ەلورداداعى مۇستافا كەمال اتاتۇرىكتىڭ ەسكەرتكىشىنە گۇل شوقتارى قويىلدى

نۇر- سۇلتان. قازاقپارات - بۇگىن ەلوردادا تۇركيا رەسپۋبليكاسىنىڭ نەگىزىن قالاۋشى ۇلى قايراتكەر مۇستافا كەمال اتاتۇرىكتىڭ ەسكەرتكىشىنە گۇل شوقتارى قويىلدى، دەپ حابارلايدى قازاقپارات ءتىلشىسى.

بۇل شاراعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، تۇركيانىڭ قازاقستانداعى توتەنشە جانە وكىلەتتى ەلشىسى نيەۆزات ۋيانىك، سونداي- اق باسقا دا ۇيىمداردىڭ وكىلدەرى قاتىستى.

ايتا كەتسەك، بۇگىن تۇركياداعى مۇستافا كەمال اتاتۇرىك باستاعان ۇلت- ازاتتىق كۇرەستىڭ باستالۋىنا 100 جىل تولدى.

 1919 -جىلدىڭ 19 - مامىرىندا مۇستافا كەمال سامسۋنعا ينسپەكتور رەتىندە اتتانىپ، سول جىلدىڭ جازىندا- اق وداقتاس ەلدەردىڭ باسقىنشىلىعىنا قارسى تۇرىكتەردىڭ ۇلت- ازاتتىق كوتەرىلىسىن باستادى. وسمان يمپەرياسىنىڭ ءبىرىنشى دۇنيەجۇزىلىك سوعىستا جەڭىلىس تاۋىپ، ىستانبۇل انتانتا وداعىنىڭ قولىنا ءوتىپ، كاپيتۋلياتسيا شارتى بويىنشا ەل ارمياسى تولىق تاراتىلىپ، قارۋسىزدانىپ جاتقان شاق بولاتىن بۇل. تۇرىك تاۋەلسىزدىگىنە ءقاۋىپ تونگەنىن جار سالىپ، وسمان ارمياسى قاتارىنان كەتكەن اتاتۇرىكتى ەل قولداعانىمەن، سۇلتان بيلىگى اياقتان شالىپ، ءتىپتى سىرتىنان ءولىم جازاسىنا كەسەدى. انتانتا ۇشتىگىنىڭ كاپيتۋلياتسيا شارتىن جەلەۋ ەتىپ تىزەگە سالۋى دا جاڭا باعىتقا بەت بۇرعان تۇرىك جۇرتىنا اۋىر ءتيدى.

تاۋەلسىزدىك ءۇشىن ۇلتتىق قوزعالىستىڭ نەگىزىن جاستار قۇراعاندىقتان، 1938 -جىلدىڭ 20 - ماۋسىمى كۇنى 19 - مامىردى جاستار جانە سپورت كۇنى رەتىندە بەلگىلەۋ تۋرالى زاڭ شىقتى.

بۇدان بۇرىن حابارلانعانداي، حالىقارالىق تۇركى اكادەمياسى تۇركياداعى مۇستافا كەمال اتاتۇرىك باستاعان ۇلت- ازاتتىق كۇرەستىڭ 100 جىلدىعىنا ارناپ اۋقىمدى شارا وتكىزدى.

2009 -جىلدىڭ قازان ايىندا ەلباسى نۇرسۇلتان نازاربايەۆتىڭ قاتىسۋىمەن استانادا تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرىككە ارنالعان ەسكەرتكىش اشىلعان ەدى.

مۇستافا كەمال اتاتۇرىكتىڭ ەسكەرتكىشى ج. تاشەنوۆ كوشەسى بويىنداعى ساياباقتا ورناتىلعان. قولادان جاسالعان ەسكەرتكىشتىڭ تۇعىرى گرانيتتەن قالانعان. بيىكتىگى 4,4 مەتر، سالماعى 5,5 توننا.

اۆتور: رۋسلان عابباسوۆ