قازاقستاننىڭ ۆولونتەر جاستارى ماسكەۋدەگى جەڭىس شەرۋىنە قاتىسادى

قوستاناي. قازاقپارات - قازاقستاندىق ەرىكتى جاستار رەسەيدىڭ «جەڭىس ۆولونتەرلەرى» قوعامدىق قوزعالىسىنىڭ ورتالىق شتابىنان شاقىرتۋ الدى، دەپ حابارلايدى قازاقپارات ءتىلشىسى.

«جەڭىس ۆولونتەرلەرى» قوعامدىق قوزعالىسى ورتالىق شتابىنىڭ ءتورايىمى ولگا امەلچەنكوۆا قاسىم-جومارت توقايەۆتىڭ قاتىسۋىمەن قوستانايدا وتكەن حالىقارالىق فورۋم بارىسىندا رەسەيدەگى ۆولونتەرلىك قوزعالىسىنىڭ جۇمىستارىن تانىستىردى. ول ەكىنشى دۇنيەجۇزىلىك سوعىستاعى جەڭىستىڭ 75 جىلدىعى قارساڭىندا اتقارىلاتىن شارالارمەن ءبولىستى.

«ءبىز جەڭىستىڭ 75 جىلدىعى شەڭبەرىندە ءار ەلدىڭ ۆولونتەرلەرىن جيناماقپىز. وسى شاراعا قازاقستاندىق جاستاردى دا شاقىرامىز. ءبىزدىڭ باستى ۇرانىمىز - سوعىستى ەندى بولدىرماۋ. ەكىنشى دۇنيەجۇزىلىك سوعىستىڭ زارداپتارى سانامىزدان ءالى كەتپەدى. وسى تۇرعىدا ەرىكتىلەر شتابىنىڭ جوبالارىنا الەمنىڭ 50 دەن استام مەملەكەتى قولداۋ ءبىلدىردى. كورشى ەل دە شەت قالمايدى دەپ سەنەمىن»، - دەدى ولگا امەلچەنكوۆا.

مەملەكەت باسشىسى بۇل شاقىرتۋدى تولىعىمەن قولدايتىنىن جەتكىزدى. وسىلايشا، قازاقستاندىق ەرىكتى جاستار 2020-جىلى ماسكەۋدە وتەتىن جەڭىس شەرۋىنە قاتىسۋعا مۇمكىندىك الدى.

قوستانايلىق ستۋدەنت ءسانيا ەسمۇراتوۆانىڭ سوزىنشە، بۇل - جاستار جىلىنىڭ توسىن سىيى.

«مەن وبلىستا وتەتىن مادەني شارالاردا ۆولونتەر بولىپ ءجۇرمىن. جۇمىسىم وزىمە ۇنايدى. باستىسى، ازاماتتىق ۇستانىمىمىزدى ەمىن-ەركىن بىلدىرە الامىز، سونىمەن قاتار قوعامدىق شارالاردىڭ بەل ورتاسىندا جۇرەمىز. ەندى رەسەيدە وتەتىن جەڭىس شەرۋىنە بارۋعا مۇمكىندىك الىپ وتىرمىز. بۇل ءبىز ءۇشىن كۇتپەگەن جاڭالىق بولدى»، - دەيدى ۆولونتەر.

ەسكە سالساق، قاسىم-جومارت توقايەۆ قوستاناي وبلىسىنا جۇمىس ساپارى بارىسىندا قازاقستان-رەسەي جاستارىنىڭ حالىقارالىق فورۋمىنا قاتىستى.