ا ق ش- تان كەلگەن مامان تۇركىستاندىق دارىگەرلەرگە شەبەرلىك ساباعىن وتكىزدى
شەتەلدىك مامان تۇركىستان وبلىسىنىڭ دارىگەرلەرىنە قيىن جاعدايدا تۇسكەن ناۋقاستارعا شۇعىل كومەك كورسەتۋ بويىنشا شەبەرلىك ساباعىن وتكىزدى، دەپ حابارلايدى قازاقپارات ءتىلشىسى.
وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ ارنايى شاقىرتۋىمەن كەلگەن كاسىبي مامان الاباما شتاتىندا جەدەل مەديتسينالىق، جەتىلدىرىلگەن جانە تاكتيكالىق شۇعىل مەديتسينالىق كومەك سالاسىندا قىزمەت كورسەتەدى. ول تۇركىستان قالاسىنىڭ ەمحاناسىندا امەريكالىق BLS، ALSD تەحنولوگياسى بويىنشا ساباق ءوتتى. ءوڭىردىڭ فەلدشەرلەرى مەن مەدبيكەلەرىنە، رەانيماتولوگتارى مەن ج ت د دارىگەرلەرىنە بۇرىن سوڭدى بولماعان مۇمكىندىكتەردى كورسەتتى.
«بۇگىنگى تاڭدا العاشقى مەديتسينالىق كومەك كورسەتۋ ادام ءومىرىن قۇتقارۋدا باستى رولگە يە. شەتەلدىك مامان ءبىزدىڭ دارىگەرلەرىمىزگە بۇل تەحنولوگيانى سوڭعى حالىقارالىق ستاندارتتار بويىنشا وقىتاتىن بولادى. ياعني، قيىن جاعدايلاردا شۇعىل كومەك كورسەتۋ بويىنشا ءبىزدىڭ دارىگەرلەرىمىزدىڭ كاسىبي دەڭگەيى ودان دا جوعارى بولادى دەگەن ءسوز»، - دەيدى تۇركىستان قالالىق ەمحاناسىنىڭ باس دارىگەرى جانار وسپانوۆا.
ريچارد چارلز اتى الەمگە ايگىلى فەلدشەر، رەانيماتولوگ، حالىقارالىق دەڭگەيدەگى نۇسقاۋشى جانە جاتتىقتىرۋشى. ول الاباما شتاتىندا مەديتسينالىق كومەك كورپوراتسياسىندا جۇمىس ىستەيدى. 22 جىلدان استام ۋاقىت ىشىندە دوكتور ا ق ش- تان تىس ەلدەردە بىرنەشە شەبەرلىك ساباقتارىن وتكىزىپ ءجۇر. بۇل جولى دارىگەر قۇرلىق اسپاس بۇرىن، قازاق ۇلتىنىڭ ادەت-عۇرپى مەن ەرەكشەلىكتەرى جايلى سۇراستىرىپ، بىلگەن. ساپارى اياسىندا ول جەرگىلىكتى دارىگەرلەرگە ءارتۇرلى مەديتسينالىق مۋلياجداردى سىيعا تارتتى.
«قازاقستانعا العاش رەت كەلدىم. تۇركىستان ماعان قاتتى ۇنادى. تاريحي ەسكەرتكىشتەرگە باي، كونە شاھارلارى بار ءسىزدىڭ حالىق باقىتتى ەكەن. اتا-بابا رۋحىن سەزىنە الاتىنداي وسىنداي تاماشا ايماقتا تۇرىپ جاتقان حالىقتىڭ جولى بولعىش دەپ ويلايمىن. مەنى دارىگەرلەردىڭ كاسىبيلىك دەڭگەيى دە قۋانتتى. باستى ماقساتىم - مەيلىنشە كوپ مامانعا ادام ءومىرىن ساقتاۋدى ۇيرەتۋ»، - دەيدى ريچارد چارلز.