ەكونوميكانىڭ نەگىزگى درايۆەرى حالىق سانى ەمەس، ەڭبەك ونىمدىلىگى بولادى - ەلباسى

نۇر-سۇلتان. قازاقپارات - ەكونوميكا ءوسىمىنىڭ نەگىزگى درايۆەرى ەڭبەك ونىمدىلىگى بولادى.

بۇل تۋرالى بۇگىن XII استانا ەكونوميكالىق فورۋمى بارىسىندا ق ر تۇڭعىش پرەزيدەنتى - ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«حالىق سانىنىڭ ارتۋى ۇلتتىق ەكونوميكا وسىمىندە ماڭىزدى ءرول ويناۋىن دوعارا باستايدى. نەگىزگى درايۆەر ەڭبەك ونىمدىلىگى بولادى. سوڭعى 50 جىلدا دامىعان مەملەكەتتەردەگى جالپى ىشكى ءونىمنىڭ جىل سايىنعى ءوسىمىنىڭ ۇشتەن ءبىرى عانا حالىقتىڭ تابيعي ءوسىمى ەسەبىنەن، ال قالعانى ەڭبەك ونىمدىلىگىنىڭ ەسەبىنەن الىنعان»، - دەدى ق ر تۇڭعىش پرەزيدەنتى.

ەلباسى الەمدىك ساراپشىلار وسى عاسىردا بۇل كورسەتكىشتى تۇبەگەيلى ارتتىرا الاتىن ەلدەر عانا باسەكەگە قابىلەتتى بولاتىنىنا سەنىمدى ەكەنىن ايتتى.

«دەگەنمەن، بۇگىنگى كۇنى ونىمدىلىك ءوسىمىنىڭ الەۋەتى الداعى ون جىلدىڭ ىشىندە جىلىنا كەمىندە 2 پايىزدى قۇرايدى. ونىڭ ىشىندە، ونىمدىلىكتى ارتتىرۋ مۇمكىنشىلىگىنىڭ شامامەن 60 پايىزى سيفرلىق تەحنولوگيالارعا تيەسىلى بولادى»، - دەدى ن. نازاربايەۆ.