نازاربايەۆ: قازاقستاندى ءبىر عانا پرەزيدەنت باسقارادى
بۇل تۋرالى baq.kz حابارلادى.
پلەنارلىق سەسسيانىڭ مودەراتورى، Euronews شتەفان گروبە نۇرسۇلتان نازاربايەۆ سايلاۋدان كەيىن ەلدىڭ ساياسي جاعدايىن قالاي ەلەستەتىنىن سۇرادى.
«مەن ءوز ءپرينسيپىمدى ۇستانامىن. پرەزيدەنت پەن حالىق ءبىر-ءبىرىن تۇسىنگەن كەزدە مەملەكەت جەتىستىككە جەتەدى. ۇلت كوشباسشىسىنىڭ باعدارلاماسى مەن يدەيالارىنا حالىق تولىقتاي قولداۋ كورسەتۋى ءتيىس. مەنىڭ تۇسىمدا سولاي بولدى. ەلمەن تىعىز جۇمىس ىستەدىم. تاۋەلسىزدىك العاننان بەرى بەس سايلاۋعا قاتىستىم. سونىڭ بارىندە ەلەكتوراتتىڭ %85 تومەن داۋىس جيناعان ەمەسپىن. حالىقپەن وسىنداي تۇسىنىستىكتىڭ ارقاسىندا جوعارى ناتيجەلەرگە قول جەتكىزدىك، - دەدى نازاربايەۆ.
ەلباسى سايلاۋعا قاتىسسا، تاعى دا جەڭىسكە جەتەتىنە سەنىمدى ەكەنىن ايتتى.
«مەن ءوز كانديداتۋرامدى ۇسىنىپ، سايلاۋدا جەڭىسكە جەتەتىنىمە %100 سەنىمدىمىن. ءبىراق جاڭا بۋىن، جاڭا كوماندا بيلىككە كەلۋ كەرەك»، - دەدى ول.
ەلباسى قازاقستان ۇزاق مەرزىمدى الەۋمەتتىك جانە ينفراقۇرىلىمدى دامىتۋعا ارنالعان باعدارلامالار قابىلداعانىن ايتىپ ءوتتى.
«كەلەسى پرەزيدەنت - «قازاقستان-2050» باعدارلاماسىن جالعىستىرادى، ەلىمىز 30 دامىعان ەلدىڭ قاتارىنا كىرۋ كەرەك. سول جۇمىس ىستەلۋى ءتيىس»، - دەدى نازاربايەۆ.
ءسوز سوڭىندا ەلباسى مودەراتورعا ازىلدەپ، قازاقستاندى ەكى پرەزيدەنت باسقارادى دەگەنگە قاتىستى پىكىر ءبىلدىردى.
«مەن سىزدەرگە ىڭعايسىزدىق تۋدىرىپ جاتقانىمدى بىلەمىن: الدىمەن، «تۇڭعىش پرەزيدەنت» سوسىن «پرەزيدەنت» دەپ حابارلايسىزدار. الايدا، قازاقستاندا مۇنداي ەكى پرەزيدەنتتىك باسقارۋ جوق. ءبىر عانا پرەزيدەنت بار جانە ول - ەڭ باستىسى»، - دەدى نۇرسۇلتان ءابىش ۇلى.
ايتا كەتەيىك، ا ە ف- تىڭ باستى ماقساتى - جاھاندىق ۇردىستەردى زەرتتەۋ جانە قازاقستان دامۋىنىڭ پراكتيكالىق ساياساتىن جاساۋ ءۇشىن ەكونوميكالىق ساياسات پەن عىلىم سالاسىندا تاجىريبە الماسۋ الاڭىن قۇرۋ. استانا ەكونوميكالىق فورۋمى 11 جىلدىڭ ىشىندە الەمدىك ەكونوميكا مەن قارجى جۇيەسىن جەتىلدىرۋ جانە دامىتۋ ماسەلەلەرىن تالقىلاۋعا ارنالعان ەڭ بەدەلدى حالىقارالىق پلاتفورمالاردىڭ ءبىرى رەتىندە مارتەبەگە يە بولدى. فورۋمعا الەمنىڭ 150 ەلىنەن 50000 عا جۋىق دەلەگاتتار، ونىڭ ىشىندە 20 دان اسا نوبەل سىيلىعىنىڭ لاۋرەاتتارى جانە 30 جوعارى دارەجەلى شەتەلدىك ساياسي قايراتكەرلەرى قاتىسىپ ۇلگەرگەن.
بەك تولەۋوۆ
فوتو: باۋىرجان جۋاسبايەۆ