كوزدىڭ كورۋ قابىلەتىن قالاي جاقسارتۋعا بولادى؟

None
None
 نۇر-سۇلتان. قازاقپارات - قىستان جازعا وتپەلى كەزەڭدە ادامنىڭ كوبى كوز كورۋىنىڭ السىرەگەنىن جانە كوزدىڭ قۇرعاقتانىپ، كوزگە قۇم تۇسكەندەي سەزىم پايدا بولعانىن بايقايدى. بۇعان كورۋ اعزالارىنىڭ قالىپتى جۇمىس ىستەۋىنە قاجەتتى بولعان دارۋمەندەردى از تۇتىنۋ سەبەپ بولۋى مۇمكىن.

سونداي-اق كوز جىتىلىگىنىڭ قايتا قالپىنا كەلەتىن تومەندەۋى مەن فۋنكتسيونالدى وزگەرىسىن ورگانيكالىق وزگەرىستەردەن اجىراتىپ العان ماڭىزدى. بۇل ماسەلەمەن كوز دارىگەرى اينالىسادى.

كورۋ قابىلەتىنىڭ جەتكىلىكسىزدىگىنە نە سەبەپ بولۋى مۇمكىن؟

كوكتەمدە ءبىزدىڭ كليماتتىق بەلدەۋدە كوكونىس پەن جەمىس-جيدەك از بولۋ سەبەبىنەن تۇتىنۋ دەڭگەيى تومەندەپ كەتەدى. سوندىقتان كوزدىڭ كورۋ قابىلەتىنىڭ ناشارلاۋىنىڭ ەڭ باستى سەبەبى اۆيتامينوز بەن گيپوۆيتامينوز بولۋى مۇمكىن. بۇل جاعداي ا توبى دارۋمەننىنىڭ ازايىپ، كوزدىڭ شىرىشتى قابىعىنىڭ قاجەتتى تۇردە ىلعالدانباۋ سەبەبىنەن كوزدىڭ قۇرعاقتانىپ كەتۋىنەن دە بولۋى مۇمكىن.

بۇل جاعدايدا ىمىرتتىق كورۋ قابىلەتى مەن كونتراست جانە ايقىن كورۋ دەڭگەيى تومەندەۋى مۇمكىن. كۇننىڭ العاشقى جارتىسىندا كوزدىڭ كورۋ قابىلەتى جاقسى بولىپ، ەكىنشى جارتىسىندا ناشارلاعانىن بايقاۋعا بولادى. جاساندى جىلىتىلاتىن ورىنداردا دا كوزدىڭ قۇرعاقتانىپ، قىزارىپ كەتۋى ءجيى بايقالادى. بۇل كەزدە دالاداعى اۋا تەمپەراتۋراسىنىڭ جوعارىلاۋىنان ىشتەگى اۋا جىلىراق جانە قۇرعاعىراق بولىپ، كوزدىڭ قوسىمشا قۇرعاقتانا تۇسۋىنە اسەرىن تيگىزەدى.

ەگەر كوزدىڭ كورۋى ناشارلاپ، كوزىڭىز كوبىرەك قۇرعاقتانىپ، قىزارىپ، سونداي- اق جايسىزدىق پەن قۇم تۇرعان سەزىم بار بولسا، ونىڭ سەبەبى كونيۋكتيۆتىڭ قابىنۋى دا بولۋى مۇمكىن. ەگەر دە پاتسيەنتتىڭ كوزىنە تەرىسكەن شىقسا، بۇل دا كوكتەمگى گيپوۆيتامينوزدىڭ نىشانى بولۋى ىقتيمال.

شۋاقتى كۇندەردىڭ سانى كوبەيگەندە ۋلتراكۇلگىن دەڭگەيى ارتىپ كەتەدى، سونداي- اق ادامدار دا كۇن كوزىندە كوبىرەك جۇرۋگە تىرىسادى. بۇل ءبىر جاعىنان كوزدىڭ ىشكى تور قابىعىنىڭ كونتراستتىق سەزىمتالدىعىن تومەندەتۋى مۇمكىن، سونداي-اق اللەرگيالىق رەاكتسيالاردى (كۇنگە عانا ەمەس، ەندى پايدا بولا باستاعان وسىمدىك توزاڭىنا دا) كوبەيتىپ جىبەرىپ، كوزدى قۇرعاقتاندىرىرۋى ءارى جايسىزدىققا ۇرىندىرۋى مۇمكىن.

جوعارىدا ءتىزىلىپ شىققاننىڭ ءبارى فۋنكسيونالدى جانە قايتا قالپىنا كەلتىرۋگە بولاتىن وزگەرىستەر بولىپ سانالادى. ءبىراق كوزگە اق ءتۇسۋ (كاتاراكتا)، كوز تورى ديستروفياسى، تامىر اۋرۋلارى، قانت ديابەتى ت. ب. كەسەلدەر سياقتى كورۋ قابىلەتىنىڭ ناشارلاۋ سەبەپتەرىنىڭ ورگانيكالىق تۇرلەرى دە بار.

كورۋ قابىلەتىنىڭ ناشارلاۋ سەبەپتەرىن قالاي انىقتاۋعا بولادى؟

كورۋ قابىلەتىنىڭ ناشارلاۋى - ءاربىر ناقتى جاعدايدا جەكە-جەكە ەمدەۋ قاجەت بولاتىن كوپ تارالعان پروبلەما. كوز بولاتىنىڭ تايۋىنا اكەلىپ سوققان سەبەپتەردى دارىگەر- وكۋليست ايقىندايدى. بۇل سەبەپتەردىڭ قايتا قالپىنا كەلەتىن نەمەسە ورگانيكالىق پاتولوگيامەن بايلانىستى ەكەنىن انىقتايتىن دا سول دارىگەر. گيپوۆيتامينوزدى جانە باسقا پروبلەمالاردى دياگنوستيكالاۋدىڭ ەكسپرەسس-ادىستەرى جوق. دارىگەر كوزدىڭ كورۋ قابىلەتىن تەكسەرىپ، كوز الماسىن سىرتتاي قاراپ كورەدى جانە كوز ءتۇبىن تەكسەرىپ شىعادى.

تولىقتاي قاراپ تەكسەرىپ شىققان دارىگەر ەمدەۋ ءتۇرىن بەلگىلەيدى. ەگەر جاعداي قايتا قالپىنا كەلەتىن بولسا، ول ىشەتىن دارۋمەندەردى بەلگىلەيدى، سونداي-اق راتسيونداعى A، E دارۋمەندەرىنە، مىرىشقا، سەلەنگە، مىسقا (نەگىزگى انتيوكسيدانتتار)، نەگىزگى كاروتينويدتەر - ليۋتەين مەن زەاكسانتينگە (كوز تورىنىڭ تروفيكاسىن جاقسارتۋعا سەپ بولىپ، كورۋ اكتىنە شىعىندالىپ جاتقان قاجەتتى ميكروەلەمەنتتەرمەن كوز تورىن بايىتادى) باي ازىق- تۇلىك مولشەرىن ارتتىرۋ ءۇشىن تاماقتانۋ جونىنەن اقىل-كەڭەستەرىن بەرەدى. ەگەر دە كوزدىڭ كورۋ قابىلەتىنىڭ ناشارلاۋ سەبەبى ورگانيكالىق وزگەرىستەرمەن بايلانىستى بولسا، كورۋ قابىلەتىنە اسەرىن تيگىزىپ جاتقان اۋرۋعا بايلانىستى ەمدەۋ ءتۇرى بەلگىلەنەدى.

كورۋ قابىلەتىن جاقسارتۋ ءۇشىن قالاي تاماقتانۋ كەرەك؟

 كوكتەمگى مەزگىلدە كورۋ قابىلەتىن ساقتاۋ ءۇشىن مىنا ازىق تۇرلەرى راتسيونىڭىزدان كوپتەپ تابىلعانى ابزال:

- قۇرامىندا ليۋتەين جانە زەاكسەتين كاروتينويدتەرى بار قىزىل، سارى، قىزعىلت سارى ءتۇستى تاعام تۇرلەرى: ءسابىز، اسقاباق، قىزىل ءجۇزىم، قاراجيدەك، سيترۋس ونىمدەرى، ورىك (كەپتىرىلگەن ورىكتە تامىرلاردىڭ جۇمىسىنا جاقسى اسەر ەتەتىن كالي مول)؛

- جاسىل ءتۇستى ونىمدەر: اسجاپىراق (شپينات)، بروككولي، بريۋسسەلدىك قىرىققابات، اقتىق (سپارجا) ، شالقان، بۇرشاق؛

- التىنعا باي بولعاندىقتان ءتۇسى سارى بولىپ كەلەتىن جۇگەرى؛

- س دارۋمەنىنىڭ مولشەرى مول كوكونىس پەن جەمىس-جيدەك: اقباس قىرىققابات، تسيترۋس جەمىستەرى. ولار تامىر تروفيكاسىن جانە تامىر قابىرعاسىنىڭ زات الماسۋىن جاقسارتادى، تامىر يكەمدىرەك، سىنعاقتىق دەڭگەيى تومەن بولىپ، كوز الماسىن جاقسىراق قورەكتەندىرەدى. بۇل ونىمدەردىڭ كوزگە قان قۇيىلۋىنىڭ الدىن الاتىن قاسيەتى بار.

- بالىق، تەڭىز ونىمدەرى: قىزىل بالىق، مايشاباق، سكۋمبريا. بالىقتىڭ قۇرامىندا كوز تورى مەن كوز الماسىنىڭ شىرىشتى قاباتىن قورعايتىن قاسيەتى بار ومەگا 3, شالا قانىققان ماي قىشقىلدارى مول.

- جاڭعاق تۇرلەرى: بادام، پىستە، ورمان جاڭعاعى، گرەك جاڭعاعى، جەرجاڭعاق. بۇل ە دارۋمەنىنىڭ - كوز تورىن ۋلتراكۇلگىن ساۋلەنىڭ زياندى اسەرىنەن قورعايتىن انتيوكسيدانتتىڭ قاينار كوزى؛

- قاباق تەرىسى مەن بەت تەرىسىنىڭ زات الماسۋىنا جاقسى اسەر ەتەتىن جانە مايبەزىنىڭ جانە كىرپىكتىڭ تۇكتى فولليكۋلدارىنىڭ جۇمىسىن رەتتەپ وتىراتىن B دارۋمەندەرى توبىنىڭ مول مولشەرى بار ءداندى داقىلدار (تازارتىلماعان ءدان)؛

- قىزىل ءجۇزىم، قىزىل ءجۇزىم سىعىندىسى - انتوتسيانداردىڭ - تامىر جۇمىسىن ۇيلەستىرىپ، كوز تورى ديستروفياسىنىڭ پايدا بولۋى ىقتيمالدىعىن ازايتاتىن زاتتاردىڭ مولشەرى كوپ؛

- ءجۇزىم دانەگىنەن الىناتىن ماي، ءزايتۇن مايى؛

- قارا شوكولاد - قۇرامىندا فلاۆونويدتەر - تامىر تروفيكاسىنا جاقسى اسەرى بار زاتتار؛

- باۋىر، جۇمىرتقا، قىزىل ەت.

سوڭعى جاڭالىقتار