اۋىر جۇك تيەلگەن كولىكتى كورگەن تۇرعىندار قايدا شاعىمدانا الادى

نۇر- سۇلتان. قازاقپارات - كولىك كوميتەتى اۋىر جۇك تيەگەن كولىكتى كورگەن ازاماتتارعا ارناپ ارنايى جەلى اشتى، دەپ حابارلايدى قازاقپارات.

«اۆتوكولىك جولدارىن پايدالانۋ تالاپتارىن ساقتاۋدى قامتاماسىز ەتۋ ءۇشىن، كولىك كوميتەتىنىڭ احۋالدىق ورتالىعىندا سەنىم تەلەفونى مەن مەسسەندجەرلەر جۇمىس ىستەيدى. وعان تاۋلىكتىڭ كەز كەلگەن ۋاقىتىندا جۇگى اۋىر اۆتوكولىك قۇرالدارىنىڭ اۆتوموبيل جولدارىمەن ءجۇرىپ وتكەنى تۋرالى حابارلاما جىبەرۋگە بولادى»، - دەلىنگەن كوميتەتتىڭ حابارلاماسىندا.

 ۆەدومستۆونىڭ حابارلاۋىنشا، ەلىمىزدىڭ كەز كەلگەن ازاماتى نورمادان تىس جۇك تيەگەن كولىكتى كورسە،   77080880800 + ءنومىرى بويىنشا «Whatsapp» نەمەسە «Telegram»  مەسسەندجەرلەرىنە بەينەحابارلاما جىبەرە الادى.

جىبەرىلەتىن حابارلامادا كولىكتىڭ مەملەكەتتىك ءنومىرى، ءوتۋ ورنىن، اۆتوجول ۋچاسكەسى، جاقىن ەلدىمەكەن، اۋىر جۇك تيەگەن كولىكتىڭ ءجۇرىپ وتكەن كۇنى مەن ۋاقىتى مىندەتتى تۇردە كورسەتىلۋى قاجەت.

قوسىمشا سۇراقتار بويىنشا احۋالدىق ورتالىقتىڭ  983535 (7172)8 سەنىم تەلەفونىنا تاۋلىك بويى حابارلاسۋعا بولادى.

ەسكە سالا كەتسەك، وتكەن ايدىڭ سوڭىندا «قازجول ع ز ي» ا ق پرەزيدەنتى باعدات تەلتايەۆ جولدا بىلىكتەرىنە نورمادان ارتىق سالماق ءتۇسىرىپ، جۇرە بەرەتىن اۋىر جۇك كولىكتەرىنىڭ قىزمەتىنە قاتىستى ماسەلە كوتەرگەن بولاتىن.

«اۆتوكولىك جولدارىنىڭ بەرىكتىگىن ساقتاۋى، جوبالانعان مەرزىمدە قىزمەت كورسەتۋ، اۆتوكولىك جولدارىنا تۇسەتىن جۇكتەمە ماسەلەسى ءبىزدى تولعاندىرۋ كەرەك. مەن ءبىر انىقتاما بەرگەلى وتىرمىن: ءاربىر اۆتوكولىك جولىنىڭ توسەمەسىنىڭ قۇرىلىمى بەرىكتىككە سىنالادى. اۆتوكولىكتەردىڭ بەلگىلى ءبىر بىلىگىنىڭ ءوتۋىنىڭ (مىسالى بىرنەشە ميلليون) سانى سانالادى. قاراپ وتىرساڭىزدار، بىرنەشە بىلىكتى، قوس بىلىكتى كولىكتەر، بىلىگىنە كوپ جۇكتەمە تۇسەتىن كولىك تۇرلەرى جولىمىزدا ءجۇرىپ جاتىر. وسىنداي اۋىر جۇكتى كولىكتەردىڭ سالدارىنان جولدارىمىزدىڭ قىزمەت كورسەتۋ ۋاقىتى تومەندەپ كەتۋى مۇمكىن»، - دەگەن ەدى باعدات تەلتايەۆ و ك ق- دا وتكەن باسپا ءسوز ءماسليحاتىندا.

اۆتور: ايان بەكەن ۇلى