ەلوردادا بوس جۇمىس ورىندارى جارمەڭكەسى وتەدى

نۇر-سۇلتان. قازاقپارات - ەلوردادا بوس جۇمىس ورىندارى جارمەڭكەسىندە 80 نەن استام جۇمىس بەرۋشى 1 مىڭنان استام بوس جۇمىس ورنىن ۇسىنادى، دەپ حابارلايدى ەلوردا اكىمدىگىنىڭ رەسمي سايتى.

22- مامىردا ساعات 10:00 دەن 13:00 گە دەيىن حالىقتى جۇمىسپەن قامتۋ ورتالىعى «جاستار» سارايىندا جالپى قالالىق بوس ورىندار جارمەڭكەسىن وتكىزەدى. بوس جۇمىس ورىندارى جارمەڭكەسى ءوز الاڭىندا ەلوردانىڭ 80 نەن استام جۇمىس بەرۋشىسىنىڭ باسىن قوسادى. ولار 1 مىڭنان استام بوس جۇمىس ورنىن ۇسىنباق.

جارمەڭكەگە كەلۋشىلەر جۇمىس بەرۋشىلەرمەن الدىن الا اڭگىمەلەسۋدەن ءوتىپ، تۇيىندەمەسىن قالدىرا الادى. وقۋ ورىندارىنىڭ تۇلەكتەرى ءۇشىن جاستار پراكتيكاسىنان ءوتۋ، سونداي-اق حالىقتىڭ نىسانالى توپتارىنىڭ تۇلعالارىنا الەۋمەتتىك جۇمىس ورىندارى ماسەلەسى بويىنشا اقپارات الۋ مۇمكىندىگى ۇسىنىلادى.

سونىمەن قاتار، نيەت بىلدىرۋشىلەر جۇمىسپەن قامتۋ ورتالىعىنىڭ ماماندارىنان قاجەتتى ماماندىقتار بويىنشا قىسقا مەرزىمدى كاسىپتىك وقۋدان ءوتۋ ماسەلەلەرى بويىنشا كەڭەس الا الادى.