مەملەكەتتىك قىزمەتشىلەرگە بونۋستار قالاي تولەنەدى؟

قوستاناي. قازاقپارات - مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اپپارات باسشىسى سايان احمەتجانوۆ قوستانايدا وتكەن بريفينگكە قاتىستى، دەپ حابارلايدى قازاقپارات.

جيىندا مەملەكەتتىك اكىمشىلىك قىزمەتشىلەرگە پيلوتتىق رەجيمدە ەڭبەكاقى تولەۋدىڭ ماسەلەلەرى تالقىلاندى. سايان احمەتجانوۆ قىزمەتشىلەرگە تولەنەتىن بونۋستاردىڭ مولشەرىن ەسەپتەۋ ادىستەمەسىن ءتۇسىندىردى.

ونىڭ ايتۋىنشا، قازاقستان رەسپۋبليكاسى ۇلتتىق ەكونوميكا مينيسترلىگى ارنايى قاراجات كولەمىن بەكىتكەن.

«بونۋس - مەملەكەتتىك اكىمشىلىك قىزمەتشىلەرگە قىزمەتىنىڭ تيىمدىلىگىن باعالاۋ ناتيجەلەرى بويىنشا بەلگىلەنەتىن اقشالاي تولەم. اگەنتتىك پەن ونىڭ اۋماقتىق دەپارتامەنتتەرىندەگى اكىمشىلىك مەملەكەتتىك قىزمەتكەرلەرگە بونۋس مەملەكەتتىك ورگاننىڭ بونۋستىق قورى انىقتالعان سوڭ تولەنەدى. ال قۇرىلىمدىق بولىمشەلەردىڭ بونۋستىق قورى باسشىنىڭ جەكە جۇمىس جوسپارىنىڭ ورىندالۋىن باعالاۋعا بايلانىستى بەرىلەدى. ەگەر بولىمشە باسشىسى قىزمەتكەردى باعالاۋ قاجەت دەپ تاپسا، قىزمەتكەرلەرگە سىياقى تاعايىندالادى. جالپى، كەز كەلگەن مەملەكەتتىك قىزمەتكەردىڭ بونۋسىن ارنايى قۇرىلعان كوميسسيا انىقتايدى. ەرەجەدەگى فورمۋلاعا سايكەس، باعالانعان پايىز قىزمەتكەردىڭ ناقتى اتقارعان جۇمىس كۇندەرىنىڭ سانىنا كوبەيتىلەدى»، - دەپ ءتۇسىندىردى س. احمەتجانوۆ.

سونىمەن ارنايى فورمۋلا بويىنشا، اگەنتتىكتە جالپى ورتا ەسەپپەن العاندا اكىمشىلىك قىزمەتكەرلەرگە سوماسى 1 جانە 1,5 ميلليون تەڭگە مولشەرىندە بونۋس تولەندى.

سايان احمەتجانوۆتىڭ سوزىنشە، بۇل قىزمەتكەرلەردىڭ الەۋمەتتىك جاعدايىن جاقسارتا وتىرىپ، ءوز جۇمىسىندا مىندەتىن ادال اتقارۋعا بىردەن ءبىر سەبەبىن تيگىزەدى.