ەلورداداعى بالالاردى وڭالتۋ ورتالىعى قالاي جۇمىس ىستەيدى؟
مۇندا ەلىمىز وڭىرلەرىنەن، الىس-جاقىن شەتەلدەن بالالار كەلەدى. وسى تۇرعىدا قازاقپارات ءتىلشىسى ورتالىقتىڭ جۇمىسىمەن تانىسىپ قايتقان بولاتىن.
«ءبىزدىڭ ورتالىققا بالالار ەلىمىزدىڭ تۇكپىر-تۇكپىرىنەن كۆوتا بويىنشا كەلەدى. جاسالاتىن ەم-دومنىڭ بارلىعى تەگىن. 10 جاسقا دەيىنگى بالالاردىڭ جانىندا اتا-اناسى بولۋى كەرەك، ال ودان جوعارى جاستاعىلار اتا-اناسىز قابىلدانادى. جانە ءبىر ايتىپ كەتەتىنى، اتا-انالار ءۇشىن ورتالىق قىزمەتى اقىلى بولىپ تابىلادى. كۆوتانى ءار وبلىستىڭ دەنساۋلىق ساقتاۋ باسقارماسى كەزەكتىك رەتپەن بولەدى. ونىڭ سانى دا وڭىرگە بايلانىستى، ياعني حالىق كوپ ورنالاسقان ايماقتا تيىسىنشە، بولىنەتىن كۆوتانىڭ دا سانى جوعارى»، - دەدى ق ر ۇلتتىق بالالاردى وڭالتۋ ورتالىعىنىڭ ديرەكتورى شولپان بولەكبايەۆا.
ونىڭ ايتۋىنشا، وڭالتۋ ورتالىعى جىلىنا 14 توپ بالا قابىلدايدى جانە ءبىر توپتا 300 بالادان بولادى.
«قازىرگى ۋاقىتتا ءبىزدىڭ ورتالىقتا 500 دەن استام ادام بار، ونىڭ 300 ءى بالالار بولسا، قالعانى اتا-انالار. سوندا جىلىنا 4200 بالا ەم الادى. ءبىر توپ 25 كۇن جاتادى، سول ۋاقىتتىڭ ىشىندە ءار بالا ءوزىنىڭ مەديتسينالىق دياگنوزىنا قاراي ءتۇرلى ەم-شارا الادى. ونىڭ ىشىندە مەديتسينالىق، پەداگوگيكالىق-پسيحولوگيالىق، الەۋمەتتىك جانە بەيىمدەۋ كۋرستارى بار. قازاقستاندا بۇگىنگى تاڭدا 70 مىڭعا جۋىق ءتۇرلى ساناتتاعى مۇگەدەك بالا بار. ءبىزدىڭ ورتالىق جۇيكە جۇيەسىنە زاقىم كەلگەن بالالاردى ومىرگە يكەمدەپ، بەيىمدەۋمەن اينالىسادى. وكىنىشكە قاراي، جۇيكە جۇيەسىنە شالدىققان بالالار سانى جىل ساناپ ارتۋدا، ونىڭ دالەلى بىزدەگى ورىن تاپشىلىعى. ارينە ەلوردادان بولەك، ەلىمىزدىڭ 9 وبلىسىندا وڭالتۋ ورتالىقتارى بار. دەگەنمەن ولارداعى مەديتسينالىق جابدىقتالۋ جاعى تولىق سايكەس كەلە بەرمەيدى. سوندىقتان دا كوبىسى بىزگە كەلگىسى كەلەدى»، - دەيدى ول.
ورتالىق باسشىسىنىڭ سوزىنشە، ەلىمىزدەن بولەك، ەم الۋعا رەسەي، قىرعىزستان، وزبەكستان، ليتۆا، لاتۆيا، تۇركيا، قىتاي سەكىلدى الىس-جاقىن شەت مەملەكەتتەردەن دە پاتسيەنتتەر كەلەدى. شەتەلدىكتەرگە ورتالىق قىزمەتى اقىلى.
«قازىرگى كەزدەگى زامان تالابى ول - سيفرلاندىرۋ، ونىڭ جەمىسىن بىزدە كورىپ جاتىرمىز. ورتالىقتا بۇگىندە ەكى روبوت بار. ولار جۇرە المايتىن بالالاردى سۇيەمەلدەۋ ارقىلى ءوز بەتتەرىمەن قادام جاساۋعا كومەكتەسەدى. ودان بولەك، «بيولوگيالىق كەرى بايلانىس» اتتى كومپيۋتەرلەنگەن اپپارات، «كوسموناۆت» دەپ اتالاتىن عارىشتىق كوستيۋم بار. ول بالانىڭ قيمىل ءىس-ارەكەتىنىڭ دامۋىن وڭتايلاندىراتىن ارنايى قۇرىلعى. بارلىعى دا زاماناۋي، شەتەلدىك قۇرىلعىلار. ارينە ادامنىڭ باسقارۋىمەن جۇزەگە اسىرىلادى. باستى ارتىقشىلىعى بالاعا قانداي قيمىل ارەكەت جاساۋ كەرەك جانە ونى قانشا ۋاقىت جاساۋ كەرەكتىگىن اپپارات ءوزى انىقتايدى. جانە دە ءوزىمىزدىڭ جابىق بوتانيكالىق ساياباعىمىز بار. وندا بىزدە وسپەيتىن 100 دەن استام ەكزوتيكالىق وسىمدىك وتىرعىزىلعان. بالالار ساياباقتا اپتاسىنا ءبىر رەت ساباق وتەدى. ونى مەديتسينا تىلىندە ەكوتەراپيا دەپ اتايدى»، - دەيدى ورتالىق ديرەكتورى.
ش. بولەكبايەۆا ورتالىققا كوبىنە جۇيكە جۇيەسى زاقىمدانعان بالالار تۇسەتىنىن ايتتى.
«بىزگە كەلەتىن بالالاردىڭ نەگىزگى بولىگى نيەۆرولوگيا بويىنشا، ياعني جۇيكە جۇيەسى زاقىمدانعاندار. وسىندا وڭالتۋدان وتكەن جانە ءوتىپ جاتقان بالالاردىڭ 60 پايىزى سال اۋرۋىنا شالدىققاندار. ەكىنشى كەزەكتە اۋتيزممەن اۋىراتىندار ءجيى تۇسسە، ءۇشىنشى ورىندا - سويلەۋ قابىلەتىندە كىناراتى بار بالدىرعاندار»، - دەيدى ول.
ايتا كەتسەك، بۇگىننەن باستاپ «Kazakh Tourism» ۇلتتىق كومپانياسى ىشكى تۋريزمنىڭ پوتەنتسيالىن ارتتىرۋ جانە دارىپتەۋ ماقساتىندا بىرنەشە قالا مەن وبلىستىڭ تۋريستىك نىساندارى مەن ساۋىقتىرۋ كەشەندەرىنە ون كۇندىك تۋردى باستادى. تۋر بارىسىندا نۇر-سۇلتان، الماتى، شىمكەنت قالالارى مەن الماتى، تۇركىستان، ش ق و جانە اقمولا وبلىستارىنىڭ تۋريستىك جانە دەنساۋلىق ساقتاۋ الەۋەتى تانىستىرىلاتىن بولادى.