ەلوردادا «مۋزەي ءتۇنى» اكسياسى وتەدى
بۇل تۋرالى «قازاقستان رەسپۋبليكاسىنىڭ ۇلتتىق مۋزەيى» باسپا ءسوز قىزمەتى ءمالىم ەتتى، دەپ حابارلايدى قازاقپارات.
باسپا ءسوز مالىمەتتەرىنە قاراعاندا، بيىلعى اكسيا قازاقستان رەسپۋبليكاسى ۇلتتىق مۋزەيىنىڭ 5 جىلدىعىنا وراي جانە حالىقارالىق مۋزەي كۇنى مەرەكەسىنە ارنالىپ، «بەس جىل بىرگە» دەگەن تاقىرىپەن ءۇيىمداستىرىلماق. اكسياعا كەلگەن استانالىقتار مەن قالا قوناقتارى ۇلتتىق مۋزەيگە تەگىن كىرىپ، ءتۇرلى شارالاردى تاماشالاي الادى.
شارانىڭ ماقساتى - ۇلتتىق كودقا نەگىز بولاتىن ۇلتتىق قۇندىلىقتاردى، حالقىمىزدىڭ تاريحىن، مادەنيەتىن، سالت-ءداستۇرىن زاماناۋي فورماتتا تانىتىپ، مۇراجاي قىزمەتىن، ونداعى ەكسپوناتتار مەن جاۋھار جادىگەرلەردى كەڭىنەن ناسيحاتتاۋ.
حالىقارالىق مۋزەي كۇنى مەرەكەسى 1977-جىلى حالىقارالىق مۋزەيلەر كەڭەسىنىڭ باس كونفەرەنتسياسىندا بەكىتىلگەن. اتالعان داتاعا وراي 1997-جىلى تۇڭعىش رەت «مۋزەي ءتۇنى» شاراسى بەرلين قالاسىندا وتكىزىلدى.
«مۋزەيلەر ءتۇنى» اكسياسى ق ر ۇلتتىق مۋزەيىندە جىل سايىن ءداستۇرلى تۇردە ۇيىمداستىرىلىپ كەلەدى. اتالعان شارا وسىعان دەيىن 5 مارتە ۇيىمداستىرىلدى. 2015-جىلعى العاشقى اكسياعا 23 مىڭ ادام قاتىسسا، 2016-جىلعى 18- مامىر كۇنى ۇلتتىق مۋزەيگە 30 مىڭنان استام ادام كەلگەن. 2017-جىلى اتالعان اكسيا 2 رەت وتكىزىلدى. ونىڭ العاشقىسى «ناۋرىز» مەرەكەسىنە وراي «ناۋرىز - جاڭعىرۋ نىشانى» دەگەن تاقىرىپپەن ۇيىمداستىرىلىپ، حالىقارالىق مۋزەيلەر كۇنىنە ارنالدى.
مۇراجاي قوناقتارى ۇلتتىق مۋزەيدىڭ 5 جىلدىعىنا وراي، مۋزەي قورىنان جاڭا ەكسپوناتتارمەن تولىقتىرىلعان ەتنوگرافيا زالى مەن جاڭا اشىلعان «اسىل مۇرا» زالدارىن تاماشالاي الادى.
2015-جىلعى 18- ناۋرىزدا قورلاردى تولىقتىرۋ ماقساتىمەن «ۇلتتىق مۋزەيگە سىي تارتۋ» اكسياسى قولعا الىنعان بولاتىن. كورنەكتى قوعام جانە ساياسات قايراتكەرلەرىنىڭ، ۇلى وتان سوعىسى ارداگەرلەرىنىڭ ۇرپاقتارى جانە جەكە كوللەكتسيانەرلەر مۋزەيگە تاريحي جانە مادەني قۇندىلىعى بار زاتتاردى سىيعا تارتىپ، مۋزەي قورلارى ءتۇرلى قۇندى جادىگەرلەرمەن تولىققان. وسى ەكسپوناتتار «اسىل مۇرا» زالىنا ۇسىنىلىپ، قارۋ-جاراق پەن كىلەم توپتامالارى، مەملەكەت جانە ساياسات قايراتكەرى ي. تاسماعامبەتوۆتىڭ كوللەكتسياسىنان زەرگەرلىك اشەكەيلەر، ايەلدەر مەن ەرلەردىڭ بەلدىكتەرى، ات ابزەلدەرى جانە ب. ساربايەۆتىڭ كوللەكتسياسىنان الەم حالىقتارىنىڭ مۋزىكالىق اسپاپتارى سىندى جەكە كوللەكتسيالاردان باعالى بۇيىمدار قويىلدى.
«مۋزەيلەر ءتۇنى» اكسياسى بارىسىندا رەسپۋبليكالىق «ەگەمەن قازاقستان» گازەتىنىڭ 100 جىلدىعىنا وراي «ءجۇز جىلدىق جىلناما» كورمەسى سالتاناتتى تۇردە اشىلادى.
سونىمەن قاتار شارا باعدارلاماسىندا اقىن داۋلەتكەرەي كاپ ۇلىنىڭ باستاماسىمەن «اقشامداعى اقىندار جىرى» اتتى شىعارماشىلىق كەش، ونەرتانۋشى، سۋرەتشى ە. ن. چەرنوۆانىڭ «قازاقستاننىڭ قولدانبالى ساندىك ونەرى: كەشە جانە بۇگىن» اتتى شەبەرلىك ءدارىسى، «قۇسني قورلان» كورىنىسى، ءمۇسىنشى ايدوس ەسماعانبەتپەن ماسكالار شوۋى، ارت پازل قۇراستىرۋ، قولونەر جۇمىستارى بويىنشا شەبەرلىك ساباقتار، «تاريح سىرى»، «مۋزەي بىلگىرى» ۆيكتورينالىق سۇراقتار، كىتاپ جارمەڭكەسى ۇيىمداستىرىلىپ، «توعىزقۇمالاق»، «اسىق اتۋ»، ت. ب. قازاقتىڭ ۇلتتىق ويىندارى ويناتىلادى.