ءماجىلىس يادرولىق قارۋدى ساتىپ الۋعا تىيىم سالاتىن قۇجاتتى ماقۇلدادى

نۇر-سۇلتان. قازاقپارات - ق ر پارلامەنتى ءماجىلىسىنىڭ جالپى وتىرىسىندا «يادرولىق قارۋعا تىيىم سالۋ تۋرالى شارتتى راتيفيكاتسيالاۋ تۋرالى» زاڭ جوباسى ماقۇلداندى، دەپ حابارلايدى قازاقپارات ءتىلشىسى.

«شارت بۇرىن تىيىم سالىنباعان جاپپاي قىرىپ-جويۋ قارۋلارىنىڭ سوڭعى ءتۇرى - يادرولىق قارۋعا زاڭدى تۇرعىدا تىيىم سالاتىن تاريحتاعى العاشقى حالىقارالىق قۇجات بولىپ سانالادى. ءوز كەزەگىندە يادرولىق قارۋعا زاڭدى تۇرعىدا تىيىم سالۋ - يادرولىق قارۋدىڭ تولىق جويىلۋى ءۇشىن قاجەتتى العاشقى قادام رەتىندە قاستىرىلىپ وتىر. شارت يادرولىق قارۋ نەمەسە يادرولىق جارىلعىش قۇرىلعىنى ءوندىرۋ، سىناۋ، ساتىپ الۋ، بەرۋ، ساقتاۋ جانە ءوز اۋماعىندا ورنالاستىرۋعا تىكىلەي تىيىم سالادى. سونىمەن قاتار، شارتتىڭ ەرەجەلەرىنە سايكەس، يادرولىق قارۋدى پايدالانۋعا ءارى قولدانۋ تۇرعىسىنان قورقىتۋعا تىيىم سالىنعان»، - دەدى ق ر سىرتقى ىستەر ءمينيسترىنىڭ ورىنباسارى ەرجان اشىقبايەۆ.

ونىڭ سوزىنە قاراعاندا، اتالعان شارت 2017-جىلعى 20- قىركۇيەكتەن باستاپ نيۋ-يوركتەگى ب ۇ ۇ باس اسسامبلەياسىنىڭ 72-سەسسياسى اياسىندا قول قويىلۋى ءۇشىن اشىلدى.

سونىمەن قاتار، 50 مەملەكەت راتيفيكاتسيالاعاننان كەيىن كۇشىنە ەنەتىن بولادى. قازىرگى ۋاقىتتا شارتقا 70 مەملەكەت قول قويدى، 23 مەملەكەت راتيفيكاتسيالادى. باعامدار بويىنشا شارتتىڭ كۇشىنە ەنۋى 4-5 جىلعا سوزىلۋى مۇمكىن.

«ەلباسى نۇرسۇلتان نازاربايەۆتىڭ 2045-جىلعا قاراي يادرولىق قارۋسىز الەم قۇرۋ يدەياسى ءسوزسىز قازاقستاننىڭ باستى سىرتقى ساياسي باستامالارىنىڭ ءبىرى بولىپ سانالادى. شارتتىڭ تەز ارادا كۇشىنە ەنۋىنە جاردەمدەسۋ - بۇل جوعارى مىندەتكە قول جەتكىزۋدىڭ ماڭىزدى ەلەمەنتتەرىنىڭ ءبىرى. قۇجاتتى قابىلداۋ يادرولىق قارۋسىزدانۋ ۇردىسىندە كوپتەگەن جىلدارعا سوزىلعان توقىراۋعا جانە يادرولىق دەرجاۆالاردىڭ بۇل ماسەلە بويىنشا ورتاق ءپاتۋا تابا الماۋىنا جاۋاپ رەتىندە، ياعني يادرولىق ەمەس مەملەكەتتەر تاراپىنان قابىلدانعان ءماجبۇرلى شارا رەتىندە قاراستىرىلۋدا. سوڭعى ەكى ونجىلدىقتا يادرولىق قارۋسىزدانۋ سالاسىندا ايتارلىقتاي پروگرەستىڭ جوقتىعى بايقالىپ وتىر. يادرولىق سىناقتاردىڭ توقتاتىلۋىنا قاراماستان، قارۋ-جاراقتىڭ جاڭا تۇرلەرىن شىعارۋ جانە ولاردى جەتكىزۋ قۇرالدارىن جەتىلدىرۋ ماسەلەسى ءالى وزەكتى. بۇل ءوز كەزەگىندە يادرولىق قارۋدى تاراتپاۋ تۋرالى شارتتىڭ 6-بابىنا قايشى كەلەدى»، - دەدى ءمينيستردىڭ ورىنباسارى.

«سەمەي سىناق پوليگونىن جابۋ تۋرالى ەلباسىنىڭ تاريحي شەشىمى قازاقستان حالقىنىڭ كەڭ قولداۋىنا يە. شارتتى راتيفيكاتسيالاۋ قازاقستاننىڭ يادرولىق قارۋسىزدانۋ سالاسىنداعى باستامالارىمەن تولىقتاي سايكەس كەلەدى. وسى زاڭ جوباسىن قابىلداۋ رەسپۋبليكالىق جانە جەرگىلىكتى بيۋدجەتتەردەن قوسىمشا قاراجات ءبولۋدى تالاپ ەتپەيدى»، - دەدى ەرجان اشىقبايەۆ.

اۆتور: رۋسلان عابباسوۆ