زەلەنسكي ۋكراينا راداسىن تاراتاتىنىن مالىمدەدى
«زەلەنسكي ۋكراينا كونستيتۋتسياسى مەن ىنجىلگە قولىن قويىپ، انت ءماتىنىن وقىدى. وتىرىسقا قاتىسۋشىلار پرەزيدەنت انتىن تۇرەگەپ تۇرىپ تىڭدادى. وسىدان كەيىن وتىرىسقا ءتوراعالىق ەتكەن جوعارعى رادا ءتوراعاسى اندرەي پارۋبي پرەزيدەنت زەلەنسكيدى جوعارعى راداداعى ۋكراينا پرەزيدەنتىنىڭ ورنىنا جايعاسۋعا شاقىردى»، - دەلىنگەن حابارلامادا.
ورتالىق سايلاۋ كوميسسياسىنىڭ ءتورايىمى تاتيانا سليپاچۋك ۆلاديمير زەلەنسكيگە ۋكراينا پرەزيدەنتىنىڭ كۋالىگىن تاپسىردى.
كونستيتۋتسيالىق سوت ءتورايىمى ناتاليا شاپتالا ۆلاديمير زەلەنسكيگە پرەزيدەنت بەلگىسىن، شوقپار (بۋلاۆا) مەن ەلتاڭبا ءمورىن بەردى.
سونداي-اق، ۋكراينا پرەزيدەنتى سەگىزىنشى شاقىرىلىمداعى جوعارعى رادانى تاراتاتىنىن جاريا ەتتى.
ايتا كەتەرلىگى، ۋكراينا پرەزيدەنتى ۆلاديمير زەلەنسكيدى ۇلىقتاۋ راسىمىنە قازاقستان رەسپۋبليكاسىنىڭ جوعارى دەڭگەيدەگى دەلەگاتسياسى قاتىستى. قازاقستان دەلەگاتسياسىن ق ر پارلامەنتى سەناتى ءتوراعاسىنىڭ ورىنباسارى بەكتاس بەكنازاروۆ باسقاردى.
ەسكە سالساق، ورتالىق سايلاۋ كوميسسياسىنىڭ 30 -ساۋىردە وتكەن وتىرىس حاتتاماسىنا سايكەس، ۆلاديمير زەلەنسكي ۋكراينا پرەزيدەنتى بولىپ سايلاندى.