تۇركىستاندىق وقۋشىلاردىڭ قۇراستىرعان روبوتتارى قالامگەرلەردى ءتانتى ەتتى
اباي اۋىلىنداعى مادەنيەت ۇيىندە وتكەن مارافوندا جەرگىلىكتى مەكتەپتەردىڭ وقۋشىلارى وزدەرى قۇراستىرعان روبوتتار مەن ماشينالارىن كوپشىلىك نازارىنا ۇسىندى، دەپ حابارلايدى قازاقپارات ءتىلشىسى.
ونەرتاپقىش وقۋشىلاردىڭ كورمەسىن تاماشالاعان نۇر- سۇلتان، الماتى قالالارىنان كەلگەن قالامگەرلەر مەن باس رەداكتورلار جاس ورەندەردىڭ قادامىن وڭ باعالاپ، تاڭدانىستارىن جاسىرا المادى. ماعىنالى كەزدەسۋدى كەلەس اۋدانىنىڭ اكىمى اقمەنتاي ەسبايەۆ اشىپ بەردى.
«كەلەس اۋدانىندا 63 ءبىلىم ۇياسىندا 33 مىڭعا جۋىق وقۋشى ءبىلىم الىپ جاتىر. قوسىمشا بىلىممەن قامتىلعان بالالار سانى 12000 نان اسسا، قوسىمشا ۇيىرمەلەرگە تارتىلعان بالالار سانى 7500 گە جەتتى. كەزىندە توقاش بەردياروۆ، زيابەك رۇستەموۆ، نەمات كەلىمبەتوۆ، زاكىر اسابايەۆ تاعى باسقا تۇلعالارعا تۇعىر بولعان قاسيەتتى كەلەس الداعى ۋاقىتتا دا ۇلتىن سۇيەتىن ۇلانداردىڭ ورداسىنا اينالارى ءسوزسىز. بۇل ءىس- شارا وقۋشىلاردىڭ دامۋىنا، وي- ءورىسىنىڭ كەڭەيۋىنە وڭ سەرپىن بەرەدى» ، - دەدى اۋدان اكىمى.
اباي تورىندەگى كەزدەسۋگە كەلەس، شاردارا، قازىعۇرت، جەتىساي، ماقتاارال جانە سارىاعاش اۋداندارىنىڭ وقۋشىلارى مەن ۇستازدارى قاتىستى. ولارعا ەلگە تانىمال قالامگەرلەر مەن ب ا ق باسشىلارى اقىل- كەڭەستەرىن ايتىپ، ءتۇرلى سۇراقتارعا جاۋاپ بەردى. سونىمەن بىرگە وقۋشىلارعا «ۇلان» ، «اق جەلكەن» جانە «بالدىرعان» بالالار باسىلىمدارى تاراتىلدى.
جيىندا «جاس وركەن» ج ش س- ءنىڭ باس ديرەكتورى جۇسىپبەك قورعاسبەك ءوز سوزىندە جاپونياداعى بالا تاربيەسىنە توقتالىپ ءوتتى.
«جاپونيادا ءسابي كۇتىپ جۇرگەن كەلىنشەكتى كىتاپحاناعا بارۋعا مىندەتتەيدى ەكەن. ماقسات - بالانى قۇرساعىندا جاتقان كەزدەن باستاپ كىتاپ وقۋعا قىزىقتىرۋ» دەسە، «بالاپان» تەلەارناسىنىڭ باس پروديۋسەرى ساندۋعاش بايماحان قىزى تەلەارنادا بالالار مەن جاسوسپىرىمدەردىڭ دۇنيەتانىمىن ارتتىراتىن جوبالار كوبەيىپ كەلە جاتقانىن ايتتى. ال ۇلتتىق اۋدارما بيۋروسىنىڭ وكىلى، اقىن، جۋرناليست ەسەي جەڭىس ۇلى قازىرگى بالالاردىڭ تاربيەسىنە قاتىستى ماڭىزدى ماسەلەلەرگە توقتالدى.
«وسىنداعى ءاربىر وقۋشى ەرتەڭ اتا- انا بولادى. ولار تىم بولماسا وزدەرىنىڭ ۇل- قىزدارى سۇراق قويعاندا جاۋاپ بەرە الاتىنداي ءبىلىمدى بولسىنشى. قازىر الەمدە ءتورتىنشى يندۋستريالدىق ريەۆوليۋتسيا ءجۇرىپ جاتىر. ول نە؟ دامىعان ەلدەر قاتارىنا قوسىلۋ ءۇشىن نە ىستەۋ قاجەت؟ مىنە، وسى سۇراقتارعا جاۋاپ ىزدەۋ، ۇلى مىندەتتەردى ورىنداۋ - سەندەر سياقتى ورەندەردىڭ قولىندا» ، - دەدى ەسەي جەڭىس ۇلى.
جيىندا «بالدىرعان» جۋرنالىنىڭ باس رەداكتورى دۇيسەنبەك ماعلۇموۆ، جازۋشى اياگۇل مانتاي، «ايقىن» گازەتى باس رەداكتورىنىڭ ءبىرىنشى ورىنباسارى سەرىكبول حاسان جانە «ۇلان» گازەتىنىڭ باس رەداكتورى جادىرا نارماحانوۆا، جازۋشى، دراماتۋرگ الىبەك بايبول سىندى قالامگەرلەر وقۋشىلاردىڭ سۇراقتارىنا جاۋاپ بەرىپ، پىكىر الماستى. ءوز ولەڭدەرىن وقىپ، ەركىن پىكىر الماسقان وقۋشىلار قالامگەرلەرمەن سۋرەتكە ءتۇستى. ءتۇرلى اۋدانداردان كەلگەن ۇستازدار مەن شاكىرتتەر وسىنداي كەزدەسۋلەر ءجيى ءوتىپ تۇرسا دەگەن تىلەكتەرىن جەتكىزدى.
كەزدەسۋ سوڭىندا وقۋشىلارعا «ساق» كيونستۋدياسى تۇسىرگەن «تۇركىستان» انيماتسيالىق فيلمى كورسەتىلدى.
مادەنيەت ۇيىندەگى كەزدەسۋدەن كەيىن قالامگەرلەر "Jas Túrkіstan-2019" رەسپۋبليكالىق بالالار شىعارماشىلىق مارافونىن ۇيىمداستىرعان تۇركىستان وبلىسى اكىمدىگىنە ريزاشىلىقتارىن ءبىلدىرىپ، بۇل جوبا داستۇرگە اينالاتىنىنا سەنىم ءبىلدىردى.