قىتاي عالىمدارى جۇرەكتى جامايتىن جەلىم ويلاپ تاپتى

 نۇر-سۇلتان. قازاقپارات - قىتاي مەن ا ق ش- تىڭ بيوحيميكتەرى جارتى مينۋتتىڭ ىشىندە جۇرەكتەگى تىلىكتەر مەن زاقىمدانعان قانتامىرلاردى جابىستىراتىن ەرەكشە گەل قۇرامىن ويلاپ تاپتى.

بۇل تۋرالى ر ي ا نوۆوستي حابارلايدى.

«قازىر قولدانىستا جۇرگەن تاسىلدەردىڭ ەشقايسىسى سوعىپ تۇرعان جۇرەكتەگى قان اعۋىن جىلدام توقتاتۋعا مۇمكىندىگى جوق. شوشقالاردىڭ جۇرەگىن جەلىمدەپ، ەكى اپتادان كەيىن كەسىپ كورگەندە ىشىنەن گەلدىڭ اعۋى نەمەسە باسقا دا قابىنۋ انىقتامادىق»، - دەدى چجەتسزيان ۋنيۆەرسيتەتىندەگى حۋنۆەي وۋيان.

وۋيان مەن ونىڭ ارىپتەستەرى ادامنىڭ بىرىكتىرۋشى ۇلپالارىن تۇزەتىن مولەكۋلالاردىڭ فيزيكالىق جانە حيميالىق قۇرامدارىن زەرتتەي وتىرىپ، ادام اعزاسى ءۇشىن زياندى ەمەس جەلىم ويلاپ تاپتى.

جەلىم جەلاتين، گيالۋرون قىشقىلى، بۋتاناميد جانە تاعى باسقا قوسالقى بولشەكتەردىڭ قوسىندىسىنان تۇرادى.

عالىمدار بىرنەشە شوشقاعا سىناق جۇرگىزگەن. ولاردىڭ جۇرەگىندە 6 ميليمەتر تەسىك تەسىپ، ونى گەلمەن جاپسىرعان.

گەل جۇرەك بۇلشىق ەتتەرىمەن تەز جابىسىپ، 20 سەكۋندتا قاتا باستايدى، ال بەرىكتىگىن بىرنەشە اپتا بويى جوعالتپايدى. بىرتىندەپ جەلىمدەنگەن جەر جاڭا جاسۋشالارمەن بايلانىسادى.

بيوحيميكتەر بۇل گەل مەديتسينادا قولدانىسقا يە بولادى دەپ ۇمىتتەنەدى.