وڭتۇستىك كورەيالىق تۇلەكتەر باستى ەمتيحانعا قالاي دايىندالادى

نۇر-سۇلتان. قازاقپارات - ۇلتتىق ءبىرىڭعاي تەستىلەۋدىڭ بالاماسى وڭتۇستىك كورەيادا دا بار. ول وتە ماڭىزدى دەپ ەسەپتەلەدى، ويتكەنى شارا ادام تاعدىرىن انىقتاۋى مۇمكىن.

 سوندىقتان وعان دايىندىق بىرنەشە جىل وتەدى. وقۋشىلار كەشكە دەيىن ساباقتان تىس وقۋعا ءماجبۇر. وڭتۇستىك كورەيادا جوعارى وقۋ ورنىنا تۇسۋگە مۇمكىندىك بەرەتىن ەمتيحان جىلىنا ءبىر رەت، قاراشا ايىندا وتكىزىلەدى. ويتكەنى وسى ەلدە وقۋ جىلى ناۋرىزدا باستالادى.

مۇنداعى وقۋشىلار التىنشى سىنىپقا دەيىن باستاۋىش مەكتەپتە وقيدى. كەيىن توعىزىنشى سىنىپقا دەيىن ورتا مەكتەپتە ءبىلىم الادى. ال 9-12 - سىنىپتار جوعارى مەكتەپ دەپ اتالادى. ونىڭ دارەجەسى كوللەدجبەن پارا- پار. ورتا مەكتەپ وقۋشىسى كيم سۋ دجوننىڭ ەمتيحان تاپسىرۋعا ءالى ءۇش جىل ۋاقىتى بار، ءبىراق ول دايىندىقتى الدىن الا باستاپ كەتتى.

كيم سۋ دجون، سەۋل ق. ورتا مەكتەپ وقۋشىسى:

 - ۋنيۆەرسيتەتكە ءتۇسۋ ءۇشىن ماعان اۋەلى جوعارى مەكتەپكە ءوتۋ كەرەك. ولار قاراپايىم جانە ماماندىرىلعان بولىپ ەكىگە بولىنەدى. مەن ەكىنشىسىن، ياعني شەت ءتىلىن تەرەڭدەتىپ وقىتاتىن مەكتەپتى تاڭدادىم. ويتكەنى ونى بىتىرگەننەن كەيىن ۋنيۆەرسيتەتكە ءتۇسۋ وڭاي. مەن ون ساباقتان قورىتىندى ەمتيحان تاپسىرۋعا ءتيىسپىن. ولاردىڭ ىشىندە - ەتيكا، كورەي جانە اعىلشىن تىلدەرى، ماتەماتيكا، قوعامتانۋ مەن عىلىم پاندەرى بار.

 تۇلەكتەر سىناق تاپسىرار ساتتە ولارمەن بىرگە جاقىندارى دا ىلەسىپ كەلىپ بارىنشا قولداۋ كورسەتەدى. سول كۇنى قالادا جول قوزعالىسى شەكتەلەدى. ەمتيحان تاڭعى سەگىزدەن كەشكى ساعات بەسكە دەيىن جالعاسادى. ۇمىتكەرلەر تەستىلەۋدە نەعۇرلىم كوپ بالل جيناسا، ۋنيۆەرسيتەتكە ءتۇسۋ مۇمكىندىگى دە سوعۇرلىم كوپ بولادى.

كيم سۋ دجون، سەۋل ق. ورتا مەكتەپ وقۋشىسى:

 - ۋنيۆەرسيتەتكە ءتۇسۋ كەزىندە ەمتيحان ناتيجەلەرىمەن بىرگە مەكتەپ ىشىندەگى ءتۇرلى جارىستار مەن بايقاۋلارعا قاتىسۋ كورسەتكىشى، ءتىپتى وقىلعان كىتاپتاردىڭ سانى دا ەسكەرىلەدى. ءار شاھاردا جاقسى ۋنيۆەرسيتەتتەر بار. دەسە دە سەۋل، پۋسان جانە تەدجون قالالارىنداعى جوعارى وقۋ ورىندارىنا ءتۇسۋ كەز كەلگەن تۇلەكتىڭ ارمانى. ارينە، ىرىكتەۋدەن ءوتۋ وڭاي ەمەس. وزىمە كەلسەم، ءالى ناقتى شەشىم قابىلداعان جوقپىن.

 نەگىزگى ەمتيحاننان قۇلاۋ جاستار ءۇشىن وڭاي سوقپايدى. وڭتۇستىك كورەياداعى سۋيتسيدتەردىڭ نەگىزگى سەبەبى دە وسى. سۋنىندى بىرنەشە جىل قاتارىنان قايتالاپ تاپسىرۋعا بولادى. ءبىراق ۋنيۆەرسيتەت ديپلومى مىقتى كومپانيالاردا قىزمەت جاساۋعا جول اشپايدى. ونى دا ەسكەرۋ كەرەك.

ايتا كەتەيىك، بيىل ەلدە جۇمىسسىزدىق دەڭگەيى ءتورت جارىم پايىزعا جەتتى. ياعني ءبىر ميلليون ەكى ءجۇز مىڭنان استام ادام ەكى قولعا ءبىر كۇرەك تابا الماي ءجۇر.

www.24.kz