ارىستانبەك مۇحامەدي ۇلى بارلىق كىتاپحانالاردا «ادەبي ەرتەڭگىلىك» وتكىزۋدى ۇسىندى

نۇر-سۇلتان. قازاقپارات - مادەنيەت جانە سپورت ءمينيسترى ارىستانبەك مۇحامەدي ۇلى بالالاردىڭ ساۋىقتىرۋ دەمالىسىن ۇيىمداستىرۋ جۇمىسى قالاي جۇرگىزىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

«2017-جىلدان باستاپ بالالاردىڭ دەمالىسى كەزىندە رەسپۋبليكالىق مۋزەيلەرگە، مۋزەي-قورىقتار مەن تەاترلارعا وقۋشىلاردى تەگىن كىرگىزۋ تاجىريبەسى جۇمىس ىستەيدى. وسى جوبانىڭ وڭ تاجىريبەسىن ەسكەرە وتىرىپ، ونى ەنگىزۋدى جەرگىلىكتى دەڭگەيدە دە جالعاستىرۋ ۇسىنىلادى. بۇگىنگى تاڭدا بالالار مەن جاستاردى الەۋمەتتىك ومىرگە بەلسەندى تارتۋ ءۇشىن بارلىق وڭىرلەردە كىتاپحانالار بازاسىندا كوۆوركينگ-ورتالىقتار جۇمىس ىستەپ تۇر. مۇندا بالالار مەن جاس وسپىرىمدەر وقۋ باعدارلامالارى اياسىندا شىعارماشىلىق جانە كرەاتيۆتى جوبالاردى ىسكە اسىرا الادى»، - دەدى ارىستانبەك مۇحامەدي ۇلى ۇكىمەت وتىرىسىندا.

ءمينيستردىڭ مالىمەتىنە سايكەس، بۇگىنگى كۇنى وڭىرلەردە 208 كوۆوركينگ-ورتالىق بار. وڭىرلەر بولىنىسىندە بۇل ورتالىقتاردىڭ ەڭ كوپ سانى الماتى قالاسىندا، الماتى وبلىسىندا (33)، شىعىس قازاقستان (26)، پاۆلودار (25) جانە قاراعاندى (18) وبلىستارىندا اشىلعان.

«ەلدەگى بارلىق كىتاپحانالاردا «ادەبي ەرتەڭگىلىك» وتكىزۋ ۇسىنىلادى. جوبا اياسىندا تانىمال قازاقستاندىق جازۋشىلار مەن اقىندار، جاس اۆتورلار «رۋحاني جاڭعىرۋ» باعدارلاماسى اياسىندا شىعارىلاتىن مەكتەپ باعدارلاماسىنا كىرەتىن ادەبيەتتەرمەن، قازىرگى زامانعى قازاقستاندىق ادەبيەتتەرمەن جانە الەمدىك كلاسسيكامەن وقۋشىلاردى تانىستىراتىن بولادى. بۇدان باسقا، بالالاردى جان-جاقتى دامىتۋ جانە كەڭىنەن قامتۋ ءۇشىن مينيسترلىك قالالار مەن وبلىس ورتالىقتارىندا «BookCrossing» اكسياسىن وتكىزۋدى، ال شالعاي ەلدى مەكەندەردەگى بارلىق اۋىلدىق وكرۋگتەردە «جىلجىمالى كىتاپحانالاردى» ۇيىمداستىرۋدى ۇسىنامىز»، - دەدى ول.

سونداي-اق، تۋعان ولكەنىڭ تاريحى مەن مادەنيەتىنە پاتريوتتىق قارىم-قاتىناستى قالىپتاستىرۋ ماقساتىندا مينيسترلىك مۋزەيلەر مەن مۋزەي-قورىقتاردا قازاقستاندىق سۋرەتشىلەر، مۇسىنشىلەر، ولكەتانۋشىلار، ارحەولوگتاردىڭ قاتىسۋىمەن تەگىن تاريحي-ولكەتانۋلىق جانە تانىمدىق ەكسكۋرسيالار، ءتۇرلى پلەنەرلەر وتكىزۋ ماسەلەسىن پىسىقتاۋدا.

ارىستانبەك مۇحامەدي ۇلىنىڭ ايتۋىنشا، بۇگىن «رۋحاني جاڭعىرۋ» باعدارلاماسىنىڭ اياسىندا كىتاپحانا جانە مۋزەي ءىسىنىڭ ۇزدىك قىزمەتكەرلەرىنىڭ قاتىسۋىمەن كەزەكتى 2-رەسپۋبليكالىق «رۋحاني قازىنا» فەستيۆالى ءوز جۇمىسىن باستادى. «كەيىن «دەمالىس كەزىندە بالالاردىڭ ءتيىمدى جانە مادەني-تانىمدىق بوس ۋاقىتى بويىنشا شارالار كەشەنىن ۇيىمداستىرۋ» ۇزدىك مادەنيەت قىزمەتكەرلەرى مەن ۇيىمدارىن ىرىكتەۋ كەزىندە باعالاۋ كريتەريىنە ەنگىزىلەتىن بولادى».

مينيسترلىك بالالار مەن ولاردىڭ اتا-انالارى اراسىندا «كەرەي مەن جانىبەك»، «مۇزبالاق» جانە «كۇلتەگىن» انيماتسيالىق كارتينالارىن كورسەتۋدىڭ وڭ تاجىريبەسىن ەسكەرە وتىرىپ، جازعى دەمالىس كەزىندە بارلىق مادەنيەت مەكەمەلەرىندە ولاردى تەگىن كورسەتۋ ماسەلەسىن جولعا قويماق.