ساپاربايەۆ ەلباسىنا كوشى-قون مەن ورالماندارعا قولداۋ كورسەتۋ ماسەلەلەرى تۋرالى باياندادى

None
None
نۇر-سۇلتان. قازاقپارات - ەلباسى نۇرسۇلتان نازاربايەۆ ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋدە قازاقستاننىڭ تۇڭعىش پرەزيدەنتىنە «الەۋمەتتىك قامقورلىق» اتتى جاڭا الەۋمەتتىك شارالاردى ءتۇسىندىرۋ جونىندەگى ۇكىمەتتىك جۇمىس توبىنىڭ قىزمەتى تۋرالى مالىمدەلدى.

نۇرسۇلتان نازاربايەۆ بەردىبەك ساپاربايەۆتىڭ مينيسترلىك الدىنا قويىلعان مىندەتتەردى شەشۋ ءۇشىن مول تاجىريبەسى مەن باسقارۋ ماشىعى بار ەكەنىن اتاپ ءوتتى.

- تاجىريبەڭىز كوپ. ماڭىزدى جۇمىستاردى اتقاردىڭىز. ءۇش وبلىستى باسقاردىڭىز. جاقسى جۇمىس ىستەدىڭىز. كوپ سالا بويىنشا اقتوبە وبلىسىنىڭ كورسەتكىشتەرىن كوتەردىڭىز. ءسىز مينيسترلىككە وسى سالاداعى جۇمىستاردى جاقسارتۋ ءۇشىن تاعايىندالدىڭىز. تاجىريبەلى ازامات كەرەك بولدى. حالقىمىزدىڭ يگىلىگى ءۇشىن بەلگىلەنگەن ماسەلەلەردىڭ ءبارىن شەشۋ قاجەت، - دەدى ەلباسى.

بەردىبەك ساپاربايەۆ نۇرسۇلتان نازاربايەۆقا مينيسترلىك تاراپىنان قازاقستاندىقتاردىڭ تۇرمىس دەڭگەيىن كوتەرۋگە باعىتتالعان جاڭا الەۋمەتتىك شارالاردى جۇزەگە اسىرۋ ءۇشىن اتقارىلىپ جاتقان جۇمىستار جونىندە اڭگىمەلەدى.

قازاقستاننىڭ تۇڭعىش پرەزيدەنتى مۇقتاج ادامدارعا كومەك كورسەتۋ ۇدەرىسىنە ءتيىستى باقىلاۋ جاساۋدىڭ قاجەتتىگىن اتاپ ءوتتى.

- قازىر الەۋمەتتىك سالاعا بولىنەتىن قاراجات مەملەكەت تابىسىنىڭ جارتىسىنا جۋىعىن قۇرايدى. بارلىق جۇمىستى جۇيەلەندىرۋ قاجەت. ەڭ الدىمەن، ازاماتتارىمىز جۇمىس ورىندارىمەن قامتىلۋى ءتيىس. ارينە، بەلگىلى ءبىر جاعدايلارعا بايلانىستى جۇمىس ىستەي المايتىندار بار. ءبىز سولارعا كومەكتەسۋىمىز كەرەك، - دەدى ەلباسى.

سونىمەن قاتار، ب. ساپاربايەۆ وڭىرلەردە تۇرعىن ءۇي ماسەلەلەرىن شەشۋ جانە ەرەكشە قامقورلىققا مۇقتاج ادامدارعا قولداۋ كورسەتۋ ءۇشىن اتقارىلىپ جاتقان جۇمىستار تۋرالى باياندادى.

مينيستر بيزنەستىڭ الەۋمەتتىك جاۋاپكەرشىلىگى قاعيداتىن جۇزەگە اسىرۋ اياسىندا كاسىپكەرلەرمەن بىرگە قولعا الىنىپ جاتقان شارالار تۋرالى ايتتى.

بەردىبەك ساپاربايەۆ، سونداي-اق، كوشى-قون جانە كوپبالالى وتباسىلار مەن ورالماندارعا قولداۋ كورسەتۋ ماسەلەلەرىنە توقتالدى.

سوڭىندا نۇرسۇلتان نازاربايەۆ مينيسترلىك تاراپىنان اتقارىلىپ جاتقان جۇمىستاردىڭ ماڭىزدىلىعىنا توقتالىپ، بەلگىلەنگەن مىندەتتەردى ءتيىمدى شەشۋ قاجەتتىگىن اتاپ ءوتتى.

سوڭعى جاڭالىقتار