قازاقستاندىق ستۋدەنتتەر گەرمانيادا وقۋ مەن جۇمىستى قاتار الىپ ءجۇرۋدىڭ سىرىمەن ءبولىستى
مىسالى، بوس ورىندار جارمەڭكەسىنە قاتىسىپ، ارنايى سايتتارعا تىركەلىپ نەمەسە وزدىگىنەن جۇمىس قاراستىرادى. گەرمانيادا جۇمىس تابۋدىڭ ەڭ تانىمال ءتۇرى - ينتەرنەت ارقىلى ىزدەۋ. كوپتەگەن سايتتاردان بولەك ءار ۋنيۆەرسيتەتتىڭ بوس جۇمىس ورىندار بويىنشا ءوزىنىڭ پورتالى بار. قازاقستاننان كەلگەن ىڭكار بەكىش وسىلايشا جۇمىس تاپتى.
وتانداسىمىزدىڭ ايتۋىنشا، ماماندىق بويىنشا جۇمىسقا ورنالاسۋ ءۇشىن ەش قيىندىق تۋعان جوق. ەندى اپتاسىنا 16 ساعات ەڭبەك ەتىپ جۇرگەن ول وقۋى مەن جۇمىسىن قاتار الىپ جۇرەدى.
ىڭكار بەكىش، ستۋدەنت:
- جۇمىسقا ورنالاسار الدىندا وسى سالادا تاجىريبە الماسىپ، جۇمىس ىستەگەنىمدى دالەلدەي الاتىن بولامىن. ۋنيۆەرسيتەت پورتالىنا كۇنىنە 10-20 حابارلاندىرۋ تۇسەدى. وندا جۇمىس ىزدەگەندە ءتيىستى سالانى، قالاعان جۇمىس ۋاقىتى مەن ورىندى دا تاڭداي الاسىز.
بوس ورىندار جارمەڭكەسىندە دە جۇمىستىڭ ءتۇر- ءتۇرىن تابۋعا بولادى. الايدا وزدىگىنەن ىزدەپ تاپقاندى قالايتىن جاستار دا بار. قازاقستاندىق راسۋل راحيم ءدال سولاردىڭ قاتارىندا. بەرليندەگى تەحنيكالىق ۋنيۆەرسيتەتتىڭ ستۋدەنتى كومپانيالارعا ءوتىنىش جىبەرە وتىرىپ ІТ سالاسىنداعى شاعىن فيرماعا جۇمىسقا تۇردى.
راسۋل راحيم، بەرلين تەحنيكالىق ۋنيۆەرسيتەتىنىڭ ستۋدەنتى:
- 30-40-قا جۋىق ءوتىنىش جىبەرگەنمىن. مەنىڭ دوستارىم ودان دا كوپ جىبەرگەن. قازىر باعدارلامالىق قامتۋدى ءوندىرۋشى ءارى وقىپ جۇرگەن ستۋدەنت رەتىندە جۇمىس ىستەپ ءجۇرمىن. ارينە، لايىقتى جۇمىس تابۋ ءۇشىن ءار ادام ءوزى ىزدەنۋى ءتيىس. جارمەڭكەلەرگە قاتىسقان دا جاقسى عوي، ءبىراق ولار ءجيى وتە بەرمەيدى. ۋنيۆەرسيتەت جۇمىس ورىندار جارمەڭكەسىن تەك سەمەستر سوڭىندا، جىلىنا ءبىر- ەكى رەت وتكىزەدى. قالعان ۋاقىتتا ءوز بەتىمەن جۇمىس ىزدەۋگە تۋرا كەلەدى.
قازاقستاندىقتاردىڭ ايتۋىنشا، گەرمانيادا جاقسى جۇمىسقا تۇرۋ ءۇشىن قولدا ديپلوم جانە ماماندىق بويىنشا ەڭبەك ءوتىلى قاجەت. سوندىقتان ءوز ءىسىنىڭ بىلگىر مامانى اتانۋ ماقساتىندا ەرتەرەك تاجىريبە جيناقتاعان ءجون.
www.24.kz