قازاقتىڭ تۇڭعىش فوتوگرافى كىم؟

نۇر-سۇلتان. قازاقپارات - قازىر ءبارى فوتوگراف. اسىرەسە قىزدار. ءبىراق كاسىبي ەمەس. دەگەنمەن، بۇگىندە بۇل كاسىپتى كادىمگىدەي يگەرگەن قازاقتار از ەمەس.

اقىن شاڭگەرەي بوكەيەۆ تۋرالى بۇرىن ەستۋشى ەدىم. جاقىندا ءومىرى مەن شىعارماشىلىعىمەن جاقسى تانىسىپ الدىم. ءبىرقاتار قىزىقتى مالىمەتتەر كەزدەستى.

شاڭگەرەي - جاڭگىر حاننىڭ نەمەرەسى. كادەت كورپۋسىنا وقۋعا ءتۇسىپ، ونى 2 جىلدان كەيىن تاستاپ كەتكەن. ودان كەيىن سامارا گۋبەرنياسىنداعى سوت مەكەمەلەرىنىڭ بىرىندە قىزمەت جاسايدى. كوپ ۇزاماي بۇل جۇمىسىن دا تاستاپ، ەلگە قايتادى. ءومىرىنىڭ سوڭىنا دەيىن تۋعان ولكەسىندە عۇمىر كەشەدى.

حاندىق ءداۋىردى اڭساۋشى بولسا دا، جاڭاشىلدىققا مىقتى قۇمار كىسى بولىپتى. بىرنەشە زەرتتەۋشىلەر ونى «قازاقتىڭ تۇڭعىش كاسىبي فوتوگرافى» دەپ اتايدى. شاڭگەرەي پەتەربۋرقا بارعان ءبىر ساپارىندا وزىمەن بىرگە فوتوقۇرىلعى الىپ كەلەدى. ۇيىنە كەلگەن قوناقتار مەن اعايىن- تۋىستارىن فوتوقۇرىلعى الدىنا وتىرعىزىپ قويىپ، ۇزاق ۇستايدى ەكەن. اۆتوبيوگرافتار بۇنى «فوتوگرافيانى كاسىپ ەمەس، ونەر دەپ ۇققان ادامنىڭ تىرلىگى» - دەپ تۇسىندىرەدى.

ول - ول ما، اقىن اتامىز ۆەلوسيپەدكە دە قىزىعۋشىلىق تانىتقان. ن. ماناي ۇلىنىڭ ايتۋىنشا، شاڭگەرەي ءوز ورداسىندا مولدا دا ۇستاعان. ءبىراق ونىڭ مولداسى باسقا قازاقتىكىندەي مۇرتىن تاڭقيتا قىرىپ، باسىنا سالدە وراپ، ءتاسبيعىن سارتىلداتىپ مۇلگىپ وتىرمايدى - ولەڭىن ايتىپ، دومبىراسىن تارتىپ، جۇرگەندە بەلساپەتپەن جۇرەدى.

اقىن مۋزىكانى دا قاتتى ۇناتقان. ءتىپتى ءوزىنىڭ فونوگرافى بولعان. مۋزىكانى تىنداعاندا بولمەنى قاراڭعىلاپ قويادى ەكەن. سونىمەن قاتار، ول سۋرەت ونەرىن دە جوعارى باعالاعان. مالسەۆ دەگەن سۋرەتشىنىڭ سۋرەت سالۋى ءۇشىن ءۇيدىڭ ساۋلەسى مەن كولەڭكەسى ۇيلەسپەگەندە، شاڭگەرەي ءوز ءۇيىنىڭ ءبىر بولمەسىنىڭ توبەسىن الدىرىپ تاستاعان.

اتامىز كوزى اشىق، كوكىرەگى وياۋ جاستاردىڭ تىلىمەن ايتقاندا «ءاردايىم ترەندتە» بولعان-اۋ شاماسى.

bugin.kz