يزرايلدە بۇركىتتەر ۋلانىپ جاتىر
ازىرگە پوليتسيا تەرگەۋ جۇمىستارىن جۇرگىزىپ جاتىر. عالىمدار بۇل شىعىننان كەيىن قۇستاردىڭ سانى قايتا قالپىنا كەلمەۋى مۇمكىن دەپ الاڭدايدى. العاشقى دابىلدى ەكولوگتار قاقتى. ولار بۇركىتتەرگە ورناتىلعان GPS ترەكەرلەردىڭ ۇزاق ۋاقىت قوزعالىسسىز كۇيدە قالعانىن بايقاعان. ال وسى قۇرىلعىلار كورسەتكەن گولان شىڭىنا كەلگەن عالىمدا بۇركىتتەردىڭ ولىگىنە تاپ بولعان. زەرتتەۋ ناتيجەلەرى ولاردىڭ ۋلانعانىن انىقتادى.
ەحۋد اتسۋفا، ەكولوگ:
- ءبىز ۋلانىپ ولگەن 8 بۇركىتتىڭ دەنەسىن تاپتىق. تاعى بىرەۋى وتە اۋىر جاعدايدا، ءبىراق ءتىرى. تاعى بىرەۋىن ءسال كەشتەۋ ۇستادىق. ءدال ۋاقىتىندا ۋ قايتاراتىن ەكپە جاساپ، ەكەۋىن دە امان الىپ قالدىق. ءتىرى قالعان بۇركىتتىڭ ءبىرى ەركىندىككە جىبەرىلدى. ەكىنشىسى ۆەتەرينارلىق كلينيكادا ساۋىقتىرۋدان ءوتىپ جاتىر. پوليتسيا قىلمىستىق ءىس قوزعاعان. ۇستالعان كۇدىكتى - فەرمەر. ەكولوگتاردىڭ ايتۋىنشا، بۇل ءبىرىنشى جاعداي ەمەس، مۇنداي وقيعالار ءجيى بولىپ تۇرادى. الايدا بۇركىتتەردىڭ جاپپاي قىرىلۋى بۇرىن- سوڭدى بولعان ەمەس.
ەحۋد اتسۋفا، ەكولوگ:
- بۇل ازىرگە تەك كۇدىكتى جاعداي، تەرگەۋ ءجۇرىپ جاتىر. سەبەپ ءارتۇرلى - فەرمەرلەر اراسىنداعى جانجالدان نەمەسە ءشيبورى سياقتى جىرتقىشتاردىڭ كەسىرىنەن بولاتىن مال شىعىندارىن ازايتۋعا ۇمتىلۋ سەبەپتەرىنەن بولۋى دا مۇمكىن. ادامدار ول ءۇشىن ۋلى حيميكاتتار تاستايدى. ونىڭ سوڭى قانداي قاتەرگە اكەلەتىنىن ولار بىلمەيدى. مىنە، ناتيجەسى! عالىمداردىڭ ەسەبى بويىنشا، از ۋاقىتتا گولان شىڭىنداعى قۇستاردىڭ تەڭ جارتىسى قىرىلىپ قالدى. بۇل تالاي جىلعى ەڭبەكتىڭ ەش كەتۋى. بۇركىتتەردىڭ ەكوجۇيەدەگى ورنى بولەك. ولار اۋرۋ اڭداردىڭ كوزىن جويۋ ارقىلى ءتىپتى ەپيدەميانىڭ تارالۋىنا دا توسقاۋىل بولا الادى. الايدا ەڭ ۇلكەن قاتەر - ۋ. بۇركىتتەرمەن بىرگە تۇلكىلەر دە قىرىلعان. باسقا دا اڭدار زارداپ شەگۋى مۇمكىن، ءتىپتى ادامدار دا. قازىر قورشاعان ورتانى باقىلاۋ باسقارماسى ۋ قولدانۋدى شەكتەيتىن جانە وسىعان ۇقساس وقيعاعا كىنالىنى قاتاڭ جازالايتىن ارنايى زاڭ قابىلداۋعا ۇمتىلىپ جاتىر. ال بۇركىت سانىن قالىپقا كەلتىرۋ ءۇشىن ولاردى شەت مەملەكەتتەردەن الىپ كەلۋدەن باسقا ءتيىمدى جول جوق سياقتى.
اۆتورلارى: ەرتاي ءنۇسىپجانوۆ، سەرگەي اۋسلەندەر
www.24.kz