قازاقستاندىقتار اۆتوكولىك ساتىپ الۋ بويىنشا رەكورد ورناتتى
«قازاقستان ەكونوميكاسىنىڭ ءوسىم قارقىنى 4 پايىزدىق دەڭگەيدى ساقتاۋدا. ۆاليۋتا باعامى تۇراقتى. وسى فاكتورلاردىڭ ارقاسىندا 2016-جىلدان بەرى جاڭارماعان رەكوردتىڭ سەڭى بۇزىلىپ، ءبىر ايدىڭ ىشىندە 52 ميلليارد تەڭگەگە 5,5 مىڭ اۆتوكولىك ساتىپ الىندى. ساتىلىپ الىنعان كولىكتەردىڭ 58,6 پايىزى وتاندىق وندىرىسكە تيەسىلى. جەڭىلدەتىلگەن اۆتونەسيە بويىنشا مەملەكەتتىك باعدارلامانىڭ ارقاسىندا بالكىم بۇل رەكوردتىق كورسەتكىش قايتادان مامىر ايىندا جاڭاراتىن سەكىلدى»، - دەيدى قاز اۆتو وندىرىس» اۆتوكولىك سالاسىنداعى كاسىپورىندار وداعىنىڭ ديرەكتورلار كەڭەسىنىڭ ءتوراعاسى ولەگ الفەروۆ.
وسى جىلدىڭ قاڭتار-ءساۋىر ايلارىندا ەلىمىزدەگى رەسمي ديللەرلەر 18838 كولىك ساتىپ، وتكەن جىلدىڭ ءتيىستى مەرزىمىنە قاراعاندا 20,5 پايىزدىق وسىمگە قول جەتكىزگەن. ەسەپ بەرىلىپ وتىرعان كەزەڭدە ەل تۇرعىندارى تەمىر تۇلپار ءمىنۋ ءۇشىن 172,8 ميلليارد تەڭگە ($456,7 ميلليون) جۇمساپتى (2018-جىلدىڭ ءتيىستى كورسەتكىشىنەن 41,3 پايىزعا ارتىق).
«وسى ارالىقتا 10449 ساتىپ الۋشى قازاقستاندىق اۆتوزاۋىتتان شىققان كولىكتەردى تاڭداعان. ال 8389 كولىك يمپورتقا تيەسىلى. سونىمەن بىرگە، ءساۋىر ايىندا قازاقستاندىق اۆتووندىرىس نارىقتىڭ 58,6 پايىزدىق ۇلەسىنە يە بولىپ، رەكورد كورسەتتى»، - دەيدى ولەگ الفەروۆ.
2019-جىلدىڭ 4 ايىنىڭ قورىتىندىسى بويىنشا، قازاقستاندىقتاردىڭ سۇرانىسىنا يە كولىك برەندتەرىنىڭ تورتتىگىن Lada باستاپ تۇر. 4 ايدا اتالمىش ماركامەن 4743 كولىك ساۋدالانعان. Toyota مودەلدى ساتىلعان كولىكتەردىڭ سانى 4115. ءۇشىنشى پوزيتسيا 3450 داناسى ساتىلعان Hyundai ماركاسىنىڭ ەنشىسىندە. ۇزدىك بەستىك KI (1259) مەن GAZ (682 ) تۇيىندەيدى.
ال TOP-10 كوشىنە سونىمەن بىرگە Renault (643) ، Nissan (611) ، UAZ (546) ، Lexus (496) جانە Volkswagen 480 ەنگەن.