قازاقستان حالىقارالىق كەدەن ستاندارتتارىن جەتىلدىرۋ جۇمىسىنا قاتىسپاق

نۇر- سۇلتان. قازاقپارات - قازاقستان حالىقارالىق كەدەن ستاندارتتارىن جەتىلدىرۋ جۇمىسىنا قاتىسۋعا نيەتتى. بۇل تۋرالى ق ر قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى ءومىرزاق بەيىسپەكوۆ ايتتى، دەپ حابارلايدى قازاقپارات ءتىلشىسى.

«قازاقستان بيزنەس- پروتسەستەردى سيفرلاندىرۋ بويىنشا اۋقىمدى جۇمىس جۇرگىزىپ جاتىر. 2018 -جىلدىڭ 1 - قاڭتارىنان «اسيكۋدا» ب ۇ ۇ يۋنكتاد تۇعىرناماسى نەگىزىندە قۇرىلعان «استانا-1» اقپاراتتىق جۇيەسىنە تاۋارلاردى ەلەكتروندىق دەكلاراتسيالاۋدى ەنگىزدى»، - دەدى ول ەركىن ەكونوميكالىق ايماقتار بويىنشا دۇنيەجۇزىلىك كەدەن ۇيىمىنىڭ وڭىرلىك فورۋمى بارىسىندا.

سونىمەن قاتار ول بيىلعى جىلدىڭ ساۋىرىندە قازاقستاندا «ەكسپورتتىق- يمپورتتىق وپەراتسيالار بويىنشا ءبىر تەرەزە» اقپاراتتىق جۇيەسى ەنگىزىلگەنىن ايتتى. اتالعان جۇيە «ءبىرىڭعاي تەرەزە» بويىنشا دۇنيەجۇزىلىك كەدەن ۇيىمىنىڭ ستاندارتتارى مەن كومپەنديۋمدارى نەگىزىندە ازىرلەنگەن.

«قازىرگى ۋاقىتتا سىرتقى ەكونوميكالىق قىزمەت پەن ەركىن ەكونوميكالىق ايماققا قاتىسۋشىلار اتالعان جۇيە ارقىلى بارلىق رۇقسات قۇجاتتارىن الادى. ول 13 اقپاراتتىق رەسۋرستى بىرىكتىرەدى جانە قازاقستاننىڭ 11 مەملەكەتتىك اقپاراتتىق جۇيەسىمەن ىقپالداستىرىلعان»، - دەدى كوميتەت ءتوراعاسىنىڭ ورىنباسارى.

ءو. بەيىسپەكوۆ ق ر ق م مەملەكەتتىك كىرىستەر كوميتەتى دۇنيەجۇزىلىك كەدەن ۇيىمى مەن حالىقارالىق كەدەن قوعامداستىعىنىڭ ەركىن ايماقتاردى اكىمشىلەۋ سالاسىنداعى حالىقارالىق كەدەن ستاندارتتارىن ازىرلەۋ مەن ودان ارى جەتىلدىرۋگە باعىتتالعان شارالارىنا كەز كەلگەن كومەك كورسەتۋگە دايىن ەكەندىگىن ايتتى.

 ايتا كەتەيىك، ءۇش كۇنگە سوزىلاتىن فورۋمعا 30-دان استام ەلدىڭ، دۇنيەجۇزىلىك كەدەن ۇيىمىنىڭ، ا ق ش حالىقارالىق دامۋ اگەنتتىگىنىڭ، ەۋروپالىق كوميسسيانىڭ، مۇددەلى مەملەكەتتىك ورگانداردىڭ وكىلدەرى قاتىسىپ جاتىر.

اۆتور: مارلان جيەمباي