ەلوردادا دۇنيەجۇزىلىك ساۋدا ورتالىعىنىڭ نەگىزى قالاندى
«بۇگىن - ەلوردا تاريحىنداعى ماڭىزدى كۇندەردىڭ ءبىرى. باس قالامىزدا دۇنيەجۇزىلىك ساۋدا ورتالىعى نەگىزىنىڭ قالانۋى - قالانىڭ ستراتەگيالىق دامۋىنىڭ ءبىر بولىگى. ەندىگى ۋاقىتتا ەكسپو اۋماعىندا جانە «استانا» حالىقارالىق قارجى ورتالىعى جانىنان تاعى ءبىر الەمدىك دەڭگەيدەگى ينۆەستيتسيالىق برەند اشىلعالى وتىر. بۇل ءوز كەزەگىندە نۇر- سۇلتان قالاسىنىڭ حالىقارالىق ينۆەستيتسيالىق ماڭىزدى ورتالىقتاردىڭ ءبىرى ەكەندىگىن بىلدىرەدى»، - دەدى ب. سۇلتانوۆ.
ءوز كەزەگىندە «Nest Investments Holdings» كومپانياسىنىڭ كورپوراتيۆتىك ينۆەستيتسيا جونىندەگى ديرەكتورى مەحران ەفتەحار ەلوردادا الەمدەگى ەڭ ءىرى ساۋدا قاۋىمداستىعىنىڭ نەگىزى قالانعانىن ايتا كەلە، وندا 90 ەلدىڭ وكىلى جۇمىس ىستەيتىنىن تىلگە تيەك ەتتى.
«دۇنيەجۇزىلىك ساۋدا ورتالىقتارىنىڭ ماقساتى - ساۋدا مەن ينۆەستيتسيانىڭ جاڭا مۇمكىندىكتەرىن قۇرۋ. ءبىز قازاقستان استاناسىنىڭ الەمدىك جوبالاردى جۇزەگە اسىراتىن ءىرى قالالاردىڭ قاتارىندا ەكەنىنە قۋانىشتىمىز. ويتكەنى، بۇل قوسىمشا جۇمىس ورنى، جاڭا ينۆەستيتسيا تارتۋ جانە زاماناۋي تەحنولوگيالاردى ادام يگىلىگىنە قولدانۋ دەگەن ءسوز. جاڭا ساۋدا ورتالىعى - قالا ەكونوميكاسىنا پايدا تۇسىرەتىن، وڭتايلى جوبا بولاتىنىنا سەنىمدىمىز»، - دەدى م. ەفتەحار.
ەسكە سالا كەتسەك، ۇستىمىزدەگى جىلدىڭ قاڭتار ايىندا ەلباسى نۇرسۇلتان نازاربايەۆ حالىقارالىق ساۋدا ورتالىقتارى قاۋىمداستىعىنىڭ باسقارما مۇشەسى (WTCA) رولف درااكپەن جانە «Nest Investments HOLDINGS» كومپانياسىنىڭ كورپوراتيۆتىك ينۆەستيتسيالار جونىندەگى ديرەكتورى مەحران ەفتەحارمەن كەزدەسىپ، ەلوردادا دۇنيەجۇزىلىك ساۋدا ورتالىعىن سالۋ جوباسىن ماقۇلداعان بولاتىن.
«ءبىز بريۋسسەلدە سىزدەردىڭ ۇسىنىستارىڭىزدى تالقىلاپ، تاعى دا كەزدەسۋ وتكىزۋ جونىندە ۋاعدالاسقان ەدىك. حالىقارالىق ساۋدا ورتالىقتارى قاۋىمداستىعىنىڭ مۇنداي جوبالاردى جۇزەگە اسىرۋ ىسىندەگى مول تاجىريبەسىن ەسكەرىپ، ءبىزدىڭ ىنتىماقتاستىعىمىز ەكى تاراپقا دا جەمىستى بولادى دەپ ويلايمىن. بۇل جوبا ەلوردامىزدىڭ كەلبەتى مەن رۋحىنا ساي كەلىپ، ونىڭ اجارىن اشا تۇسكەنىن قالار ەدىم»، - دەدى ەلباسى.