تويوتا تاريحى: توقىما ستانوكتىڭ ورنىن كولىككە الماستىرۋ - فوتو
بۇل برەندتىڭ تاريحى ينجەنەر، ونەرتابىسشى سونىمەن قاتار بيزنەسمەن ساكيچي تويودانىڭ Toyoda Enterprise كومپانياسىن قۇرعان ۋاقىتىنان، ياعني 19 -عاسىردان باستاۋ الىپ جاتىر. دەگەنمەن، زامانداستارى «ەكىنشى توماس ەديسون» جانە «جاپون ونەرتابىسشىلارىنىڭ پاتشاسى» دەپ اتاپ كەتكەن ادامدى «جاي عانا ينجەنەر» نەمەسە «جاي عانا ونەرتابىسشى» دەۋ - ونى مەنسىنبەۋ بولماق.
ساكيچي تويودا - Toyoda Enterprise كومپانياسىنىڭ قۇرۋشىسى، «جاپون ەديسونى»
ساكيچي 1867 -جىلى اقپاننىڭ 14 -كۇنى كەدەي اعاش ۇستاسىنىڭ وتباسىندا دۇنيە ەسىگىن اشتى. ول كەزدە جاپونيا مودەرنيزاتسيانىڭ اۋىرتپالى ءداۋىرىن باستان وتكەرىپ جاتقان ەدى، ال شيزۋوكا پروۆينتسياسىنداعى شاعىن عانا كەدەي اۋىلدا تۇرعان ساكيچي اۋىل تۇرعىندارىنىڭ قيىن ءومىرىن ءوز كوزىمەن كورىپ ءوستى. بىلايشا ايتقاندا اناسىنىڭ بەينەتى كوپ كاسىبى جاس جىگىتتى ۇلكەن ىستەرگە، ناقتىراق ايتساق - مىقتى كونسترۋكتسيالى توقىما ستانوگىن جاساپ شىعۋعا تالپىندىردى. كەيىندەرى بۇل قۇرال تويودا اۋلەتىنىڭ قارجىلىق ءال- اۋقاتىن ارتىرۋعا سەبەپ بولدى.
G-loom توقىما ستانوكتارىنىڭ پاتەنت قۇجاتتارى
ساكيچي ءوز ستانوكتارىنىڭ جانە باسقا دا قوسىمشا توقىما مەحانيزمدەرىنىڭ قۇرىلىمىن ۇنەمى جەتىلدىرىپ وتىردى، اقىر سوڭىندا «جاپوندىق ەديسوننىڭ» ازىرلەمەلەرىنە سول كەزدەگى الەمنىڭ ەڭ ءىرى توقىما مانۋفاكتۋراسى - ۇلى بريتانيالىق Platt Brother جانە Co فيرماسى قىزىعۋشىلىق تانىتتى. اعىلشىندار ستانوكقا بەرىلگەن پاتەنتتىك قۇقىقتى ساتىپ الۋدى ۇيعارادى، ال ساكيچي تويودانىڭ ۇلى - كييچيدو سايكەستى شارتتاماعا قول قويۋ جانە باسقا قۇجاتتاردى راسىمدەۋ ءۇشىن ا ق ش ارقىلى انگلياعا ساپار شەكتى.
ال مىناۋ سول توقىما ستانوگى، بۇلسىز Toyota كولىكتەرى بولماس پا ەدى...
سوعىس الدىنداعى 1930 -جىلدار ەدى، ال جاپونيا يندۋستريالدىق ەلدەن گورى ءالى اگرارلىق ەل بولاتىن. الايدا، ءور ماقساتتى مەن پىسىقتىعى بار كييچيرو بۇل جاعدايدى وزگەرتۋگە دەن قويدى. ول دا 20 -عاسىردىڭ العاشقى جارتىسىندا ءومىر سۇرگەن كوپتەگەن جاستارداي اۆتوموبيل دەسە ىشكەن اسىن جەرگە قوياتىن، سوندىقتان كىشى تويودا دامىعان ەلدەردىڭ اۆتوموبيل ءوندىرىسىن ءوز كوزىمەن كورۋ مۇمكىندىگىن بارىنشا پايدالانىپ قالۋعا تىرىستى. شەتەلدى ارالاپ قايتىپ كەلگەن كييچيرو اۋلەتىنىڭ داۋلەتىن اسىرعان توقىما ستانوكتارىن مۇلدەم ويىنان الاستادى - ەندى ونىڭ ساناسىن اۆتوموبيل جاۋلاپ الدى.
ساكيچي تويودانىڭ ۇلى - كييچيرو تويودا، Toyota كولىكتەرىنە باستاما بەرگەن كىسى.
العاشقى قادامدار
ەڭ اۋەلى جاڭا باستامانىڭ ءجوندى بولاتىنىنا اكەسىن كوندىرۋ قاجەت بولدى. ورايى كەلىپ، ساچيدي تويودا جاپونيا ءۇشىن جاڭا بيزنەس سانالعان سالدا باعىن سىناپ كورۋىن ماقۇلدادى. ءسويتىپ، اكەسىنىڭ كونتسەرنىنىڭ قولداۋىنا يە بولعان كييچيرو جاڭا شارۋاعا ەرەكشە قۇلشىنىپ كىرىسىپ كەتتى.
Toyota اا - Toyota-نىڭ سەريالىق تۇردە شىعارىلا باستاعان العاشقى جەڭىل كولىگى.
ءبىرىنشى Toyota-نىڭ - ا1 يندەكسى بەرىلگەن ءتورت ەسىكتى سەداننىڭ پروتوتيپىن - 1936 -جىلى جاساپ قۇراي باستاپ، جارتى جىلدان سوڭ ماشينا دايىن بولدى. بۇرىن كولىك وندىرىسىنە قاتىسى بولماعان فيرما ءۇشىن بۇل وتە از مەرزىم. دەگەنمەن، بۇنداي جىلدامدىقتى ا1-دىڭ كوپ جەرىن امەريكالىق برەندتتەردەن كورىپ العان ستاندارتتى شەشىمدەردەن قاراپ جاسالعانىمەن تۇسىندىرۋگە بولادى.
شاسسيدىڭ كونسترۋكسياسىن، سونداي-اق بەرىلىس قورابى (كوروبكا پەرەداچ) 3,4 ليترلىك التى ءتسيليندرلى موتوردى دا Chevrolet-دەن كوشىرىپ الدى، ال شاناق Chrysler Airflow-دىڭ كىشىرەيتىلگەن نۇسقاسىنداي كورىنەتىن.
Toyota-نىڭ العاشقى جۇك كولىگى، 1935 -جىلعى G1 مودەلى.
تاڭقالارلىق ەشتەڭە جوق. 30-جىلدار مەجەسى بويىنشا ەڭ وزىق اەروديناميكالىق سەداندى كييچيرو ىجداھاتتى جاپون ينجەنەرلەرى ءار بۇرانداسىنا دەيىن بولشەكتەپ، قالاي ىستەيتىنىن ءبىلىپ الۋى ءۇشىن شتاتتاردان ارنايى الدىرعان ەدى. ونىڭ ۇستىنە Airflow-دىڭ سىرتقى كورىنىسى زاماناۋي بولىپ، جاپوندار ەشتەڭەنى وزگەرتپەۋدى ۇيعاردى. كىشىرەيتىلگەن ماسشتابىنان باسقا جالعىز وزگەشەلىك فارالارى عانا بولدى - امەريكالىق ماشينادا ولار الدىڭعى قاناتپەن بىرىكتىرىلگەن بولاتىن، جاپوندىق كوشىرمەسىندە وپتيكا بۇرىنعىشا قاناتتىڭ ۇستىنە ورناتىلدى.
Toyota Motor Corporation-نىڭ العاشقى وفيسى.
قۇراستىرىلعان ا1 پروتوتيپىنىڭ ۇزىن سانى ۇشەۋ عانا بولىپ، ولاردىڭ ءبىرىن ءتىپتى بۋددا سالتتارىنا ساي باتا بەرىپ، «جولىن اشتى». كييچيرو جاڭا كولىگىمەن العاشقى ساپارىن ءبىراز ۋاقىت بۇرىن قايتىس بولىپ كەتكەن اكەسىنىڭ بەيىتىنە جاساعانىنىڭ سيمۆوليكالىق ءمانى بار. ال ءبىر جىل وتكەن سوڭ وعان بارابار دەرلىك اا مودەلى سەريالىق تۇردە شىعارىلا باستادى.
كورومو زاۋىتىنداعى سەحتاردىڭ فوتولارى مەن سىزبالارى.
ءوندىرىس كورومو دەپ اتالاتىن جەردە سالىنعان سۋ جاڭا زاۋىتتا باستالدى (ءبىرىنشى «تويوتالىق» زاۋىت سالىنعان ەلدى مەكەن مەن ونىڭ توڭىرەگىن قازىر Toyota city دەپ اتايدى). باستاپقىدا اۆتوموبيلدەر Toyoda دەگەن اتاۋ بەرىلىپ ساتىلىپ جاتتى، ءبىراق ول اتاۋ كييچيرونىڭ كوڭىلىنەن شىعا قويمادى. ول ءوزىنىڭ تەگىنەن ۇيالعان ەمەس.
الايدا، Toyoda-نى جاپون تىلىنەن سوزبە ءسوز ءتارجىمالاسا «شۇرايلى كۇرىش القابى» دەگەندى بىلدىرەدى. اگرارلىق اتاۋ برەندتىڭ جاڭا ونىمىنە ساي كەلە قويمادى دا، كييچيرو جاڭا اتاۋعا بايقاۋ جاريالادى. 20 مىڭنان اسا ۇسىنىستى قاراپ شىققان اۋلەت بۇگىنگى تاڭدا بارشاعا تانىس Toyota نۇسقاسىن تاڭداپ الدى - بۇل اتاۋدا ايقىن كورىنىپ تۇرعان اتا تەگىمەن ساباقتاستىق بار، «شۇرايلى القاپپەن» بايلانىس جوق، سونداي- اق ءسوزدىڭ ءوزى ەستە تەز ساقتالىپ قالادى جانە دۇنيە جۇزىندەگى ءار ءتۇرلى تىلدەردە جاقسى ايتىلادى.
Toyota AA سەداندارىن قۇراستىرۋ سەحى.
Toyota Motor Corporation رەسمي تۇردە 1937 -جىلعى تامىزدىڭ 28 -كۇنى - ۋاقىتشا Toyoda Enterprise قۇرامىنداعى ەنشىلەس كومپانيا رەتىندە تىركەلدى. ال فيرمانىڭ العاشقى زاۋىتىنداعى ءوندىرىس سول جىلى قاراشا ايىندا باستالدى. وسى سالتاناتتى ءساتتى جاپون برەندىنىڭ تۋعان كۇنى دەپ بىلسەك بولادى.
فالستارت جانە قايتادان باستاۋ
دەيتۇرعانمەن، ەكىنشى دۇنيەجۇزىلىك سوعىسقا دەيىن Toyota-نىڭ كولىك ءوندىرىسى قانات جايىپ كەتە المادى. 1943 -جىلعا دەيىن كومپانيا نەبارى 1404 دانا اا سەدانىن جانە سونىڭ نەگىزىندە جاسالعان 353 دانا اۆ مودەلدى كابريولەتىن شىعاردى. بۇعان Toyota اا مودەلىنىڭ ازداپ وزگەرتىلگەن موتورى كۇشتىرەك 115 دانا Toyota AC سەدانىن قوسقان كۇننىڭ وزىندە ءوندىرىس اۋقىمى كوڭىلدەن شىعا قويمايدى.
امەريكالىق Wyllis MB- تىڭ انالوگى - Toyota AK10
ءبىراق، الەمدىك قاندى جانجال جىلدارىندا Toyota فابريكالىق قۋاتى نەگىزىنەن اسكەري قاجەتتىلىكتەردى وتەپ وتىرعانىن ەستەن شىعارمايىق - كوروموداعى كاسىپورىندا اسكەري جۇك كولىكتەرى مەن امفيبيالار، جول تالعامايتىن بارلاۋعا ارنالعان جەڭىل كولىكتەر، اسكەري ۇشاقتاردىڭ كومپونەنتتەرى شىعارىلدى.
اسكەري ونىمدەرى.
Toyota Motor Corporation جولى بولىپ، اسكەري قيمىلدار ناتيجەسىندە زاۋىتقا ەش نۇقسان كەلمەدى، دەگەنمەن، كومپانيانىڭ 1945 -جىلعى كۇزدەگى جاعدايى ءماز ەمەس ەدى. ءبىراق ايىرىلىپ قالۋعا ەتتەرى ۇيرەنىپ كەتكەن جاپوندىقتار مويىعان جوق. زاۋىت قىزمەتكەرلەرى ىرگەلەس جاتقان اۋماقتارعا ءداندى داقىلداردى ءوسىرۋدى ۇيرەنىپ الدى، ال اسكەري ونىمدەردى تەز ارادا بەيبىت ءومىر قاجەتتىلىكتەرىنە بەيىمدەدى. ءبىر كەزدەرى Toyota Motor Corporation تسەحتارىندا ۇشاقتاردى قۇراستىراتىن بولشەكتەردەن قازاندار مەن قۇرال- سايمانداردى دا جاسادى - مىنە، كونۆەرسيانىڭ جاپوندىق نۇسقاسى.
اسكەري ونىمدەرى.
سولاي بولا تۇرا كييچيرو تويودا نەگىزگى بيزنەس- باعىتىنان، ياعني ءوزىنىڭ اۆتوموبيلدەرىن شىعارۋدان اينىعان جوق. بۇعان قوسا 1945 -جىلعى قازان ايىندا-اق، ياعني جاپونيانىڭ كاپيتۋلياتسياسىنان ءبىر اي وتكەن كەزدە، Toyota ينجەنەرلەرى جاڭا مودەلدىڭ سىزبالارىنا كىرىستى.
سوعىس جىلدارىنان كەيىنگى العاشقى Toyota - 1947 -جىلعى ەكى ەسىكتى سەدان SA.
سوعىستان كەيىنگى قيىن جاعدايدى ەسكەرسەك، اڭگىمە بارىنشا جۇپىنى، قاراپايىم جانە ارزانقول كولىك جايىندا بولاتىنى تۇسىنىكتى. سوعىستان كەيىن شىققان ءبىرىنشى Toyota - 4 ءتسيليندرلى 1 ليترلىك موتورى بار SA ەكى ەسىكتى سەدانى - Beetle دەگەن اتپەن كوبىرەك تانىمال Volkswagen Type 1 مودەلىنە سىرتتاي قاتتى ۇقسادى.
سىرتقى كورىنىسى عانا ەمەس - جاپون اۆتوموبيلىندە ءبىرىنشى رەت قولدانىلعان جونارقالى رامادان دا ول كولىكپەن تۋىستىق بايلانىسى كورىنىپ تۇردى. وسىلاي بولسا دا، Toyopet، ياعني «تويوتا-بالاقاي» دەگەن ەركە اتاقا يە بولعان Toyota SA مودەلىن جاپونداردىڭ دەربەس تۋىندىسى دەۋگە بولادى. بۇنى مودەلدىڭ موتورى ارتىنا ورناتىلماي، كلاسسيكالىق تۇردە ورنالاسۋىنان- اق بىلۋگە بولادى. از سەريالى SA 1947 -جىلى قازاندا شىعارىلا باستادى، ال Toyopet كومپانيانىڭ بىرنەشە سەريالىق مودەلدەرىنىڭ نەگىزى بولىپ قانا قويماي، جاپوندار ءۇشىن اۆتوموبيل نارىعىنىڭ ساپالى جاعىنا شىعۋ ءۇشىن اشىلعان ەسىك بولاتىن.
جىلدام پويىزبەن جارىسقان SA - جارناما اكسياسى.
بۇل كەزگە دەيىن، جەرگىلىكتى باسقا دا اۆتووندىرۋشىلەر سياقتى، Toyota كولەمى وتە شەكتەۋلى جانە اقشاسى از جەرگىلىكتى نارىققا يەك ارتۋعا ءماجبۇر بولىپ كەلدى. باسقا امالى جوق تا ەدى - وتكەن عاسىردىڭ 50-جىلدارى قارساڭىندا كۇنشىعىس ەلىنەن تىس جەرلەردە «جاپون ءاۆتوموبيلى» دەگەن ءسوز تىركەسى «حوككەيدەن برازيليا قۇراماسى» دەگەن سوزدەي كۇلكىلى ەستىلەتىن. دەگەنمەن، جاعدايدىڭ جاقسارۋىنىڭ - الدەقايدا! جاقسارۋىنىڭ! - اۋىلى كورىنىپ تە قالعان ەدى.
بارىنەن جوعارى
قازىرگى كۇندەرى جاپوندىق ءاۆتوموبيلدى «ساپالى ءونىم» ۇعىمىنىڭ سينونيمى رەتىندە قولدانۋعا بولادى، ءبىراق ءارقاشان بۇلاي بولا بەرگەن جوق. Toyota سول كەزدەرى جاپپاي ساپا مەن ءوندىرىس تيىمدىلىگىن ارتتىرۋ شارالارىن باستادى.
كورومودا زاۋىتتى سالۋ كەزىندە كييچيرو تويودا كولىكتى قۇراستىرۋعا قاجەتتى اۆتوكومپونەنتتەردى قويمالارعا اپارماستان، تۋرا كونۆەيەرگە جەتكىزىپ وتىراتىن Just-in-Time ءادىسىن قولدانۋدى جوسپارلاعان بولاتىن. ءبىراق، 30-جىلدارى بۇل ويلاعانى ىسكە اسپادى - سالىستىرمالى تۇردە از كولەمدى ءوندىرىس ايرىقشا يننوۆاتسيالاردى قاجەت ەتپەدى. الايدا، سوعىستان كەيىن، ماشينا شىعارۋ كولەمى ارتقان كەزدە، Just-in-Time ادىستەمەسى قايتا جاڭعىرتىلدى.
Toyota BJ
البەتتە، تويودا بۇرىن بولماعان نارسەنى ويلاپ تاپقان جوق - قۇرامداس بولشەكتەردى قۇراستىرۋ ورنىنا جەتكىزىپ تۇرۋ 10-20- جىلدارى-اق فوردتىڭ زاۋىتتارىندا قولدانىلدى. الايدا جاپوندار بۇل قاراپايىم ۇدەرىستى جەتىلدىرىپ، شىڭىنا جەتكىزدى. بۇل ىلەسپە شىعىنداردى ازايتۋ مەن ءوندىرىس تيىمدىلىگىن ارتتىرۋ ساياساتىنداعى العاشقى قادام عانا بولاتىن. كەلەسىسى برەندتىڭ توقىمالىق وتكەن شاعىنان الىنعان قاراپايىم، ءبىراق وتە ۇتىمدى ءتاسىل بولدى.
تايچي ونو - «دجيدوكا» - نىڭ اكەسى.
50-جىلداردىڭ باسىندا كوروماداعى زاۋىتتىڭ اۆتوموبيلدەردى تۇپكىلىكتى قۇراستىرىپ شىعۋ سەحىنىڭ باسشىسى تايچي ونو كومپانيانىڭ ءجۇن ءيىرۋ ماشينالارىنىڭ تاعى ءبىر ەرەكشەلىگىن ەسىنە ءتۇسىردى - ءجىپ ءۇزىلىپ كەتسە، ولار وزدىگىنەن توقتاپ قالاتىن. بۇل اقاۋلى ماتانىڭ كولەمىن ەداۋىر ازايتۋعا مۇمكىندىك بەرەتىن. ارينە، اۆتوموبيل قۇراستىرىلاتىن كونۆەيەر توقىما ستانوگى ەمەس - ول كەزدە كونۆەيەر ءىشىنارا عانا اۆتوماتتاندىرىلعان بولاتىن جانە قول ەڭبەگى بارىنشا قولدانىلاتىن.
الايدا تايچي «توقىما سالاسىنىڭ ەرەكشەلىگىن» اۆتووندىرىستە قولدانۋدىڭ امالىن تاپتى. ول ۇسىنعان جاپون تىلىنەن اۋدارعاندا «ادامي ءجۇزدى اۆتوماتيكا» دەگەنگە ساياتىن jidoka قاعيداتى زاۋىتتىڭ ءاربىر جۇمىسشىسىنىڭ اسقان جاۋاپكەرشىلىگىن بىلدىرەدى. ەگەر جۇمىسشى اقاۋلى دەتالدى نەمەسە دۇرىس ورناتىلماعان كومپونەنتتى بايقاپ قالسا، ول «اندون» دەپ اتالىپ كەتكەن ارنايى باۋدى تارتىپ قالىپ كونۆەيەرلىك لەنتانى توقتاتا الاتىن، ءتىپتى ول وسىلاي ىستەۋگە مىندەتتى بولاتىن. وسىلايشا اقاۋ ءوندىرىستىڭ باستاپقى كەزەڭىندە انىقتالىپ، ونى جويۋعا ۋاقىت جانە قاراجات شىعىنى مەيلىنشە از كەتەتىن.
سول جاعىندا 60 -جىلدارداعى كونۆەيەر - ادامدارى بار... وڭ جاعىندا بۇگىنگى - ادام جوق، تەك روبوتتار.
Just-in-Time جۇمىس قاعيداتىن الىڭىز دا، ونى «دجيدوكامەن» ارالاستىرىڭىز، بۇعان Toyota-نىڭ ايرىقشا بەلگىسىنە اينالعان فيرما قىزمەتكەرلەرىنىڭ ءوندىرىستى ۇدايى جەتىلدىرىپ جانە وڭتايلاندىپ وتىرۋ جونىندەگى ۇسىنىستارىن قوسىڭىز، سوندا بارىپ ءسىز بۇل ماركالى اۆتوموبيلدەردىڭ ساپاسىنىڭ تەز ارادا ەسەلەپ ارتقانىن جانە «جاپون ساپاسى» ءسوزىنىڭ بۇيىمدى الۋ ءۇشىن جەتكىلىكتى سيپاتتاما بولىپ كەتكەنىن تۇسىنەسىز.
بارلىق شەپپەن شابۋىلداۋ
ايگىلى «تويوتالىق» ساپا جاڭادان قالىپتاسۋ بارىسىندا بولعان كەزدىڭ وزىندە جاپوندار الەمدىك ءاۆتووندىرىس ليدەرلەرىن قۋىپ جەتۋ، مۇمكىن بولسا باسىپ وزۋ ءۇشىن شەتەل نارىقتارىن يگەرۋ قاجەت ەكەنىن ءتۇسىندى. بەينەلى تۇردە ايتساق، جاپوندار ءجۇزىپ ۇيرەنۋ ءۇشىن باقا جۇرگەن كولشىكتە ەمەس اشىق تەڭىزدە ۇيرەنۋ كەرەك دەپ ۇيعاردى. باتىل قادام با؟ ءيا. قاۋىپتى مە؟ ولسىز بولمايدى. ەسەسىنە، تابىسقا جەتسە، ناتيجە دە كەرەمەت بولار ەدى...
ەۆروپا نارىعىنا شىعۋ دات نارىعىنان باستالعان.
1957 -جىلى- اق Toyota جاپونيانىڭ اۆتوموبيل شىعاراتىن كومپانيالارى ىشىندە العاشقى بولىپ ا ق ش- دا ءوزىنىڭ فيليالىن ۇيىمداستىرۋدى ۇيعاردى. قىركۇيەك ايىندا جەرگىلىكتى نارىقتى زەرتتەپ ءبىلۋ ءۇشىن ءۇش مەنەدجەردەن قۇرالعان بارلاۋشى توپ لوس- اندجەلەسكە ات باسىن تىرەدى. بارى- جوعى ەكى اي وتكەندە، قازاننىڭ 31 -كۇنى Toyota Motor Sales كومپانياسى قۇرىلدى. ەكپورتقا العاشقى بولىپ Crown سەدانى مەن Land Cruiser BJ جول تالعامايتىن كولىگى ۇسىنىلدى.
نيدەرلاندىداعى العاشقى ساتۋ ورتالىقتارىنىڭ ءبىرى.
جاپون كولىكتەرىنە امەريكالىقتاردىڭ ىنتاسى اۋا قالدى دەۋگە بولمايدى. مۇلدەم كەرىسىنشە بولدى. العاشقى تولىق ساتىلىم جىلىنىڭ قورىتىندىسى بويىنشا بارلىعى 288 ماشينا ساتىلدى. جاپونيالىق اۆتوموبيلدەر ديزاينىمەن دە، ديناميكاسىمەن دە، ابىروي- مارتەبەسىمەن دە امەريكالىقتاردىڭ كوڭىلىنەن شىعا قويعان جوق. ونىڭ ۇستىنە امەريكالىقتاردىڭ كوپشىلىگىنىڭ ويىندا كۇنشىعىس ەلى ءالى دە ەكىنشى دۇنيەجۇزىلىك سوعىستى باستاعان اگرەسسور بولاتىن. ەڭ قىزىقتىسى سول، Toyota 50-جىلداردىڭ سوڭىنداعى نارىق ترەندتەرىنە ساي بولۋعا تىرىسىپ كورگەن دە جوق، كەرىسىنشە، اككى اڭشىداي بۇعىنىپ جاتىپ، ءوزىنىڭ قولايلى ءساتىن كۇتتى.
ءسويتىپ ءجۇرىپ، سول ساتىنە دە جەتتى...
جالعىز تۇردە شىققان Toyota 2000 GT مەن دجەيمس بوند ءرولىن سومداعان شون كوننەري
اۋەلى شتتاتتاردا ەش ويلاماعان تۇستان نارىقتا وتە قولاپايسىز ءارى جانارمايدى سىمىرە بەرەتىن ماستودونت- اۆتوموبيلدەر ۇستەمدىك قۇرعان دەترويتتىق باروككو ءداۋىرى اياقتالدى. وسىلاي سەنىمدى جانە كۇي تالعامايتىن Toyota-لار العاشقى مۇمكىندىككە يە بولدى. الايدا ناعىز سەرپىلىس 70-جىلدارى، جانارماي داعدارىسى ا ق ش- عى اۆتوموبيلدىك قۇندىلىقتار شكالاسىن كۇرت وزگەرتىپ جىبەرگەن كەزدە ورىن الدى. كولىكتىڭ ۇنەمدىلىگى، سەنىمدىلىگى جانە ارزان باعاسى تۇتىنۋشى ءۇشىن ءبىرىنشى ورىنعا شىقتى دا، دەترويت زاۋىتتارى جاڭا ترەندكە يكەمدەلە الماي جاتقاندا، ساتىپ الۋشىلار Toyota-نىڭ باياعىدان بەرى ۇنەمدى، قىمبات ەمەس، ەڭ باستىسى - وتە سەنىمدى مودەلدەردى ۇسىنىپ كەلە جاتقانىن ءبىلىپ، تاڭ قالىستى.
HiLux-تىڭ العاشقى بۋىنى.
1966 -جىلدىڭ وزىندە- اق جاڭا Corona سەدانى امەريكا نارىعىندا جىلىنا 10 مىڭ دانادان ارتىق ساتىلعان ءبىرىنشى مودەل بولدى. ال 1972 -جىلعا قاراي برەندتىڭ امەريكاداعى جالپى ساتىلىمى ميلليوندىق مەجەگە جەتتى، تاعى ءۇش جىل وتكەندە Toyota امەريكاداعى ەڭ كوپ ساتىلاتىن يمپورتتىق برەندتەر ىشىندە Volkswagen-دى ىعىستىرىپ، ءبىرىنشى ورىنعا شىقتى.
جاپونداردى ەندى توقتاتۋ مۇمكىن بولمادى. وسىدان كەيىنگى ەۆروپاعا، وڭتۇستىك امەريكاعا، اۆسترالياعا، كەيىندەپ پوستكەڭەستىك ەلدەرگە جاسالعان ەكسپانسيا، جاڭا قۇراستىرۋ كاسىپورىندارى، سۋ جاڭا ليۋكس برەند Lexus-تىڭ پايدا بولۋى - وسىنىڭ ءبارى قوسىلىپ كەلىپ Toyota 2010 -جىلى جەڭىپ العان الەمنىڭ ەڭ ءىرى اۆتووندىرۋشىسى اتاعىن الدى. وسى كۇنگە دەيىن دە ءبىرتالاي مارتەبەلەرگە يە بولدى.
جاپون برەندىنىڭ تاريحى قىرۋار ەڭبەك، سان الۋان تاجىريبە مەن زەرتتەۋگە تولى، سونىڭ ارقىسىندا نانعىسىز جەتىستىككە يە بولىپ وتىر.
ەندى Toyota ەرتەڭ- بۇرسىكۇندەرى قانداي بەلەستەردى باعىندىراتىنىن ەلەستە بەرىڭىز.