اعىلشىن تىلىندە اڭگىمە جازعان وقۋشى ا ق ش- قا بارادى
اسپارۋح سۇلتانمۇرات ا ق ش مەملەكەتتىك دەپارتامەنتىنىڭ ءبىلىم جانە مادەنيەت باعدارلامالارى بيۋروسىنىڭ قولداۋىمەن ۇيىمداستىرىلعان «جەلىلەر اراسىندا: الەم جانە جازۋشىلىق تاجىريبە» اتتى ەكى اپتالىق باعدارلاماسىنىڭ جەڭىمپازدارىنىڭ ءبىرى اتاندى.
سونداي- اق ول ايوۆا ۋنيۆەرسيتەتىندە بيىلعى جىلدىڭ 13-27 - شىلدەسى ارالىعىندا وتەتىن كۋرسقا جولداما الدى. اعىلشىن ءتىلىنىڭ شەبەرلەرى مەن جازۋشىلىق قابىلەتى بار بالالاردىڭ باسىن قوساتىن وقۋ كۋرسىنا 15-18 جاستاعى 30 جاس ىرىكتەپ الىنعان.
«باعدارلاماعا قاتىسۋ ءۇشىن الدىمەن، بايقاۋدا ءوز قابىلەتىڭدى دالەلدەي الۋىڭ كەرەك. ول ءۇشىن ءارتۇرلى تاقىرىپتا اعىلشىن تىلىندە ەسسە جازۋ جانە 6-8 بەتتەن تۇراتىن پروزا نەمەسە پوەزيا جازۋ تاپسىرمالارى بەرىلدى. تاريح پانىنە قىزىعۋشىلىعىم جوعارى بولعاندىقتان تاريحي وقيعا جەلىسىندەگى دراما جازۋدى ۇيعاردىم.
«The Crimson Glow of Spring» اتتى شىعارمامدا رەسەي- فرانسۋز سوعىسىندا اكە- شەشەسىنەن ايىرىلعان بالانىڭ تاعدىرىن سۋرەتتەدىم. ول سۋرەت سالۋدى ۇناتادى جانە وزگەلەردىڭ ايتقانىنا قاراماستان سۇيىكتى ىسىمەن اينالىسۋدى توقتاتپايدى»، - دەيدى اسپارۋح.
وقۋشى اعىلشىن ءتىلىن ۇيرەنگەندى ەرەكشە جاقسى كورەدى. ويتكەنى، كوپتەگەن پايدالى دەرەكتەردى ءتۇپنۇسقادا مەڭگەرۋ ارقىلى ءبىرشاما مۇمكىندىكتەردى الۋعا بولاتىنىن ەسەپتەيدى. جەڭىمپازدىڭ ءتىلدى مەڭگەرۋدەگى ءبىلىمىن ارتتىرۋدا اعىلشىن ءتىلى ءپانى مۇعالىمى نۇرزادا ەرماعامبەتوۆا مەن شەت ءتىلى مۇعالىمى Jacob Labuschagne كوپ ەڭبەك سىڭىرگەن. زياتكەر بيىلعى جىلى IELTS ەمتيحانىنان 6,5 بالل جيناعان.
«باعدارلاما ماعان وتە پايدالى بولاتىنىنا سەنىمدىمىن. ويتكەنى ا ق ش- قا ساپار ەستەن كەتپەس اسەر مەن ءتىل مەڭگەرۋگە تاماشا مۇمكىندىك سىيلايتىنىنا ۇمىتتەنەمىن. كۋرس بارىسىندا العان ءبىلىمىمدى شەتەلدىك ۋنيۆەرسيتەتتەرگە ءبىلىم گرانتىنا ۇمىتكەر بولعاندا بارىنشا پايدالانامىن. اتالعان بايقاۋدا تەحنيكالىق تۇرعىدان كومەك بىلدىرگەن مەكتەبىمىزدەگى كاسىبي باعدار بەرۋ جونىندەگى كەڭەسشى ساۋلە الدابەرگەنوۆاعا، ءتىل مەڭگەرۋگە كومەك كورسەتكەن بارشا ۇستازدارىما العىس بىلدىرەمىن»، - دەيدى جاس قالامگەر.
اۆتور: ءلايلىم ءالىم