سەۋلدە «ەت جەمەيتىن ادامداردىڭ» فەستيۆالى ءوتتى
جالپى ەتسىز ءومىر ءسۇرۋ بولا ما؟ التىنشى ۆەگان فەستيۆالىندە سەكسەننەن استام ستەندتەر قويىلدى. قاتىسۋشىلار تەك ەت جانە ءسۇتسىز تاعامداردى ۇسىندى. شارادا كورەيادا ەجەلدەن وسىمدىكتەردەن جاسالاتىن سالاتتار كوپ بولعان. سونىمەن قاتار داستارحاندار كۇرىشتەن دايىنداعان تاعامدارعا تولى بولدى. ويتكەنى ول كارىستەردىڭ نانى بولىپ سانالادى. فەستيۆالدا ءتىپتى سويا بۇرشاقتارىنان جاسالعان سوسيسكالار جانە بالمۇزداق ساتىلدى.
لي سىن مين، فەستيۆالعا قاتىسۋشى:
- بالمۇزداقتى بادامنان جاسايمىز. ەكى ساعات ۇساقتاپ ينگريديەنتتەردى قوسامىز. ونى جاساۋعا ايەلىمە وي كەلدى، ويتكەنى ول وسىنداي ءونىمدى كورەيادا تاپپادى. ءسۇتسىز بالمۇزداق انگليا، امەريكا جانە اۆستراليادا باياعىدان تانىمال. ۆەگانشىلىق وڭتۇستىك كورەيادا جاقىندا عانا تاراي باستادى.
2005 -جىلى جانۋارلاردان جاسالعان تاماقتان باس تارتقان ادامداردىڭ سانى بەس ءجۇز مىڭ بولسا، وتكەن جىلى ميلليونعا كەلدى. ولاردىڭ ءبىرى ستۋدەنت كيم حيان گي. ونىڭ كيىمىندە دە تەك كوكونىستەر بەينەلەنگەن. حيان گي ۆەگاندارعا ارنالعان وڭتۇستىككورەيالىق برەندتىڭ تابىنۋشىسى.
كيم حيان گي، ۆەگان:
- ۆەگاندارعا كورەيادا ءومىر سۇرۋ قيىن، ويتكەنى ۆەگانشىلىق تۋرالى بىلەتىن ادامدار از. بىزگە ارنالعان مەيرامحانالار بار، ءبىراق سۇرانىس تومەن بولعاسىن باعالارى جوعارى. سوندىقتان مەن سول مەيرامحانالارعا بارمايمىن. استى ۇيدە پىسىرەمىز. دوستارىمىزبەن جينالىپ ازىق- تۇلىك ساتىپ الامىز.
وڭتۇستىك كورەيادا تۇراتىن قازاقستاندىقتار اراسىندا ۆەگاندار جوق. ءبىراق ولار وسىندا كەلىپ تاماقتانۋ راتسيونىن وزگەرۋ ءماجبۇر. ويتكەنى جەرگىلىكتى دۇكەندەردە ناندى تابۋ قيىن. سيىر ەتى قىمبات، جىلقى ەتى ساتىلمايدى. ال ەڭ ارزان شوشقا ەتپەن تاماقتانۋ دىنگە قايشى.
ۆلاديسلاۆ سوي، ءتىلشى:
- ۆەگان بولۋ وڭتۇستىك كورەيادا وتە ءتيىمدى. ويتكەنى كوكونىس پەن جەمىس- جيدەك ەتتەن بىرنەشە ەسە ارزان. مىسالى مىناداي يمپورتتالعان سيىر ەتىنىڭ ءبىر كيلوگرامى جيىرما بەس دوللار تۇرادى. ال جەرگىلىكتى سيىر ەتىنىڭ ورتاشا باعاسى ەلۋ دوللار شاماسىندا. ۆەگانشىلىقپەن بىرگە وڭتۇستىك كورەيادا ءۇي جانۋارلارىنا كوزقاراس وزگەردى. مەيرامحانالارىنداعى اس مازىرىنەن يتتىڭ ەتتەن جاسالعان تاعامدار جويىلادى. ال ءتورت اياقتى دوستاردى باعاتىن وڭتۇستىك كورەيالىقتاردىڭ سانى جىلدان جىلعا ءوسىپ بارا جاتىر.