+7 (701) 759 90 19 Лента
4 °С : استانا
15 °С : الماتى
USD 378.90 EUR 422.74
RUB 5.87 CNY 54.80
جاڭالىقتار

ايتىسكەرلەر كىمدى الداپ ءجۇر؟

15 مامىر 16:33 295
:ءبولىسۋ
ايتىسكەرلەر كىمدى الداپ ءجۇر؟

   استانا. قازاقپارات - ءبىزدىڭ بۋىندى ايتىس تەلەديدار ارقىلى «اربادى» . باستاۋىش سىنىپتا وقىپ جۇرگەن بالاپان كەزىم. ۇيگە كىرسەم، ءبىرى قالماي تايلى تۇياعىمەن كوك جاشىككە تەلمىرىپ وتىر.

 - تىنىش، حاتيموللا اعاڭ ايتىپ جاتىر، - دەدى اكەم.

 باستاپقىدا ۇلكەندەردىڭ ايتۋىمەن قۇلاق سالعانىممەن، ءسوز قۇدىرەتى «شىمىرلاپ بويعا جايىلسا» كەرەك ( اباي) ، سول ساتتەن باستاپ مەن ايتىستىڭ تۇراقتى كورەرمەنىنە اينالاتىنىمدى ءوزىم دە سەزبەي قالدىم. ول كەزدە پالەندەي ەشتەڭە ۇعىنىپ تا جارىتپاعان شىعارمىن، ءبىراق قاراگەر دومبىرانىڭ التاي اسىپ كەتكەنى جادىمدا ءالى جاڭعىرىپ تۇر. مەنىڭ كىتاپقا، شىعارماشىلىققا جاقىن بولۋىما، فيلولوگ بولىپ قالىپتاسۋىما تىكەلەي اسەر ەتكەن وسى ايتىس ونەرى بولاتىن.

  ايتىس ماعان بار بولمىسىمەن قىمبات. سوناۋ تەلەايتىستاردان باستاپ، جەكپە جەگى بار، چەمپيوناتى بار، ءتىپتى ەل شۋلاتقان ازىلكەش ءالجاپپاروۆتىڭ لاقپا ايتىسىن دا قالىس قالدىرعان جوقپىن. ايتىستىڭ ۇيىمداستىرۋ فورماتى وسىلايشا قىرىق قۇبىلعانمەن، اتالعان بىردە ءبىر ءتۇردىڭ عۇمىرى ۇزاققا بارا قويعان جوق. بۇل، بىرىنشىدەن، كلاسسيكالىق ايتىستى ەشتەڭەمەن الماستىرۋ مۇمكىن ەمەستىگىنە دالەل دەپ بىلەمىن. ەكىنشىدەن، ءسوزدىڭ شىنى كەرەك، كوبى ءبىر ساتتىك ءساتسىز تاجىريبەلەر- تۇعىن. ونىڭ ۇستىنە قوعامدا ايتىسقا دەگەن قىسىمشىلىق ورىن الدى، بۇل ايتىستىڭ تەلەديداردان كورىنۋىنە، كورىنە قالعاننىڭ وزىندە، تولىق بەرىلمەۋىنە اكەلىپ سوقتىردى. وسى جەردەگى باستى اقيقات - حالىق قانداي جاعدايدا دا ايتىستان الىستاعان جوق. حالىقتىق ونەردىڭ قاي- قايسىسى دا ءدال ايتىستاي اۋديتوريا جيناي المايتىنى ايداي اقيقات.

 
ايتىسكەرلەر كىمدى الداپ ءجۇر؟

 بازبىرەۋلەر ايتىپ جۇرگەندەي، ايتىس تۇرالاعان جوق. ايتىس الەمىندە جاستاردىڭ لەگى كوپ. ايماقتاردا ايتىستار تۇراقتى ءوتىپ تۇرادى. ارينە، ولاردىڭ ءتۇرلى دەڭگەيدە وتەتىنىن جوققا شىعارا المايمىز. ءبىراق ءار ايتىستىڭ وزىنشە جاڭالىعى بولعانىنا نە جەتسىن! جاڭالىق دەمەكشى، مادەنيەت جانە سپورت مينيسترلىگى تاراپىنان «ۇلى دالانىڭ ءان مەن جىرى، اقىنداردىڭ جەتى قىرى» اتتى ايتىسكەرلەردىڭ رەسپۋبليكالىق تۋرى وتكىزىلەتىنى تۋرالى حاباردى قۋانا قولداعان حالىق الاشتىڭ ايماڭداي اقىندارىنان قۇرالعان ۇجىمنان ايىرىقشا جاڭالىق كۇتكەنى انىق. وسى ءۇمىت اقتالدى ما دەسەك، كوڭىلشەكتەرگە كۇمىلجىمەي، تۋراسىنا كوشەيىن، ۇنامادى. ايتىسقا سۋساپ بارعان قاۋىمعا اقىندار جەتى قىرى تۇرماق، ءجوندى ايتىس كورسەتىپ جارىتپادى. سارانىڭ اجە تۋرالى ەسترادالىق ءانى دە، كەش قوناعى د. بولاتوۆتىڭ گيتارمەن ورىنداعان بالعىنبەكتىڭ سوزىنە جازىلعان جاڭا ءان دە «ايتۋلى اقىندار جازدى» دەيتىندەي ەمەس، ورتاڭقول دۇنيەلەر.

 

 وعان قاراعاندا جۇرتشىلىق جانداربەك پەن بالعىنبەكتىڭ جارىسا جىر وقۋىن جاقسى قابىلدادى. اسىرەسە، ايتاقىن ۇلىنىڭ الەۋمەتتىك جەلى ارقىلى كەڭىنەن تانىمال «كەشىرىم» ، « قىزىم، ساعان ايتامىن» ولەڭدەرىن ءوز وقۋىندا تاعى ءبىر تىڭداۋ ارتىقتىق ەتكەن جوق.

 ءبىراق قوس اقىننىڭ ءازىل اڭگىمەلەرىن ءساتتى دەي الماسپىز. ەل اراسىندا «اقىندار ايتتى» دەگەن تاپقىر سوزدەر جەتەرلىك، ايتىسكەر اقىن سەرىكزات دۇيسەنعازيننىڭ جيناۋىندا دا ءبىرشاماسى بارىن ءبىلۋشى ەك. ءبىراق بالعىنبەكتىڭ ايتارى ەسەنقۇلدىڭ «بايتال» تۋراسىنداعى سوزدەرىنەن اسپاعانى وكىنىشتى.

 اقىنداردىڭ ءتۇرلى ايتىستاردا ايتىلعان ولەڭدەرىن توپتاستىرا تولعاۋلارىن دۇرىس دەلىك. ءبىراق ايتىسسۇيەر قاۋىم ءۇشىن كوپكە تانىس دۇنيەلەر بولعاندىقتان، اسا ءوتىمدى بولمادى- اۋ. ايتپەسە،

 - ويپىرماي، ءبىزدىڭ ەلدە فۋتبولشىعا

مەملەكەتتىڭ قۇرمەتى نەتكەن بولەك.

كەم دەگەندە 30 مىڭ دوللار الىپ،

ايلىقتارى اسپانعا كەتتى ورمەلەپ.

سونشا اقشا الاتىنداي فۋتبولشىلار

سول دوپتى جەتىستىرىپ تەپكەن دە جوق،

ال ەندى ارىپ اشىپ ۇستازدار ءجۇر

 ەلىنىڭ ەرتەڭى ءۇشىن ەتكەن كومەك، - دەپ كەلەتىن جانداربەك تولعاۋىنىڭ شۇرايلىلىعىنا شەك كەلتىرمەيمىز.

 كەشتىڭ ءانشى داۋلەتتەن وزگە تاعى ءبىر قوناعى - تارازدىق اقىن ءا. دۇيسەبايەۆ. ايتىسكەرلىگىنەن انشىلىگى باسىم اسەتتىڭ ەسىمى ايتىسسۇيەر جۇرتشىلىققا جاقسى تانىس بولسا كەرەك. ءبىراق بۇل جولى اسەتتىڭ ارقىراعان ارىنى اشىلمادى. ءوز باۋىرىم بولسا قايتەيىن، اسەتكە قارسىلاس بولعان مۇرادىم دا ماندىتپادى.

 وسى جوبانىڭ قايىرىمدىلىق شاراسى كەش بارىسىنىڭ كەم- كەتىگىن جاۋىپ، تىگىسىن جاتقىزعان ىزگى ءىس بولدى.

 ءالقيسسا، كەشتىڭ قۇلمامبەت ايتىسپەن تۇيىندەلەتىنى بەلگىلى بولدى. «تابان استى جاۋاپتاسۋدان تۇراتىن ايتىستىڭ بۇل ءتۇرى كەشتى جانداندىرىپ بىتىرەر» دەپ كوڭىلدەنە باستاپ ەك، بۇل قۋانىشىمىز كوپ وتپەي، سۋ سەپكەندەي باسىلدى. سارانىڭ اۋزىن اشىپ، «پرەزيدەنتكە كەلىن دەپ» جانداربەكتىڭ كوپ تيىسەتىنىن ايتا باستاعانىنان، بۇل كۇنى كەشەگى بالعىنبەكتىڭ شىعارماشىلىق كەشىنەن سوزبە ءسوز قايتالاۋ ەكەنىن ۇعۋ قيىن ەمەس- ءتى. سوڭعى جاعىنا عانا اقىندار از- مۇز جايتتاردى قوسقانداي بولدى. ءبىراق سونىڭ قوسىلماعانى دا دۇرىس ەدى. سەبەبى «پلاۆكي، دامبالدىڭ» ( كەشىرەرسىزدەر، مەنىڭ ءسوزىم ەمەس) اينالاسىنداعى اڭگىمەدەن نە ابىروي؟ جانداربەك تاپقان «يماندى ايعىر» دەگەن قولدانىس كوركەمدىك بولىپ پا؟

 «رۋحاني كەش» دەپ اتالعانىمەن، اتىنا ساي اتىنا ساي تۇشىمدى اڭگىمە دە بولا قويعان جوق. وسىدان- اق كەش دەڭگەيىن سارالاي بەرىڭىز.

 «اقىنداردىڭ جەتى قىرى» دەگەن ءسوز كوپ ايتىلدى. جالپى سينكرەتتىك ونەر ايتىستىڭ وكىلدەرىنە «جەتى قىر» دەگەن ءسوز اسا تاڭسىق بولماسا كەرەك. ايتىسسۇيەر قاۋىم امانجولدىڭ عالىمدىعى مەن سال- سەرىلىگىن، جوعارىدا اتالعان سەرىكزاتتىڭ ۇستازدىعى مەن اۋدارماشىلىعىن، داۋلەتكەرەيدىڭ جازبا اقىندىعى مەن ساياتشىلىعىن، ديداردىڭ ءانشى- تەرمەشىلىگىن جاقسى بىلەدى.

 جالپى «اقىندىقتىڭ جەتى قىرى» دەپ ات قويىپ، ايدار تاعىپ، تەك ءتورت اقىندى بولەكتەۋدىڭ قانشالىقتى قاجەتتىگى بولدى؟ اينۇر مەن بالعىنبەكتىڭ شىعارماشىلىق كەشتەرى استانادا جوعارى دەڭگەيدە ءوتتى، ال مىنا جوبا نەگە جەتىم قىزدىڭ تويىنداي؟ الدە «الشاقتا جاتقان ايماقتارعا ءبارى دە جاراي بەرەدى» دەگەن پاسىق كوزقاراس پا؟ الدە بۇل ايتىس تۋرالى بەيحابار اۋديتورياعا ارنالعان جوبا ما؟ جالپى جوبا اتاۋلىعا ماعىنالى مازمۇنى، جۇيەلى سەناريى بەكىتىلمەي، قالايشا قارجى بولىنەدى؟ ءبىز فونوگراممالى انشىلەرگە وكپە ارتامىز، ال التى الاش الاقانىندا ايالاعان اقىنداردىڭ تانىمالدىقتارىن مالدانعان مىنا ارەكەتىن قالاي باعامدايمىز؟ باسقاسى باسقا، مينيسترلىككە تيەسىلى جوبا بولا تۇرا، نە جەرگىلىكتى بيلىكتىڭ، نە مادەنيەت باسقارماسى وكىلدەرىنىڭ بۇل كەشكە باس سۇقپاۋى قالاي؟ .. .

 
 دينارا قىدىرباي قىزى

ورال قالاسى

qalamger.kz


باستى سوزدەر: مادةنيةت, قوعام,
:ءبولىسۋ

اأتور:

novasa

ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049
مۇراعات