قازاقستانداعى ءبىرقاتار وتكىزۋ بەكەتتەرى جاڭعىرتىلادى

نۇر-سۇلتان. قازاقپارات - قازاقستانداعى ءبىرقاتار وتكىزۋ بەكەتتەرى جاڭعىرتىلادى، دەپ حابارلايدى ق ر قارجى مينيسترلىگىنىڭ مەملەكەتتىك كىرىستەر كوميتەتى.

كوميتەت تاراتقان مالىمەتتەرگە قاراعاندا، بيىلعى جىلدىڭ مامىر ايىنىڭ 10-11 ارالىعىندا قازاقستان رەسپۋبليكاسى قارجى مينيسترلىگىنىڭ جاۋاپتى حاتشىسى ە. ك. جاماۋبايەۆ پەن مەملەكەتتىك كىرىستەر كوميتەتىنىڭ ءتوراعاسى م. ە. سۇلتانعازيەۆ تۇركىستان وبلىسىنداعى «ب. قونىسبايەۆ» جانە «جىبەك جولى» وتكىزۋ بەكەتتەرىنىڭ تىنىس-تىرشىلىگىمەن تانىسۋ ماقساتىندا ءىس ساپارعا باردى.

ساپار بارىسىندا مينيسترلىك وكىلدەرى قۇرىلىس ۇيىمىنىڭ قىزمەتكەرلەرىمەن كەزدەسىپ، «ب. قونىسبايەۆ» وتكىزۋ بەكەتىنىڭ جاڭعىرتىلاتىن اۋماعى مەن «جىبەك جولى» وتكىزۋ بەكەتىنە جاقىن جەرگە جوسپارلانعان اۆتوۆوكزال قۇرىلىسىن قاراپ شىقتى.

«ب. قونىسبايەۆ» وتكىزۋ بەكەتىن جاڭعىرتۋ شەڭبەرىندە وتكىزۋ بەكەت اۋماعى 3,6 گەكتاردان 6 گەكتارعا دەيىن كەڭەيتۋگە، اۆتوكولىك قۇرالدارىنا ارنالعان قوزعالىس جولاقتارىن 2 دەن 8 جولاققا كوبەيتۋ جوسپارلانۋدا. وتكىزۋ قابىلەتى تاۋلىگىنە 120 دان 500 جۇك اۆتوكولىك قۇرالدارىنا دەيىن ارتادى.

«جىبەك جولى» وتكىزۋ بەكەتىنە جاقىن جەردە ءتول قۇجاتتىق جانە كەدەندىك باقىلاۋ جۇرگىزۋ ءۇشىن جولاۋشىلار تەرمينالى بار زاماناۋي اۆتوۆوكزال قۇرىلىسىن جۇرگىزۋ جوسپارلانۋدا. بۇل وتكىزۋ بەكەتىنىڭ قابىلەتى ەكى ەسەگە ارتىپ، تاۋلىگىنە 50 مىڭ جەكە تۇلعا وتكىزىلەتىن بولادى.

وتكىزۋ بەكەتتەرىن جاڭعىرتۋ، ونىڭ قابىلەتىن ارتتىرۋعا اسەر ەتىپ، مەملەكەتتىك باقىلاۋ جۇرگىزۋ ۋاقىتى 25 مينۋتقا دەيىن ازايادى.