07:33, 20 - مامىر 2019 | GMT +6
كونسەرتكە كەلگەن توپقا بەلگىسىز بىرەۋ گراناتا لاقتىرعان، بىرنەشە ادام جاراقاتتاندى
نۇر-سۇلتان. قازاقپارات - كولۋمبيانىڭ سولتۇستىك شىعىسىندا مەرەكەلىك كونسەرت كەزىندە گراناتا جارىلىپ، كەم دەگەندە جەتى ادام زارداپ شەككەن.
بۇل تۋرالى جەكسەنبىدە El Tiempo باسىلىمى حابارلادى.
گازەتتىڭ دەرەگى بويىنشا، كەلەڭسىز جاعداي جەكسەنبى كۇنى تەوراما قالاسىندا تاڭ اتار كەزدە (نورتە-دە-سانتاندەر دەپارتامەنتى) بولعان.
مۋنيتسيپاليتەتتىڭ 207 جىلدىعىنا ارنالعان كونسەرتتە بەلگىسىز بىرەۋ جينالعان توپقا گراناتا لاقتىرعان. سالدارىنان ەكى اسكەري قىزمەتشى جانە بەس ازامات جاراقاتتانعان.
ولاردىڭ ءبارى جاقىن ماڭداعى اۋرۋحاناعا جەتكىزىلدى. جەرگىلىكتى بيلىك وقىس وقيعانىڭ سەبەپ-سالدارىن تەكسەرۋگە كىرىستى.