باۋىرجان مومىش ۇلى وزىنە اشۋلانعان اتاقتى اقىندى قالاي توقتاتتى

نۇر-سۇلتان. قازاقپارات - بۇگىن بىزگە قاليجان بەكقوجين ايتتى دەپ تۇرسىن جۇرتباي اعامىز تاعىلىمى مول ءبىر اڭگىمە ايتىپ بەردى.

**

- ءبىر وتىرىستا باۋىرجان مومىش ۇلى ەكەۋىمىز رەنجىسىپ قالدىق. شارت كەتتىك.

ەرتەسىنە مەن ول كىسىمەن كەزدەسۋگە دايىندالىپ، ەرتە باردىم. جازۋشىلار وداعىنىڭ ەكىنشى قاباتىندا وتىرمىن. جۇرت كەلە باستادى. شيمايىن الىپ، ۇلكەن جازۋشىلاردى دا كورە كەتۋ ءۇشىن اۋىلدان كەلگەن ادامدار ءجۇر.

ساعات تۋرا توعىز بولدى دەگەندە مومىش ۇلى كورىندى. مەن سازارىپ وتىرا بەردىم. ءبىر جاس جىگىت بارىپ سالەم بەردى. ءسويتىپ ەدى، مومىش ۇلى:

- مەنى تانيسىڭ با؟ - دەدى. انا جىگىت:

- ارينە، باۋكە، - دەدى.

- تانىمايسىڭ، - دەپ گۇر ەتتى.

- تانيمىن عوي، - دەدى جىگىت جاسىڭقىراپ. - باۋىرجان مومىش ۇلىسىز عوي.

- جوق!

انا جىگىت ءتىپتى ساستى. باۋكەڭ سول كەزدە مەنى كورسەتتى دە بىلاي دەدى:

- مەن اناۋ جەردە وتىرعان اتاقتى اقىن قاليجان بەكحوجيننىڭ اعاسىمىن.

«اعاسىمىن» دەگەن ءسوزدى ەستىگەن كەزدە ورنىمنان اتىپ تۇردىم دا:

- اسسالاۋماعالەيكۋم، باۋكە! - دەپ جانىنا جەتىپ باردىم دا، قۇشاقتاي الدىم.

اعا دەگەن ءبىر عانا ءسوزدىڭ كۇشى قانداي، ءا؟

ارمان المەنبەتتىڭ facebook پاراقشاسىنان