قازاققا تۇرمىسقا شىعىپ، ەكى ۇل تۋعان مارينا ۆولنوۆا بوكسقا قايتا ورالدى

نۇر-سۇلتان. قازاقپارات - بوكستان لوندون وليمپياداسىنىڭ قولا جۇلدەگەرى، الەم چەمپيوناتتارىنىڭ كۇمىسى مەن قولا مەدالىن يەلەنگەن مارينا ۆولنوۆا اراعا ءبىراز ءۇزىلىس سالىپ، ۇلكەن بوكسقا قايتا ورالدى.

وتاندىق بوكسشى شىمكەنتتە باستالاتىن قازاقستان سپارتاكياداسىندا باق سىناپ كورمەك. ول شارشى الاڭعا قايتا ورالۋىنىڭ سەبەبىن ءتۇسىندىردى دەپ جازادى Olimpic.kz.

«اراعا بەس جىلداي ۋاقىت سالىپ، شارشى الاڭعا قايتا ورالدىم. بۇل شەشىمىمدى جولداسىم، اتا-ەنەم، اكەم، بارلىعى قولدادى.

كومانداعا قايتا قوسىلاتىنىمدى ەستىگەن بوكسشى قىزدار دا لەبىزدەرىن اياماي جاتىر.

بۇرىن 75 كەلىدە باق سىناعانمىن. ەندى 69 كەلىدە جۇدىرىقتاسىپ كورەمىن»، - دەيدى ول.

ۆولنوۆا ءۇش جارىم جىل بويى ەشقانداي جاتتىعۋ جاساماعانىن دا جايىپ سالدى.

«ءتىپتى، جۇگىرگەن جوقپىن... ۋاقىت وتە كەلە، بوكستىڭ ماعان قاجەت ەكەنىن ءتۇسىندىم. ءالى شامام بار، سوندىقتان، ءوزىمدى قايراپ، سىناپ كورمەكپىن.

جالپى بوكستان الشاقتاپ قالعانىمنىڭ سەبەپتەرى بار. لوندون وليمپياداسىنان سوڭ تۇرمىسقا شىقتىم، شەكەسى تورسىقتاي ەكى ۇلدى دۇنيەگە اكەلدىم. بۇگىندە ۇلكەنىم 4 جاستا، كىشى ۇلىم ەكىدەن استى.

زاتىم ايەل بولعاندىقتان سولاردىڭ تاربيەسىنە ءمان بەرىپ، ۇيدە وتىرۋدى ءجون سانادىم. بۇگىندە ۇلدارىم ءوسىپ كەلەدى. ال مەنى شارشى الاڭ قايتا شاقىرىپ جاتىر (كۇلدى)»، - دەپ اعىنان جارىلدى بوكسشى ارۋ.