جەكي چان تۋرالى تۋىندى ەلباسى كىتاپحاناسىنا كەلىپ ءتۇستى
كەزدەسۋگە قىتاي اكتەرىنىڭ ارىپتەستەرى مەن شىعارماشىلىق ۇجىمى قاتىستى.
«ق ر تۇڭعىش پرەزيدەنتى - ەلباسىنىڭ كىتاپحاناسى» م م باسپا ءسوز قىزمەتىنىڭ مالىمەتىنشە، ەلباسى الەمگە ايگىلى تۇلعامەن كەزدەسۋ ءساتىنىڭ تۇسكەنىنە ريزاشىلىعىن ءبىلدىرىپ، قازاقستان مەن قىتاي مەملەكەتتەرى اراسىنداعى قارىم-قاتىناستىڭ ماڭىزدىلىعىن اتاپ ءوتتى. وسى تۇستا جەكي چان قوس مەملەكەت اراسىنداعى مادەني ىنتىماقتاستىققا كورسەتىپ جاتقان ەلباسىنىڭ قولداۋى ءۇشىن زور العىسىن ايتىپ، ن. ءا. نازاربايەۆقا «مەن باقىتتىمىن» كىتابىن تارتۋ ەتتى.
بۇگىندە قىتاي اكتەرىنىڭ قولتاڭباسى بار كىتاپ ەلباسى كىتاپحاناسىنىڭ قورىنا كەلىپ ءتۇستى. التى بولىمنەن قۇرالعان تارتۋلىق باسىلىم جەكي چاننىڭ ءومىرى مەن ونەر سالاسىنداعى جولىنان سىر شەرتەدى. كوزى تىرىسىندە ەسىمى اڭىزعا اينالعان تۇلعانىڭ ومىرلىك كوزقاراستارى مەن ۇستانىمدارىن، ۇلتتىق مادەني مۇرا مەن ادامي قۇندىلىقتارعا ادالدىعىن، ەڭبەكقورلىعى مەن قاراپايىمدىلىعىن، ەرلىگى مەن باستان وتكەن وقيعالارىن كىتاپ بەتىنە اكتەردىڭ ارىپتەس دوسى جۋ مو تۇسىرگەن.
«ادامداردىڭ تاعدىرلارىن قوساتىن بۇل ءومىر توسىنسىيلارعا باي. اتالمىش كىتاپتىڭ جازىلىپ، باسىلىمنان شىعۋى ءۇش جىلداي ۋاقىتتى تالاپ ەتتى. بۇل ۋاقىتتىڭ ىشىندە باقىتقا دا، ساتسىزدىككە دە تولى ساتتەردى باستان وتكەرىپ ۇلگەردىم. وتكەنگە كوز جۇگىرتسەم، ەستەلىكتەرىممەن ءدال قازىر بولىسكەنىم ابزال سياقتى. اڭگىمەلەرىم وقىرماندارعا قىزىق بولادى دەگەن ۇمىتتەمىن. ولار كەم دەگەندە ناعىز بولمىسىمدى تانىپ-تۇسىنۋگە، قورىتىندى وي تۇرتۋگە كومەكتەسۋى ءتيىس»، - دەپ جەكي چان كىتاپ العىسوزىندە پىكىرىمەن بولىسەدى.
«مەن باقىتتىمىن» كىتابى جەكي چاننىڭ شىنايى ءارى اشىق اڭگىمەلەرىنە نەگىزدەلگەن. باسىلىم بەتتەرىن پاراقتاعان وقىرمان ءتۇسىرىلىم الاڭدارىندا بولعان قىزىقتى جاعدايلاردى وقىپ قانا قويماي، اكتەردىڭ ابىرويلى تۇلعا رەتىندە قالاي قالىپتاسقانىن، قانداي قيىندىقتاردان وتكەنىن بىلە الادى.
قاراپايىم تىلمەن جازىلعان ول جەكي چاننىڭ اتا-اناسىنا، جۇبايى مەن ۇلىنا، ارىپتەستەرى مەن دوستارىنا دەگەن قارىم-قاتىناسىن بايانداپ، اكتەردىڭ قۋانىشىن، كەيدە وكىنىشى مەن مۇڭىن كەلتىرەدى، كەز كەلگەن ادامنىڭ قاتەلىك كەلتىرۋگە بەيىم ەكەنىن ءتۇسىندىرىپ، باقىتتى بولۋدىڭ «سىرىن» ۇيرەتەدى.
2019 -جىلدىڭ ءساۋىر ايىندا بەيجىڭدە جەكي چان مەن ەلباسى نۇرسۇلتان نازاربايەۆتىڭ كەزدەسۋى ءوتتى. اڭگىمە بارىسىندا قىتاي اكتەرى الداعى شىعارماشىلىق جوسپارى جانە كينويندۋستريا سالاسىنداعى بىرلەسكەن جوبالاردى جۇزەگە اسىرۋ جولدارى تۋرالى وي بولىسكەن ەدى.
BAQ. KZ