بەسىنشى بۋىن بايلانىس جەلىسىنە قوسىلعان تەلەفوندار شىنىندا دا زياندى ما
« RT America جەلىسى «ادامزاتقا جاسالعان قاۋىپتى ەكسپەريمەنت» اتتى سيۋجەت كورسەتتى. وندا ساراپشىلار 5G ادام دەنساۋلىعىنا قاۋىپ توندىرەتىنىن ايتادى. ءتىپتى، ماماندار سيۋجەتتە جاڭا جۇيە مي راگىن، بەلسىزدىك پەن اۋتيزم نەمەسە جۇرەك اۋرۋى مەن التسگەيمەرگە شالدىقتىرۋى مۇمكىن ەكەنىن مالىمدەدى. دەگەنمەن، بۇل پىكىرلەردىڭ ەش عىلىمي دالەلى جوق»، دەپ جازادى باسىلىم. تەرىس مالىمەتتى قاداعالايتىن New Knowledge كومپانياسىنىڭ ديرەكتورى رايان فوكستىڭ ايتۋىنشا، بۇل ەكونوميكالىق سوعىس امالى بولۋى مۇمكىن.
« RT ارناسىنىڭ 5G تەحنولوگياسىنا قارسى شىعۋى امەريكالىق يندۋستريانىڭ 5G جۇيەسىن ەنگىزۋدى ارتتىرۋمەن قاتار كوبەيىپ كەلەدى. ناۋرىز ايىندا بۇل قىزمەت ءتۇرى 30 قالانى قامتىعان بولاتىن. ال RT America 5G جۇيەسىنىڭ دەنساۋلىققا زيانى تۋرالى العاشقى باعدارلامانى 2018 -جىلى مامىر ايىندا كورسەتكەن ەدى. بيىل مۇنداي باعدارلامالار سانى جەتىگە جەتتى. دەگەنمەن، وندا ايتىلعان تۇجىرىمداردىڭ ەشبىرىنىڭ عىلىمي دالەلى جوق»، دەپ جازادى اۆتور.
ونىڭ ايتۋىنشا، 5G جاڭالىقتار يندۋسترياسى، سپورت سالاسى، دۇكەندەر مەن كولىك، دەنساۋلىق ساقتاۋ سالاسى، سونداي- اق قالالىق باسقارۋ مەن ۇكىمەتتىك دەڭگەيدە جان جاقتى قولدانىلا الادى جانە جەلىنىڭ دەنساۋلىققا اسەرىن زەرتتەگەن جاھاندىق عىلىمي زەرتتەۋلەر كوپتەپ جۇرگىزىلگەن.
«5G جۇيەسىنە قارسى شىعۋشىلار بۇل تەحنولوگيانىڭ جوعارى جيىلىگى تەلەفوندى دەنساۋلىققا زيان قىلاتىنىن العا تارتۋدا. دەگەنمەن، عالىمداردىڭ ايتۋىنشا، كەرىسىنشە، راديوجيىلىك جوعارى بولعان سايىن ونىڭ ادام تەرىسىنە اسەرى ازايادى. سايكەسىنشە، ادامنىڭ ىشكى اعزالارىنا كەرى اسەرى از بولادى»، دەپ جازادى اۆتور.
تەمپل ۋنيۆەرسيتەتى مەديتسينا مەكتەبىنىڭ راديولوگيا جانە مەديتسينالىق فيزيكا پروفەسسورى مارۆين زيسكيننىڭ ايتۋىنشا، 5G وعان دەيىنگى جەلىلەرگە قاراعاندا قاۋىپسىزدىگىمەن ەرەكشەلەنەدى.
اۆتور: ايكۇمىس بولاتبەك