ازاماتتىق الا الماي جۇرگەن ورالمانعا «جولدا قابىلداۋ» اكسياسى كەزىندە كومەك كورسەتىلدى
«جولدا قابىلداۋ» اكسياسى بارىسىندا تۇرعىنداردىڭ كوبى جول قوزعالىسىن ءتيىمدى ۇيىمداستىرۋ، ايىپپۇل تولەۋ، كولىكتى تىركەۋ سياقتى ماسەلەلەر بويىنشا جۇگىنگەن. وبلىس اۋماعىندا شەتەل ازاماتتارىن تىركەۋ، ولاردى جۇمىسقا الۋ ماسەلەسى بويىنشا دا كوپتەگەن ساۋالدار تۇسكەن.
«بۇل شارا حالىقپەن كەرى بايلانىس ورناتۋعا وڭتايلى. Instagram جەلىسى ارقىلى دا تۇرعىنمدارمەن ونلاين رەجىمدە ديالوگ قۇرىپ، سۇراقتارىنا جاۋاپ بەردىك»، - دەيدى وبلىستىق پوليتسيا دەپارتامەنتىنىڭ باسپا ءسوز قىزمەتشىسى ازامات رايسوۆ.
شارا بارىسىندا ۇلتى قازاق شەتەلدىك ازامات قۇجاتتارىن رەتتەۋگە مۇمكىندىك العان.
«جىل اياعىنا دەيىن جالعاساتىن ورالمان مارتەبەسىن ءبىر رەت ۇزارتۋ اكسياسى اياسىندا قۇجاتتارىنىڭ مەرزىمى ءوتىپ كەتكەن قانداسىمىزدىڭ ماسەلەسى وڭ شەشىمىن تاپتى. ول ورالمان مارتەبەسىن كۋالاندىراتىن قۇجاتتى دەر كەزىندە ۇزارتپاعان. سونىڭ كەسىرىنەن قازاقستان رەسپۋبليكاسىنىڭ ازاماتتىعىن الۋعا قۇجات تاپسىرا الماي كەلگەن. كوشى- قون قىزمەتى باسقارماسىنىڭ ماماندارى ءبىر رەتتىك اكسيا اياسىندا وعان جانە وتباسىنا وڭتايلاندىرىلعان تارتىپتە ازاماتتىق الۋعا مۇمكىندىك بەرەتىن ۇسىنىم حات دايىندادى»، - دەيدى دەپارتامەنت وكىلى.
اۆتور: ەسىمجان ناقتىباي