قاراعاندى- بالقاش كۇرەجول قۇرىلىسى باستالدى

نۇر-سۇلتان. قازاقپارات - ەلىمىزدىڭ وڭتۇستىگى مەن سولتۇستىك ءوڭىرىن جالعايتىن اۆتوباننىڭ قاراعاندى- بالقاش ۋچاسكەسىندە قۇرىلىس جۇمىستارى باستالدى.

 360 شاقىرىم جولدى سالۋعا قازىنادان 240 ميلليارد تەڭگە بولىنگەن. ءۇش جىلدىڭ ىشىندە جۇمىس تولىق اياقتالماق. مامانداردىڭ ايتۋىنشا، اراقاشىقتىق شامامەن 10 شاقىرىمعا قىسقارادى.

 ايتا كەتەيىك، قازىر قاراعاندى قالاسىن جاناپ وتەتىن 48 شاقىرىمدىق اينالما جولدىڭ دا قۇرىلىسى قارقىندى ءجۇرىپ جاتىر. بۇگىندە جۇمىستىڭ 70 پروتسەنتى اياقتالدى. مۇندا قوسىمشا 7 جولايرىق جانە 10 كوپىر سالىنادى. جوبا قۇنى 35 ميلليارد تەڭگە. جاڭا جول كەلەر جىلى ەل يگىلىگىنە بەرىلەدى.

 سەرىك ايدوس، «قازاۆتوجول» اق قاراعاندى وبلىستىق فيليالىنىڭ ديرەكتورى:

 - جول قۇرىلىسى كەزىندە كولىك قوزعالىسىنا كەدەرگى بولمايدى. ەسكى جولدى بۇزبايمىز. ەگەر جۇمىس جوسپارعا ساي جۇرسە، قاراعاندىدان بالقاشقا دەيىنگى اۆتوباندى 2022 -جىلى تولىق سالىپ بىتىرەمىز.

www.24.kz