جىنىستىق قۋات
جەر بەتىندەگى ءومىردىڭ ءوزى - ءار ءتۇرلى ءومىر پىشىندەرىنىڭ اراسىنداعى قاراما-قايشىلى قۋاتتاردىڭ ماڭگىلىك الماسۋىنىڭ ناتيجەسى. بۇل قۋاتتىڭ ءتان مەن كوڭىل كۇي تاراپىندا قانداي كورىنىس بەرەتىنىن جاقسى بىلەسىز. الايدا بۇكىل ءومىر، بارلىق قارىم-قاتىناس تەك سەكسكە تىرەلىپ تۇرادى، اقىرعى ناتيجە تەك ءلاززات الۋ دەۋ اعاتتىق.
ءبىر جاننىڭ ەكىنشىسىنە تارتىلعان كەزدە تۋىندايتىن رۋحاني سۇرانىسىن سەكسپەن، جابايى قاتىناسپەن سالىستىرۋعا بولمايدى.
جەر بەتىندەگى ايەل مەن ەركەك - عالامدا كۇندەلىكتى بوپ تۇراتىن ەكى مەرەكە. ادامدار ۇلى قۋانىش ءۇشىن، تۋىندىگەر رەتىندە ءوز باقىتىن سەزىنۋگە جارالعان. ءومىرىڭىز ويىڭىزعا تاۋەلدى. مەرەكە جىلىنا ءبىر رەت قانا دەپ شەكتەپ قويساڭىز، جىل بويى كۇيبەڭ تىرلىك كەشۋگە تۋرا كەلەدى. تاڭداڭىز: كۇندە مەرەكە جاساۋ نە جىلىنا ءبىر رەت قانا. جەر بەتىندەگى قۋات وزگەرمەلى، ءومىرىڭىزدى كۇندە مەرەكەلەۋگە تىيىم سالماڭىز. ءسىزدىڭ ويدان جاڭا ءومىر تۋىندايدى.
ايەل قۋات رەتىندە - مەرەكە. ونىڭ ومىرلىك ماقساتى سول - قۋاتى مەن تىلەگىن ەرىنە سىيلاۋ، ونىڭ ءىس-ارەكەتىنە بەرەكە تىلەۋ. ايەل دەگەن گۇل. ونى بۇكىل عالام الاقانىنا ساپ ايالايدى، جىلىتادى. ول ەرى مەن بالالارىنىڭ جان جارىعىن جاقسىن، وشاعىنىڭ وتىن وشىرمەسىن دەيدى. ايەل ءومىر گۇلى رەتىندە، سۇلۋلىق پەن ۇيلەسىم گۇلى بولىپ، ماحاببات پەن باس يۋ نىسانى رەتىندە كۇن سايىن تازا، ساف سىڭعىرلاعان قۋات رەتىندە - كوز توقتاتا ىڭكار بولۋعا، شىن نيەتپەن ىنتىق بولۋعا، ول ءۇشىن كۇرەسۋگە، قادىرلەۋگە، ساقتاپ، قامقور بولۋعا ابدەن لايىق.
ۆەدالىق داستۇردە ايەل جەر-انا رەتىندە باعالانادى.
سوندىقتان ايەلدى كورگەندە عالامدىق انانى كورگەنىڭىز. مۇنداي قارىم-قاتىناس بالا كۇننەن سىڭەدى. ايەلدى كورگەندە بۇل انا دەگەن وي تۋادى. ايەلدىڭ انالىق قاسيەتى وتە ماڭىزدى. مەيىرىم، سۇيىسپەنشىلىك، جان جىلۋى. ادامنىڭ ءبارى انانىڭ قۇشاعىندا تىنىشتالادى. سەبەبى، انا دەگەن - ءبارىنىڭ باستاۋى مەن سوڭى. ودان ارتىق ەشتەڭە جوق.
ادامنىڭ جان تىنىشتىعىن سيپاتتايتىن كوپتەگەن تەرميندەر تولىپ جاتىر. بۇل ادام ءومىرىن تاڭعاجايىپ ەتەدى. ونىڭ ءبارى ايەلدىڭ بولمىسىمەن سيپاتتالادى. ەر ادام ءبىر ءوزى وتباسىن نە قوعامدى قۇرا المايدى. ايەل شاڭىراقتى تۋدىرادى. ايتپەسە، بۇل تەك عيمارات قانا بوپ قالادى. ايەل ەنگەندە عانا ول ۇيگە اينالادى. تەك مەيىرىم، ماحاببات، انانىڭ قامقورلىعى عانا عيماراتتى ءۇي ەتەدى.
وتباسىندا ەرلەر ەردىڭ قۋاتىن، ايەل ايەلدىڭ قۋاتىن سيپاتتايدى. ەكى قاراما-قايشىلى قۋات قوسىلىپ، ءبىرتۇتاس شەڭبەرگە اينالادى. وتباسىلىق ءومىردى باستاپ، بىرتىندەپ ەركەك ايەلىنەن عارىشتىق انانى كورەدى... ايەل ەرىنەن تولىسقان عارىشتىق سانانى كورەدى. بىرتە-بىرتە ادام رەتىندەگى ءبولىنىس جويىلىپ، ەكەۋىنىڭ رۋحاني بايلانىسى عارىشتىق قۋاتقا اينالادى. ياعني، وتباسىلىق قارىم-قاتىناس ارقىلى ەر مەن ايەلدىڭ جەر بەتىندەگى ميسسياسى تولىق ورىندالادى.
كريستينا حرويان
اۋدارعان شىنار ءابىلدا