كريستين لاگارد الەمدىك ەكونوميكانىڭ دامۋىن ابايدىڭ يدەياسىمەن سيپاتتادى

نۇر-سۇلتان. قازاقپارات - حالىقارالىق ۆاليۋتا قورىنىڭ باسقارۋشى ديرەكتورى كريستين لاگارد الەم ەكونوميكاسىنىڭ دامۋىندا قازاقتىڭ ۇلى اقىنى ابايدىڭ يدەياسىنا ەكپىن قويۋ كەرەكتىگىن ايتتى، دەپ حابارلايدى قازاقپارات ءتىلشىسى.

«ەكونوميكالىق دامۋ باعىتىندا بىرتىندەپ قارقىن الۋ كەرەك. بۇل رەتتە قازاقتىڭ ۇلى اقىنى اباي قۇنانباي ۇلىنىڭ «اقىرىن ءجۇرىپ، انىق باس» دەپ جازىپ كەتكەن ولەڭ جولدارى ويعا كەلەدى. سوندىقتان بۇگىنگى فورۋمدا وسى يدەياعا ايرىقشا ەكپىن قويماقپىن، ياعني ءاربىر قادامدى سەنىمدى تۇردە جاساۋىمىز كەرەك. وكىنىشكە قاراي، الەمدىك وسىمگە قاراعان كەزدە، ادامداردىڭ كوبىسىنىڭ ارەكەتتەرىندە دامۋ قارقىنى بايقالمايدى. ولار سول باياعى باياۋ سارىندا جىلجىپ كەلەدى»، - دەدى كريستين لاگارد XII استانا ەكونوميكالىق فورۋمى بارىسىندا.

ونىڭ سوزىنە قاراعاندا، 2019-جىلى جاھاندىق ىشكى جالپى ءونىمنىڭ 70 پايىزى باياۋلاپ وتىر.

«بۇل رەتتە قازىرگى كەزدە رەتسەسسيا ورىن الىپ وتىر دەپ ايتىپ وتىرعانىم جوق، الايدا وتكەن جىلمەن سالىستىرعاندا باسەڭدەۋدىڭ بەلگىcі كورىنىس بەردى، ياعني 3,6 پايىز كورسەتكىشتەن قازىرگى كەزدە شامامەن 3,3 پايىز. سونىمەن قاتار، قارجىلىق تۇرعىدا قوسىمشا تاۋەكەلدەر بولمايتىنىنا سەنىم ارتۋدامىز. ءبىز الداعى 6 ايدا جاھاندىق شيەلەنىستىڭ تومەندەۋىن بولجاپ وتىرمىز. وسى ورايدا قازىرگى كەزدەگى شيەلەنىستىك قۇبىلىستار باسەڭدەيدى دەپ ويلايمىز»، - دەدى ح ۆ ق باسشىسى.

ونىڭ پايىمىنشا، ورتالىق ازيانىڭ وزىندىك ءرولى ارقاسىندا ەكونوميكالىق دامۋعا ءتيىستى ىقپال تيگىزەدى.

«بۇگىندەگى سىن- تەگەۋرىندەر تۇسىنىكتى بولىپ تۇر، وسى ورايدا ءبىز ءوسىمدى بۇدان دا جوعارى تۇراقتى دەڭگەيگە شاعارۋىمىز كەرەك. ءبىز وسى باعىتتا اڭداپ، سەنىمدى قادامداردى جاساۋىمىز قاجەت. وسىعان بايلانىستى جان-جاقتى زەردەلەنگەن ىشكى ساياساتتى جۇزەگە اسىرىپ، ەكونوميكالىق ءارتاراپتاندىرۋدى ارتتىرۋ كەرەك. سونىمەن قاتار بەلسەندى تۇردە حالىقارالىق ىنتاماقتاستىققا باعىت العان ءجون»، - دەپ ءتۇيدى ول.