ەرجان ماكسيم «تۇنگى ستۋديا» باعدارلاماسىندا قوناقتا بولدى
ول مەكتەپتەگى ساباقتاردى وتكىزىپ الاتىنىن، ءبىراق وقىپ جۇرۋگە تىرىساتىنىن ايتتى.
جاس ءانشى جۇرگىزۋشى قايرات ادىلگەرەيدىڭ ءجيى ساپارلار وقۋ ۇلگەرىمىنە قالاي اسەر ەتىپ جاتقانىنا قاتىستى سۇراعىنا جاۋاپ بەرە وتىرىپ: «ۇلگەرىمىم ناشارلاپ كەتتى. ەندى نە ىستەرىمدى بىلمەيمىن»، - دەپ قالجىڭداي سويلەدى.
سونداي- اق ول قازىرگى ۋاقىتتا جۇرەگىن جاۋلاپ العان حانشايىمنىڭ بارىن ايتتى.
«مەن قىزعا قارامايمىن. ءبىراق ءوزىمنىڭ قىزىم بار. ەسىمى قۇپيا بولسىن. مەنىڭ جاسىم 11-دە، ونىڭ جاسى 10 دا»، - دەپ قىسقا قايىردى.
ە. ماكسيم رەسەيلىك شوۋدا جەڭىسكە جەتپەگەنى ءۇشىن كوڭىلى تۇسپەگەنىن جەتكىزدى. «كەرىسىنشە، مەن تۋرالى ءبارى جازا باستادى، بۇرىنعىدان دا تانىمال بولا ءتۇستىم. سەبەبى بۇل جونىندە كوپتەگەن انشىلەر الەۋمەتتىك جەلىدە جازدى. ءبىرىنشى ورىن السام، ءبارى قۇتتىقتاپ، كەيىن ۇمىتىپ كەتەر ەدى. ءبىراق بۇل جاعداي ەستە قالدى»، - دەدى جاس تالانت.
بۇدان بولەك، باعدارلاما بارىسىندا ەرجان موينىنا ۇنەمى تاعىپ جۇرەتىن القانى وعان رەسەيدىڭ حالىق ءارتىسى، ءانشى اللا پۋگاچيەۆا سىيلاعانى بەلگىلى بولدى. كەش سوڭىندا ول تەلەكورەرمەندەرگە ءان ايتىپ بەردى.
ەسكە سالا كەتسەك، باتىس قازاقستان وبلىسىنىڭ دارىندى تۇرعىنى رەسەيدىڭ ءبىرىنشى ارناسىنداعى «گولوس. دەتي» كونكۋرسىندا ەكىنشى ورىن يەلەنگەن بولاتىن. كەيىن تەلەارنا باسشىلىعى بايقاۋدىڭ ناتيجەسىن قايتا قاراپ، جوققا شىعاردى. نۇر- سۇلتان قالاسىنا گاسترولدىك ساپارمەن كەلگەن ر ف ءانشىسى ۆالەري مەلادزە ە. ماكسيممەن بىرگە ءان شىرقاپ، ونىڭ جازداعى كونسەرتىنە كەلۋگە ۋادە ەتتى. ۆ. مەلادزە اتالمىش جوبادا ونىڭ جەتەكشىسى بولعان ەدى.
ال رەسەيدىڭ حالىق ءارتىسى، كومپوزيتور يگور كرۋتوي ونى ءوزىنىڭ مۋزىكالىق اكادەمياسىنا وقۋعا شاقىردى.
سونداي- اق ەرجاننىڭ «گولوس. دەتي» شوۋىنىڭ ارنايى شىعارىلىمىنا قاتىساتىنى انىقتالدى. بۇل تۋرالى ەلوردادا وتكەن باسپا ءسوز ءماسليحاتىندا اناسى گۇلميرا الىبەك ءمالىم ەتتى.
ق ر مادەنيەت جانە سپورت مينيسترلىگىنىڭ ۇيىمداستىرۋىمەن ەرجان ماكسيمنىڭ جەكە كونسەرتى الداعى 28 - ماۋسىمدا ساعات 19:00-دە «قازاقستان» ورتالىق كونسەرت زالىندا وتەدى.
ميرا تولەندى قىزى