ارىستانبەك مۇحامەدي ۇلى مەملەكەت قانداي فيلمدەرگە قولداۋ كورسەتەتىنىن ايتتى
الماتىداعى Qazaqfilm ستۋدياسىندا مەملەكەتتىك ورتالىق جانىنان قۇرىلعان ساراپشىلىق كەڭەستىڭ العاشقى جيىنى ءوتتى. ەلدەگى كينوتۋىندىلار اتالمىش ورگاننىڭ ۇجىمدىق ماقۇلداۋىمەن عانا مەملەكەت تاراپىنان قولداۋ كورەتىن بولادى. مادەنيەت جانە سپورت ءمينيسترى ارىستانبەك مۇحامەدي ۇلى مەملەكەت قارجىسىنا يە بولۋ ءۇشىن ءاربىر تۋىندى قاتاڭ ىرىكتەۋدەن وتەتىنىن ءمالىم ەتتى.
«كينو تۇسىرۋگە نيەتتەنگەندەردىڭ بارلىعىنا مەملەكەت تاراپىنان قارجىلاي كومەك كورسەتۋگە مىندەتتى ەمەس جانە كورسەتە المايدى - بۇل مەنىڭ پىكىرىم. قوعامداعى وزەكتى ماسەلەلەردى قوزعايتىن، تاريحي، پاتريوتتىق، بالالارعا ارنالعان كينو مەن مۋلتفيلمدەردەن باسقاسى، ارينە. مىسالى ەرەكشە فيزيكالىق قاجەتتىلىگى بار بالالاردىڭ قاتىسۋىمەن تۇسىرىلگەن «قىز جانە تەڭىز» فيلمىن كەلتىرۋگە بولادى.
باسقا جاعدايلاردا كينويندۋستريا نارىقتىق قارىم-قاتىناستا بولعاندىقتان، مەنىڭ پىكىرىمشە، كوممەرتسيالىق كينونىڭ ءبىر بولىگىنە عانا، ونىڭ وزىندە ينۆەستيتسيالىق قۇرال رەتىندە دوتاتسيا بەرىلۋى مۇمكىن. مەملەكەتتىك قولداۋدىڭ ءاربىر تەڭگەسى ەسەپكە الىنىپ، قوعامعا جاريالى بولۋ كەرەك»، دەپ جازدى مينيستر.
ۇلتتىق كينونى قولداۋ مەملەكەتتىك ورتالىعى تاۋەلسىز قازاقستان تاريحىنداعى «كينەماتوگرافيا تۋرالى» تۇڭعىش زاڭعا سايكەس قۇرىلعان. بۇل ۇيىمنىڭ نەگىزگى مىندەتى - ۇلتتىق كينونى قولداپ، حالىقارالىق جانە الەمدىڭ ارەناعا شىعارۋ، قازاقستانداعى كينو وندىرىسىنە ينۆەستيتسيا تارتۋ. ارىستانبەك مۇحامەدي ۇلى وسى ورتالىق ارقىلى ۇلتتىق كينو رەتىندە مويىندالعان جوبالارعا مەملەكەت تاراپىنان قارجىلاي قولداۋ كورسەتىلىپ، كينەماتوگرافيا سالاسىن سۋبسيديالاۋ جۇزەگە اساتىن بولادى.
ءمينيستردىڭ ايتۋىنشا، اتالمىش ورتالىقتىڭ قۇرامىنا جوعارى بىلىكتى توپ-مەنەدجەرلەر، ەڭبەگى سىڭگەن كينەماتوگرافيستەرمەن، كرەاتيۆتى جاس ماماندار كىرگەن. بەلگىلى رەجيسسەر ساتىبالدى نارىمبەتوۆ ۇلتتىق كينونى قولداۋ مەملەكەتتىك ورتالىعى كەڭەسشىسى قىزمەتىن اتقارسا، كينو سالاسىندا 50 جىلدان اسا قىزمەت ەتكەن ولجاباي مۇسابەكوۆ ءتوراعا ورىنباسارى بولىپ تاعايىندالعان. تيمۋر بەكمامبەتوۆتىڭ Bazelevs كومپانياسىندا ەڭبەك ەتەتىن، «پروفايل»، «ىزدەۋ» فيلمدەرىنىڭ پروديۋسەرى يگور تساي ەكىنشى ورىنباسار رەتىندە كوممەرتسيالىق جوبالارعا جاۋاپتى بولماق.
ورتالىققا الەمدىك كينوكومپانيالاردا جۇمىس تاجىريبەسى بار شتاتتان تىس كەڭەسشىلەر دە تارتىلىپ وتىر. مەملەكەتتىك ورتالىق جانىنداعى كونسۋلتاتيۆتىك-كەڭەسشى ورگان - ەكسپەرتتىك كەڭەس قۇرامى دا جاساقتالدى. ونىڭ قۇرامىنا ءاسانالى ءاشىموۆ، اداي ابەلدىنوۆ، ۆاديم گولەنكو، دوسحان جولجاقسىنوۆ، سەرىك جۇباندىقوۆ، احات يبرايەۆ، الەكسەي كامەنسكي، باقىت قايىربەكوۆ، جاننا قۋانىشەۆا، تەاتر رەجيسسەرى، اسحات ماەميروۆ، ساتىبالدى نارىمبەتوۆ، مەرۋەرت وتەكەشوۆا، بەكبولات شەكەروۆ، باۋىرجان شۇكەنوۆ سىندى كينويندۋسترياسىنىڭ بەدەلدى تۇلعالارى كىرگەن.