قاشاعاندا مۇناي ءوندىرۋ قايتا جانداندى
قاشاعان كەنىشىندەگى تەحنيكالىق قىزمەتتىڭ جوسپارلى الدىن الۋ شارالارى ۋاقىتىنان 10 كۇن ەرتە ءبىتىپ، مۇناي ءوندىرۋ جۇمىستارى قايتا جانداندى. ازىرگە كەنىشتە تاۋلىگىنە 70 مىڭ باررەل مۇناي وندىرىلۋدە. ال ماۋسىم ايىنىڭ باسىندا ءوندىرىس 100 پايىز كۇشىنە ەنىپ، تاۋلىگىنە 370-400 مىڭ باررەل مۇناي الىنباق.
ق ر ەنەرگەتيكا ءمينيسترى قانات بوزىمبايەۆتىڭ ايتۋىنشا، تەحنيكالىق قىزمەتتىڭ الدىن الۋ شارالارى 35 كۇننىڭ ىشىندە ءساتتى اياقتالعان.
«باستاپقىدا اتالمىش جۇمىستار 45 كۇندە بىتەدى دەپ جوسپارلاعانبىز. مينيسترلىك پەن مۇناي كومپانياسىنىڭ جەدەلدىك تانىتۋى ارقاسىندا 10 كۇن ەرتە اياقتادىق. وسىنىڭ ارقاسىندا جىل سوڭىنا دەيىن جوسپارداعىدان 3 ميلليون باررەل مۇناي كوپ وندىرەتىن بولامىز»، - دەيدى مينيستر.
14 - ساۋىردە قاشاعان كەنىشىنىڭ وپەراتورى «بولاشاق» زاۋىتى مەن «د» وندىرىستىك ارالىندا كۇردەلى جوندەۋ جۇمىستارىن باستاعان بولاتىن. وسىعان بايلانىستى كەنىشتەگى مۇناي ءوندىرۋ جۇمىستارى تولىقتاي توقتاتىلعان ەدى. قازىرگى تاڭدا كەنىشتە قوندىرعىلاردى ىسكە قوسۋ جۇمىستارى ءجۇرىپ جاتىر.
اۆتور: ەسىمجان ناقتىباي