جوڭعار الاتاۋىنىڭ بوكتەرىندە سيۆەرس الماسى گۇلدەدى

 تالدىقورعان. قازاقپارات - جوڭعار الاتاۋىنىڭ بوكتەرىندە سيۆەرس الماسى گۇلدەدى. وسىعان قاراي سارقان اۋدانى، توپوليەۆكا اۋىلىندا ەكىنشى جىل قاتارىنان فەستيۆال ۇيىمداستىرىلۋدا، دەپ حابارلايدى قازاقپارات ءتىلشىسى.

ەلباسى ن. نازاربايەۆ «ۇلى دالانىڭ جەتى قىرى» اتتى ماقالاسىندا قازاقستان الما مەن قىزعالداقتىڭ وتانى دەپ اتاپ وتكەن بولاتىن. بۇگىندە بۇل فاكت عىلىمي تۇرعىدا دالەلدەنىپ وتىر. ال جوڭعار الاتاۋى مەملەكەتتىك ۇلتتىق تابيعي پاركى اۋماعىندا وسەتىن جابايى سيۆەرس الماسى الەمدەگى بارلىق سورتتاردىڭ ارعى اتاسى. ءدال وسى جابايى جەمىستىڭ گۇلدەنۋ ءساتىن تاماشالاۋعا سوڭعى جىلدارى حالىق شەتەلدەن دە ارنايى كەلەتىن بولىپ ءجۇر. الماتى وبلىستىق تۋريزم باسقارماسى مەن سارقان اۋدانىنىڭ اكىمدىگى وڭىردە ءتۋريزمدى دامىتۋ ماقساتىندا فەستيۆال ۇيىمداستىرىپ، قازاقتىڭ مادەنيەتىن تانىتۋدى قولعا الدى.

 

 «ەلدەر ەستىسە، ەلدەر كورسە، ەلدەر بىلسە جەردى دە تانيدى. المانىڭ ناعىز وسكەن جەرىن تاماشالاۋعا كەلەدى. بۇل تۋريزم. تۋريزم دەگەن جاڭا جۇمىس ورىندارى دەگەن ءسوز» ، دەيدى اۋدان باسشىسى مارات رازبەكوۆ.

 

فەستيۆال اياسىندا ۇلتتىق ويىندار ويناتىلىپ، سالت- داستۇرلەرىمىز ۇلىقتالىپ، قوناقتارعا قازاق حالقىنىڭ باي داستارحان ءمازىرى ۇسىنىلدى. ارنايى جول تالعامايتىن كولىكتەرمەن الما گۇلدەيتىن جەرلەرگە ساياحاتتار ۇيىمداستىرىلىپ، تۋريستەر گۇلگە ورانعان جەمىس قۇشاعىندا سۋرەتكە ءتۇسۋ مۇكىندىگىنە يە بولدى. ۇلتتىق پارك قىزمەتكەرلەرى المانىڭ تاريحى تۋرالى ماعلۇمات بەرىپ، جابايى اعاشتى قورعاپ قالۋ باعىتىنداعى جۇمىستار ءتۇسىندىرىلدى.

 

جوڭعار الاتاۋى ۇلتتىق پاركى سارقان فيليالى ديرەكتورىنىڭ ورىنباسارى توعجان ايقۇلاقوۆانىڭ ايتۋىنشا، جىل سايىن 2 مىڭ ءتۇپ سيۆەرس الماسىنىڭ كوشەتى ەگىلەدى. 2017 -جىلدان بەرى الما قورى بىرنەشە گەكتارعا ۇلعايعان.

 

بولاشاقتا وبلىستىق تۋريزم باسقارماسى مەن جەرگىلىكتى بيلىك فەستيۆال اياسىن كەڭەيتىپ، حالىقارالىق دەڭگەيدە وتكىزبەك.