۆ ق ر پارلامەنتى سەناتىنىڭ جالپى وتىرىسىندا.
سونىمەن قاتار ۇ ب باسشىسى جاڭادان قۇرىلاتىن قارجى نارىقتارىن رەتتەۋ مەن دامىتۋ اگەنتتىگى الماتى قالاسىندا ورنالاساتىنىن اتاپ ءوتتى.
وسى ورايدا ءماجىلىس ءتوراعاسى نۇرلان نىعماتۋلين «بولاشاقتا ۇلتتىق بانكتىڭ نۇر-سۇلتان قالاسىنا كوشۋى جوسپارى بار ما؟» دەپ سۇرادى.
ءوز كەزەگىندە ەربولات دوسايەۆ ۇلتتىق بانكتى ەلوردادا ورنالاستىرۋ جوسپارى ەسكەرىلگەنىن جەتكىزدى.
بۇدان بۇرىن حابارلانعانداي، بۇگىنگى جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن رەتتەۋ مەن دامىتۋ جانە ميكروقارجىلىق قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
وسى ورايدا قارجى نارىعىن رەتتەۋ مەن دامىتۋ، سونداي-اق تۇتىنۋشىلاردىڭ قۇقىقتارىن قورعاۋ فۋنكسيالارىن ق ر پرەزيدەنتىنە تىكەلەي ەسەپ بەرەتىن جاڭا مەملەكەتتىك ورگان - قارجى نارىقتارىن رەتتەۋ مەن دامىتۋ اگەنتتىگىنە بەرۋ ۇسىنىلادى.