ءتۇرلى ەلدە مەكتەپ ءبىتىرۋ شاراسى قالاي وتەدى
مەكتەپتى ءبىتىرۋ بالالىقپەن قوشتاسۋدى جانە ۇلى ىستەر مەن جاڭالىقتارعا جول باستايتىن العاشقى قادامدى بىلدىرەدى.
مەكتەپپەن قوشتاسۋدى ءار ەلدە ءارقالاي اتاپ وتەدى. بازبىرەۋلەر تاڭ اتقانشا دۇرىلدەتىپ تۇرىپ تويلايدى، ەندى بىرەۋلەر ءۇشىن «سوڭعى قوڭىراۋ» - بۇل مەكتەپتەگى وقۋ باعدارلاماسىنىڭ جانە ءتىپتى ءبىتىرۋ ەمتيحانىنىڭ ۇلكەن ءبىر بولىگى. قالاي بولعاندا دا، تۇلەكتەر ءۇشىن جازدىڭ العاشقى ايى مەكتەپتى ءبىتىرۋ قامىمەن جۇرەتىن جايدارى مەزگىلدى بىلدىرەدى. سەناريلەر ازىرلەنىپ، مەكتەپ ءبىتىرۋ سالتاناتىنا كيىلەتىن كويلەكتەر الىنادى، كەشەگى وقۋشىلار مەكتەپتەگى ەڭ جاقىن دوستارىنا ماڭگى دوس بولىپ قالۋعا سەرتتەسىپ جاتادى.
ءاربىر ەلدە مەكتەپ ءبىتىرۋدىڭ وزىندىك ەرەكشە داستۇرلەرى بار. بۇل رەسمي دە بەيرەسمي داستۇرلەرگە قاتىستى. ءار ەلدىڭ ءوزىنىڭ ەشكىمدە جوق نەمەسە كەيدە كۇلكىلى بولىپ كورىنەتىن ادەت- سالتتارى مەن ءبىتىرۋ كەشىندە كيەتىن كوستيۋمدەرىنىڭ ارنايى اكسەسسۋارلارى بار. ءبىز دۇنيە جۇزىندەگى مەكتەپ بىتىرۋشىلەردىڭ سالت-داستۇرلەرىن مۇقيات زەردەلەپ شىقتىق، ەندى سولاردىڭ ەڭ ەرەكشەلەرى مەن كوڭىلدى وتەتىندەرىن سىزدەردىڭ نازارلارىڭىزعا ۇسىنامىز.
مەكتەپ ءبىتىرۋدى قىتايدا قالاي اتاپ وتەدى
قىتايدا كوپساتىلى ءبىلىم بەرۋ جۇيەسى بولعانىمەن، جوعارى مەكتەپ دەپ اتالىپ كەتكەن ساتىنى اياقتاۋ نەگىزگى مەكتەپ ءبىتىرۋ بولىپ سانالادى. وقۋشىلاردىڭ بارلىق تۋىستارى مەن دوستارى شاقىرىلاتىن ءبىتىرۋ ەمتيحانى مەرەكەلەۋدىڭ رەسمي ءبولىمىن قۇرايدى. ودان سوڭ وقۋشىلارعا مەكتەپ بىتىرگەنى جونىندەگى قۇجاتتار تابىس ەتىلەدى. رەسمي تۇردە ماراپاتتاۋ سالتاناتىنا وقۋشىلار مانتيا مەن اكادەميالىق قالپاق كيىپ بارادى. ال ءبىتىرۋ كەشىندە بوزبالالار كوستيۋم، بويجەتكەندەر نەكەقيار كويلەگىن كيىپ جۇرەدى.
شۆەتسيادا مەكتەپ ءبىتىرۋدى قالاي اتاپ وتەدى
سكانديناۆيا ەلدەرىندە تۇلەكتەردى «ءومىر تەڭىزىنە» ءارقايسىسىنا سايكەستى تەڭىزشىنىڭ قالپاعىن كيگىزىپ جىبەرەدى. كەشەگى وقۋشىلار ءوز مەكتەبىنىڭ الدىنان شەرۋلەتىپ ءوتىپ، سىنىپتاستار مىندەتتى تۇردە ءان سالادى. وسىدان كەيىن تۇلەكتەردىڭ اتا-انالارى ءارقايسىسىنا ەرەكشە «بوي جەتۋ» اتتەستاتىن - بالالىق شاعىنداعى ەڭ ۇيالتىپ-قىزارتاتىن سۋرەتتەرىن تارتۋ ەتەدى. جاقىن تۋىستارى مەن دوستارى ولارعا ءار ءتۇرلى سىيلىقتاردى تابىستايدى، ولاردى مىندەتتى تۇردە مويىندارىنا ءىلىپ الۋى كەرەك . سوسىن بارىپ تۇلەكتەر بۇكىل قالا كەلىپ كورەتىن جالپى قالالىق شەرۋگە قاتىسادى.
مەكتەپ ءبىتىرۋدى جاپونيادا قالاي اتاپ وتەدى
كۇنشىعىس ەلى تۇلەكتەرىن بارىنەن بۇرىن ۇشىرادى. جاپونيادا وقۋ جىلى كوكتەمدە باستالاتىندىقتان، مەكتەپتى ءبىتىرۋ ۋاقىتى ناۋرىز ايى. ءبىتىرۋ شاراسى رەسمي تۇردە وتەدى جانە ول ءبىتىرۋ ەمتيحانىنىڭ قۇرامىنا كىرەدى. جاپوندار وزدەرىنىڭ مادەني داستۇرلەرىن ماقتان تۇتادى، سوندىقتان ءبارى وتە سالتاناتتى جاعدايدا وتەدى. تۇلەكتەر ءان شىرقالىپ، حالىقتىق بيلەر بيلەنەتىن ايرىقشا حورەوگرافيالىق شەرۋ جاسايدى. جىگىتتەرگە ىسكەرلىك كوستيۋمدى عانا، ال قىزدارعا تەك كيمونو كيۋگە بولادى.
مەكتەپ ءبىتىرۋدى ارگەنتينادا قالاي اتاپ وتەدى
ارگەنتينالىق وقۋشىلاردىڭ، دالىرەك ايتساق، ولاردىڭ اتا-انالارىنىڭ باعى جانعان دەۋگە بولادى. بۇل ەلدە ماقتانۋ، ءساندى دە سالتاناتتى مەكتەپ ءبىتىرۋ كويلەكتەرى مەن كوستيۋمدەرىن كيۋ ەرسى سانالادى. بۇنىڭ سەبەبى مەكتەپتى بىتىرگەنى جونىندەگى قۇجاتتار تاپسىرىلۋىنا ۇلاساتىن ەرەكشە داستۇردە. سوڭعى قوڭىراۋ سوعا سالىپ، كەشەگى وقۋشىلار ءبىر-بىرىنە ءشاربات، شىرىن جانە كەتچۋپ شاشادى. شيكى جۇمىرتقا، ءتاتتى ناندار جانە باسقا تاعامدار توننا-تونناسىمەن اعىپ جاتادى جاتادى. وبال. ءبارى بىتكەن سوڭ، شارشاعان، ءبىراق ريزا كوڭىلدى تۇلەكتەر سول كۇيىندە قالا كوشەلەرىن ارالاۋعا شىعادى.
فيليپپيندىكتەر مەكتەپ ءبىتىرۋدى قالاي اتاپ وتەدى
جاپونياداعى سياقتى فيليپپيندىكتەردىڭ دە سالتاناتتى شارالارى كوكتەمدە وتەدى. ونداعى مەكتەپتەگى سوڭعى مەرەكەنىڭ رەسمي جانە ەركىن ءبولىمى بار. رەسمي بولىگىندە وقۋشىلارعا ديپلومدار جانە تروپيكالىق كليمات پەن مەكتەپتىڭ اياقتالعانىن بىلدىرەتىن ارنايى مەدالدار - لەيالار تابىستالادى. سالتاناتتى شارا اياقتالا سالىسىمەن تۇلەكتەر مەن ولاردىڭ جاقىن تۋىستارى مەرەكەنى ءوز وتباسىندا اتاپ ءوتۋ ءۇشىن ءۇيدى-ۇيلەرىنە تارايدى.
گەرمانيا
گەرمانيادا ءبىتىرۋ سالتاناتتارى ءارقالاي وتە بەرەدى. رەسمي بولىگى تۋراسىندا ايتساق، ول بۇكىل ەلدە بىركەلكى وتەدى - اكادەميالىق كيىم جانە ءتورتبۇرىشتى شلياپا. ال سالتاناتتى مەرەكەدەن سوڭ تويلاۋ ءتۇرى ءار الۋان بولىپ كەتەدى. ءار مەكتەپ «سوڭعى قوڭىراۋدى» وزىنشە اتاپ وتەدى. كەيبىرەۋلەر ءسان- سالتاناتتى ءبىتىرۋ بالىن وتكىزەدى دە، سىنىپتاستار تاڭ شاپاعىن قارسى الۋعا كەتەدى. باسقا مەكتەپتە ارنايى ساحنالىق كيىمدەر كيەتىن كەش دايىندايدى، كەلەسى مەكتەپتە ءبارىن، مۇعالىمدەردى دە، فلوماستەرمەن بەتى-باسىن شيمايلاپ، اۋىتتەگى سۋعا لاقتىراتىن وزىنشە ءبىر ەرەۋىلمەن تىنادى.
مەكتەپ ءبىتىرۋدى انگليادا قالاي اتاپ وتەدى
كونسەرۆاتيۆتى ۇلى بريتانيا مەكتەپ ءبىتىرۋ مەرەكەلەرىن جاقتىرمايدى جانە جوعارى وقۋ ورنىن بىتىرگەندەرگە عانا اتاپ وتۋگە كەڭشىلىك جاسايدى. جوعارى مەكتەپتى ءبىتىرۋدىڭ رەسمي بولىگى عانا بار، ول اياقتالعان سوڭ تۇلەكتەر كوڭىل كوتەرىپ، قىدىرۋ ءۇشىن قالانى ارالاپ كەتەدى. كەيبىر كوڭىل جاراستىرعان قىز- جىگىتتەر نەمەسە جاقسى دوستار اتا-انالارىنان جىراقتا بولۋ جانە ۋنيۆەرسيتتەرگە تۇسەر الدىندا دەمالىپ سەرگۋ ءۇشىن ەۆروپا ەلدەرىنە ءبىر اپتاعا ساپارعا شىعىپ قايتۋى مۇمكىن.
ا ق ش مەكتەپ ءبىتىرۋدى قالاي اتاپ وتەدى
امەريكالىقتار ەرەكشە جاعدايلاردى تويلاۋ تۇرعىسىندا بىزگە جاقىن ەكەن. ولار ءۇشىن مەكتەپ ءبىتىرۋ - ايعا ۇشقانعا پاراپار. وعان بارىن سالىپ جانە الدىن الا دايىندالادى. مەكتەپ ءبىتىرۋ كەشى ەلدەگى ۇلتتىق مەرەكەنىڭ ار جاق- بەر جاعىندا تۇر. مەكتەپ ءبىتىرۋ سالتاناتىنىڭ رەسمي جانە بەيرەسمي (ءبىتىرۋ بالى) بولىكتەرىمەن ارنايى كوميتەتتەر اينالىسادى. ولاردىڭ تارتىپتەمەلەرى (رەگلامەنت) ءۇتىر- نۇكتەسىنە دەيىن جازۋلى. بالعا تەك ءوز جۇبىڭمەن عانا بارۋعا بولادى، ونىڭ ۇستىنە بوگدە قىزبەن نەمەسە جىگىتپەن بيلەۋگە بولمايدى. ال تۇلەكتەر بالدىڭ پاتشاسى نەمەسە پاتشايىمى اتاعىن الۋدى وكسفوردقا وقۋعا تۇسۋدەن كوبىرەك ارماندايدى.
يزرايلدە مەكتەپ ءبىتىرۋدى قالاي اتاپ وتەدى
يزرايلدىك مەكتەپ ءبىتىرۋ سالتاناتى ەرەكشە وتەدى. وعان ۇلكەندەردەن گورى بالالار كوبىرەك دايىندالادى. كوبىنەسە وقۋشىلار وزدەرىنىڭ اتا-انالارىنا ارناپ مەكتەپ ءبىتىرۋ ساحنالىق كورىنىسىن ازىرلەيدى. بۇنداي شاراعا تەاترلاندىرىلعان قويىلىم، كونتسەرت، ميۋزيكل ت. ب. كورسەتىلۋى كىرۋى مۇمكىن. بۇلار مەكتەپ تەاترلارىندا نەمەسە تەڭىز جاعاسىندا كورسەتىلە بەرەدى. ايتا كەتەرلىگى، مەكتەپ بىتىرگەن سوڭ ءبارى، قىزدار دا، يزرايلدىك اسكەردە قىزمەت ەتۋگە مىندەتتى. جاقسى ءداستۇر، ودان باس تارتىپ بۇلتارۋ ەشقايسىسىنىڭ قاپەرىنە دە كىرىپ شىقپايدى.
مەكتەپ ءبىتىرۋدى وڭتۇستىك كورەيادا قالاي اتاپ وتەدى
مەكتەپ ءبىتىرۋ شاراسى وڭتۇستىك كورەيادا دا ەرەكشە ەكەن. شارا تاڭەرتەڭ، كۇن شىعا سالا باستالادى. تۇسكە دەيىن مەكتەپتى بىتىرگەنىن كۋالاندىراتىن قۇجاتتار تابىستالاتىن رەسمي بولىگى اياقتالادى. بۇنىڭ ءبارى وقۋشىلاردىڭ تۋىسقاندارى مەن وتباسىلارىنىڭ جاقىن ارالاساتىن دوس- جاراندارىنىڭ كوزىنشە بولادى. مەكتەپتىڭ ءانۇرانى شىرقالادى، وقۋشىلاردىڭ مۇعالىمدەرى مەن اتا- انالارىنا قۇرمەت كورسەتىلەدى، سوسىن ەڭ قىزىعى باستالادى. سوڭعى قوڭىراۋ سوعىلعان كەزدە تۇلەكتەر ءبىر-ءبىرىن شيكى جۇمىرتقامەن اتقىلاپ، ۇنعا اۋناتادى. وسىدان كەيىن جەك كورەتىن وقۋلىقتار ورتەلىپ، ابدەن مەزى قىلعان مەكتەپ فورماسى كۇل-پارشاسى شىعىپ جىرتىلادى.
ال ءسىزدىڭ ويىڭىزشا ومىردەگى ەڭ ماڭىزدى ءساتتىڭ ءبىرى قالاي اتالىپ وتكەنى دۇرىس؟ ءبىزدىڭ تۇلەكتەرىمىزدىڭ دە ەرەكشە ءبىر سالتى بولۋى كەرەك پە؟