قاراعاندىلىق وقۋشى مەندەلەيەۆ وليمپياداسىندا قولا جۇلدە يەلەندى
اتالمىش زياتكەرلىك جارىستا قاراعاندىلىق ولجاس نۇرپەيىسوۆ ءۇشىنشى ورىنعا يە بولدى، دەپ حابارلايدى قازاقپارات ءتىلشىسى.
ولجاس نۇرپەيىسوۆ 1№ قاراعاندى «ءبىلىم يننوۆاتسيا» ليتسەيىنىڭ 11-سىنىبىندا وقيدى. ول مەندەلەيەۆ وليمپياداسىنا ەكىنشى رەت قاتىسۋدا. وتكەن جىلى ول وسى ءبىلىم دوداسىندا ەكىنشى ورىنعا يە بولعان. سونداي-اق، چەحيا مەن سلوۆاكيادا وتكەن وليمپياداعا قاتىسىپ، ءۇشىنشى ورىنعا يە بولدى.
بيىل مەندەلەيەۆ وليمپياداسىندا 28 ەلدەن 152 وقۋشى قاتىستى.
1№ «ءبىلىم يننوۆاتسيا» ليتسەيىنىڭ مالىمەتىنشە، بايقاۋدىڭ ءبىرىنشى كەزەڭنىڭ مىندەتتەرى ارنايى حيميالىق سىنىپتار باعدارلاماسىنا سايكەس بولعان. ەكىنشى تۋردا وقۋشىلار بەيورگانيكالىق، ورگانيكالىق، اناليتيكالىق، فيزيكالىق حيميا بويىنشا جوعارى دەڭگەيدەگى تاپسىرمالاردى شەشكەن. ءۇشىنشى تۋر - ەكسپەريمەنتتىك بولدى.
جالپى ەسەپتە قازاقستان ۇلتتىق قۇراماسى ەكى كۇمىس جانە التى قولا مەدال جەڭىپ الدى.
ەسكە سالا كەتسەك، حالىقارالىق مەندەلەيەۆ وليمپياداسى 1997-جىلى بۇكىلوداقتىق حيميا ءپانى وليمپياداسىنىڭ مۇراگەرى بولدى. 2004-جىلدان باستاپ وعان ت م د جانە بالتىق ەلدەرىنىڭ وقۋشىلارىنان باسقا الەمنىڭ باسقا دا ەلدەرىنىڭ كوماندالارى قاتىسا باستادى.
ايتا كەتەرلىگى، ولجاس كورەيا ۋنيۆەرسيتەتتەرىنىڭ بىرىندە گرانتقا يە بولىپ، وقۋعا ءتۇستى. سونداي-اق، ول حيميا پانىنەن «Tuymaada» حالىقارالىق سايىسىنىڭ (ەكىنشى ورىن)، بەكتۇروۆ اتىنداعى حيميا پانىنەن حالىقارالىق وليمپيادانىڭ جۇلدەگەرى (ءبىرىنشى ورىن) جانە ق. ساتبايەۆ اتىنداعى حالىقارالىق حيميا وليمپياداسىنىڭ (ءبىرىنشى ورىن) جەڭىمپازى.