شىعىستىڭ ۇزدىك كەلىنى بەلگىلى بولدى

نۇر- سۇلتان. قازاقپارات - جىل سايىن ءوتىپ كەلە جاتقان «اياۋلى جاس كەلىن» بايقاۋىندا بيىل 17 ۇمىتكەر باق سىنادى، دەپ حابارلايدى قازاقپارات ءتىلشىسى.

ورامال تاققان بۇرىمدىلار اراسىنداعى سايىس بيىل جارما اۋدانىنىڭ قالباتاۋ اۋىلىندا «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلدى.

ەكى كەزەڭدىك بايقاۋدا جاس كەلىندەر اۋەلى اسپازدىق شەبەرلىكتەرىن پاش ەتىپ، شاي دەمدەپ جارىسسا، ەكىنشى كەزەڭدە ونەرىن ورتاعا سالدى.

قوس سىننان دا سۇرىنبەي وتكەن سەمەيلىك كەلىن ايدانا باۋىرجانوۆا بايقاۋدىڭ باس جۇلدەسىن جەڭىپ الىپ، كۇللى شىعىس جۇرتىنىڭ «اياۋلى جاس كەلىنى» اتاندى. باس جۇلدەگەرگە تەلەديدار تابىس ەتىلدى. ال ەكىنشى ورىن اباي اۋدانىنىڭ كەلىنى ماقپال ەبىنگە، ءۇشىنشى ورىن جارما اۋدانىنىڭ وكىلى گۇلميرا جۋسانبايەۆاعا بۇيىردى.

جەڭىمپاز اتانعان كەلىندەرمەن قوسا باسقا دا قاتىسۋشىلار تۇرمىستىق تەحنيكاعا يە بولدى.

اۆتور: ەسىمجان ناقتىباي